ସାକ୍ଷୀଗୋପାଳ,୧୦। ୮(ପ୍ରଶାନ୍ତ ବାରିକ/କିଶୋର ମହାପାତ୍ର)ବନ ବିଦ୍ୟାଳୟର ଗାରିମା ବହନ କରୁଥିବା ଐତିହାସିକ ସତ୍ୟବାଦୀ ହାଇସ୍କୁଲର ପୁରାତନ ଛାତ ଘରକୁ ସମ୍ପୂର୍ଣ୍ଣ ଭଙ୍ଗାଯାଇ ପୁଣିଥରେ ନିର୍ମାଣ କରାଯିବ। ନିକଟରେ ୫-ଟି ଯୋଜନାରେ ସତ୍ୟବାଦୀ ହାଇସ୍କୁଲ ରୂପାନ୍ତରିତ ହୋଇଥିଲା। ହେଲେ ନବୀକରଣ ର କିଛି ମାସ ପରେ ଉକ୍ତ ସ୍କୁଲର ପ୍ରତ୍ୟେକ ରୁମର ଛାତରୁ ବାରମ୍ବାର ପ୍ଲାଷ୍ଟର ଖସିବା ସହ ସିଲିଂ ଓ କେତେକ ସ୍ଥାନରେ କାନ୍ଥ ଫାଟିଛି ତ ପୁଣି ଉପଯୁକ୍ତ ଝରକା କବାଟ ନଥିବାରୁ ଶ୍ରେଣୀ ଗୃହ ସମେତ ଅଫିସ କାର୍ଯ୍ୟାଳୟରେ ସାପ ପଶୁଥିବାର ସ୍କୁଲ କର୍ତ୍ତୃପକ୍ଷ ବାରମ୍ବାର ଅଭିଯୋଗ କରିଥିଲେ। ଏହି ସବୁ ସମସ୍ୟାକୁ ନେଇ ପ୍ରଧାନ ଶିକ୍ଷକଙ୍କ ସମେତ ସମସ୍ତ ଶିକ୍ଷକ, ଶିକ୍ଷୟିତ୍ରୀ ଓ ଛାତ୍ରୀଛାତ୍ର ଭୟରେ ରହୁଥିଲେ। ଏହି ଘଟଣାକୁ ଗୁରୁତର ଭାବେ ଗ୍ରହଣ କରି ବୁଧବାର ବିଧାୟକ ଉମାକାନ୍ତ ସାମନ୍ତରାୟ, ଉପଜିଲାପାଳ ଭବତାରଣ ସାହୁଙ୍କ ସହିତ ଗ୍ରାମ୍ୟ ଉନ୍ନୟନ ବିଭାଗର ଅଧିକାରୀ ଶଶୀଭୂଷଣ ମହାନ୍ତି, ତହସିଲଦାର ଜୟନ୍ତ କୁମାର ଜୟସିଂ, ବିଡିଓ ଲୋଚନ ଦାସ ପ୍ରମୁଖଙ୍କ ସହ ଅନ୍ୟ ବିଭାଗୀୟ ଅଧିକାରୀ ବୁଧବାର ସ୍କୁଲରେ ପହଞ୍ଚି ୫-ଟିରେ ନବୀକରଣ କରାଯାଇଥିବା ସମସ୍ତ ନିର୍ମାଣ କାର୍ଯ୍ୟ ଓ ବିଲ୍ଡିଂର ଛାତକୁ ଦେଖିଥିଲେ। ପରେ ଏ ସମସ୍ୟାକୁ ଗମ୍ଭୀରତାର ସହ ନେଇ ସ୍କୁଲର କାର୍ଯ୍ୟାଳୟରେ ଦୀର୍ଘ ସମୟ ବିଚାର ବିମର୍ଷ କରାଯିବା ପରେ ପୁରା ବିଲ୍ଡିଂକୁ ସମ୍ପୂର୍ଣ୍ଣ ଭଙ୍ଗାଯାଇ ବର୍ତ୍ତମାନର ବିଦ୍ୟାଳୟ ଢାଞ୍ଚାରେ ଏକ ନୂତନ ବିଦ୍ୟାଳୟ ଛାତ ଘର ନିର୍ମାଣ କରିବା ପାଇଁ ଜିଲାପାଳ, ବିଧାୟକ ଓ ଉପସ୍ଥିତ ଅଧିକାରୀ ସ୍ଥାନ ନିରୂପଣ କରିଥିଲେ। ସ୍କୁଲର ଛାତ ଘର ଭଙ୍ଗାଯିବା ସମୟରେ ସ୍କୁଲର ପୁରାତନ ଆଜବେଷ୍ଟସ ଘରେ ପାଠ୍ୟଦାନ ଚାଲିବ। ଶୀଘ୍ର ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଆବଶ୍ୟକ ଅର୍ଥ ପାଇଁ ଏଷ୍ଟିମେଟ ରିପୋର୍ଟ ଜିଲା ପ୍ରଶାସନକୁ ଦିଆଯିବା ପରେ ନିର୍ମାଣ କାର୍ଯ୍ୟ ଆରମ୍ଭ କରାଯିବ ବୋଲି ବିଧାୟକ ଓ ଉପଜିଲାପାଳ ପ୍ରକାଶ କରିଥିଲେ। ଏହି କାର୍ଯ୍ୟ ଅତି ଶୀଘ୍ର ଆରମ୍ଭ ହେବ ବୋଲି ଜଣାପଡ଼ିଛି। ଆଲୋଚନା ସମୟରେ ସତ୍ୟବାଦୀ ହାଇ ସ୍କୁଲର ଭାରପ୍ରାପ୍ତ ପ୍ରଧାନ ଶିକ୍ଷକ ମାନସ ରଞ୍ଜନ ପଟ୍ଟନାୟକ, ଶିକ୍ଷକ ବସନ୍ତ ସ୍ବାଇଁ ଙ୍କ ସହ ଅନ୍ୟ ଶିକ୍ଷକ ଶିକ୍ଷୟିତ୍ରୀ , ସ୍କୁଲୁ ପରିଚାଳନା କମିଟିର ସଭାପତି ଚକ୍ରଧର ମହାରଣା, ପୂର୍ବତନ ଛାତ୍ର ସଂସଦ ସଭ୍ୟ ବିଜୟ ନନ୍ଦ, ଲୋନୁ ମହାପାତ୍ର, ବିଜୟ ମହାପାତ୍ର ପ୍ରମୁଖ ଉପସ୍ଥିତ ରହି ସ୍କୁଲୁ ସମସ୍ୟାକୁ ଉପସ୍ଥିତ ଅଧିକାରୀଙ୍କୁ ଅବଗତ କରାଇଥିଲେ। ଏହି ଅବସରରେ ସ୍କୁଲ କମିଟି ସଭାପତି ଆସନ୍ତା ୧୬ ତାରିଖରେ ୫-ଟି ସଚିବଙ୍କ ସାକ୍ଷୀଗୋପାଳ ଗସ୍ତ ସମୟରେ ଏହି ଐତିହାସିକ ସ୍କୁଲକୁ ସଚିବ ପରିଦର୍ଶନ ପାଇଁ ଏକ ଅନୁରୋଧ ପତ୍ର ଉପଜିଲାପାଳଙ୍କୁ ପ୍ରଦାନ କରିଥିଲେ।
