ନୂଆଦିଲ୍ଲୀ,୧୦।୧୧: ସାଧାରଣ ଲୋକଙ୍କ ରୋଷେଇ ପରେ ବର୍ତ୍ତମାନ ଲଣ୍ଡ୍ରି ବଜେଟ ମଧ୍ୟ ବିଗିଡ଼ିବାକୁ ଯାଉଛି। ଏଫଏମସିଜି (FMCG) ଦିଗ୍ଗଜ କମ୍ପାନୀ ହିନ୍ଦୁସ୍ତାନ ୟୁନିଲିଭର ଲିମିଟେଡ (HUL) ଏହାର ସବୁଠାରୁ ଲୋକପ୍ରିୟ ଡିଟରଜେଣ୍ଟ ବ୍ରାଣ୍ଡ ସର୍ଫ ଏକ୍ସେଲ (Surf Excel), ରିନ (Rin) ଏବଂ ହିଲ (Wheel) ର ମୂଲ୍ୟ ୧୧% ପର୍ଯ୍ୟନ୍ତ ବୃଦ୍ଧି କରିଛି। କଞ୍ଚାମାଲର ବର୍ଦ୍ଧିତ ମୂଲ୍ୟ (Input Costs) ଏବଂ ଏହାର ମାର୍ଜିନ ଉପରେ ପଡ଼ୁଥିବା ଚାପକୁ କମ କରିବା ପାଇଁ କମ୍ପାନୀ ଏହି ପଦକ୍ଷେପ ନେଇଛି। ବିଭିନ୍ନ ପ୍ୟାକ ଆକାର ଅନୁଯାୟୀ ଦର ୧ ଟଙ୍କାରୁ ଆରମ୍ଭ କରି ୧୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଛି। ଜାଣନ୍ତୁ ଆପଣଙ୍କ ଘରେ ବ୍ୟବହୃତ ହେଉଥିବା ଡିଟରଜେଣ୍ଟ ଏବଂ ସାବୁନ ବର୍ତ୍ତମାନ କେତେ ମହଙ୍ଗା ହୋଇଯାଇଛି।
ହିନ୍ଦୁସ୍ତାନ ୟୁନିଲିଭର ସର୍ଫ ଏକ୍ସେଲର କୁଇକ ୱାସ (Quick Wash), ଇଜି ୱାସ (Easy Wash) ଏବଂ ଡିଟରଜେଣ୍ଟ ବାର୍ର ସମସ୍ତ ମୂଲ୍ୟ ବୃଦ୍ଧି କରିଛି। କୁଇକ ୱାସ (୧ କିଲୋଗ୍ରାମ) ର ମୂଲ୍ୟ ୨୩୫ ଟଙ୍କାରୁ ବଢ଼ି ବର୍ତ୍ତମାନ ୨୪୫ ଟଙ୍କା ହୋଇଯାଇଛି। ଅର୍ଥାତ୍ ଏଥିରେ ୧୦ ଟଙ୍କା ବୃଦ୍ଧି ପାଇଛି। ସେହିପରି ୫୦୦ ଗ୍ରାମ କୁଇକ ୱାସ୍ର ଦର ୧୨୩ ଟଙ୍କାରୁ ବଢ଼ି ୧୨୮ ଟଙ୍କା ହୋଇଛି, ଯେଉଁଥିରେ ୫ ଟଙ୍କା ବୃଦ୍ଧି ପାଇଛି। ଅନ୍ୟପକ୍ଷରେ ୧ କିଲୋଗ୍ରାମ ଇଜି ୱାସ୍ର ମୂଲ୍ୟରେ ୫ ଟଙ୍କା ବୃଦ୍ଧି ପାଇଛି। ଏହାର ମୂଲ୍ୟ ବର୍ତ୍ତମାନ ୧୬୭ ଟଙ୍କାରୁ ବଢ଼ି ୧୭୨ ଟଙ୍କା ହୋଇଯାଇଛି। ଅଧା କିଲୋଗ୍ରାମ ଇଜି ୱାସ ପ୍ୟାକେଟ୍ର ଦରରେ ମଧ୍ୟ ୨ ଟଙ୍କା ବୃଦ୍ଧି ଘଟିଛି, ଯାହା ପରେ ଏହାର ଦର ୮୫ ଟଙ୍କାରୁ ବଢ଼ି ୮୭ ଟଙ୍କା ହୋଇଛି।
୨୫୦ ଗ୍ରାମ ବିଶିଷ୍ଟ ସର୍ଫ ଏକ୍ସେଲ ବାର୍ ବର୍ତ୍ତମାନ ୪୨ ଟଙ୍କାରୁ ବଢ଼ି ୪୫ ଟଙ୍କା ହୋଇଯାଇଛି। ଏଥିରେ ୩ ଟଙ୍କା ବୃଦ୍ଧି ପାଇଛି। ୪ଟି ଟିକିଆ ବିଶିଷ୍ଟ ସର୍ଫ ଏକ୍ସେଲ ବାର୍ (ପ୍ରତ୍ୟେକ ୨୦୦ ଗ୍ରାମ) ର ମୂଲ୍ୟ ୧୪୫ ଟଙ୍କାରୁ ବଢ଼ି ବର୍ତ୍ତମାନ ୧୫୫ ଟଙ୍କା ହୋଇଛି, ଯେଉଁଥିରେ ୧୦ ଟଙ୍କା ବୃଦ୍ଧି ପାଇଛି।
ମଧ୍ୟବିତ୍ତ ଏବଂ ବଜେଟ-ଅନୁକୂଳ ପରିବାରରେ ସବୁଠାରୁ ଅଧିକ ବ୍ୟବହୃତ ହେଉଥିବା ରିନ ଏବଂ ହିଲ୍ର ମୂଲ୍ୟ ମଧ୍ୟ ବୃଦ୍ଧି କରାଯାଇଛି। ରିନ ଆଲା (500 ml) ର ଦର ୯୦ ଟଙ୍କାରୁ ବଢ଼ି ବର୍ତ୍ତମାନ ୯୫ ଟଙ୍କା ହୋଇଯାଇଛି। ସେହିପରି ୧ କିଲୋଗ୍ରାମ ରିନ ପାଉଡରର ମୂଲ୍ୟ ୧୨୦ ଟଙ୍କାରୁ ବଢ଼ି ୧୨୩ ଟଙ୍କା ହୋଇଛି। ଅଧା କିଲୋଗ୍ରାମ ରିନ ପାଉଡର ପ୍ୟାକେଟ ବର୍ତ୍ତମାନ ୬୧ ଟଙ୍କା ବଦଳରେ ୬୩ ଟଙ୍କାରେ ମିଳିବ, ଯାହାର ଦର ୨ ଟଙ୍କା ବୃଦ୍ଧି ପାଇଛି। ୧ କିଲୋଗ୍ରାମ ହିଲ ପାଉଡରରେ ୩ ଟଙ୍କା ବୃଦ୍ଧି ପାଇଛି ଏବଂ ଏହାର ମୂଲ୍ୟ ୯୦ ଟଙ୍କାରୁ ବଢ଼ି ବର୍ତ୍ତମାନ ୯୩ ଟଙ୍କା ହୋଇଛି।
ସେହିପରି ଅଧା କିଲୋଗ୍ରାମ ହିଲ ପାଉଡରର ମୂଲ୍ୟରେ କେବଳ ୧ ଟଙ୍କା ବୃଦ୍ଧି ପାଇଛି। ୫୦୦ ଗ୍ରାମ ପ୍ୟାକେଟ୍ଟି ବର୍ତ୍ତମାନ ୪୬ ଟଙ୍କା ବଦଳରେ ୪୭ ଟଙ୍କାରେ ମିଳିବ।
ଡିଟରଜେଣ୍ଟ ବ୍ୟତୀତ HUL ଏହାର ଗାଧୁଆ ସାବୁନ ବର୍ଗରେ ପ୍ରିମିୟମ ମୋତି ଗୋଲାପ (Moti Gulab) ସାବୁନ୍ର ମୂଲ୍ୟ ମଧ୍ୟ ବୃଦ୍ଧି କରିଛି। ଏହାର ୧୫୦ ଗ୍ରାମ ବିଶିଷ୍ଟ ସିଙ୍ଗଲ ପ୍ୟାକ୍ର ମୂଲ୍ୟ ୭୪ ଟଙ୍କାରୁ ସିଧାସଳଖ ବଢ଼ି ୮୨ ଟଙ୍କା କରାଯାଇଛି, ଅର୍ଥାତ୍ ଏଥିରେ ପ୍ରାୟ ୧୦%ରୁ ଅଧିକ ବୃଦ୍ଧି ଘଟିଛି।
ମୂଲ୍ୟ କାହିଁକି ବଢ଼ାଇବାକୁ ପଡ଼ିଲା?
FMCG କମ୍ପାନୀଗୁଡ଼ିକ ଉପରେ କଞ୍ଚାମାଲର (କ୍ରୁଡ ଅଏଲ୍ରୁ ପ୍ରସ୍ତୁତ ରାସାୟନିକ ପଦାର୍ଥ ଏବଂ ପ୍ୟାକେଜିଂ ସାମଗ୍ରୀ) ମହଙ୍ଗା ମାଡ଼ର ପ୍ରଭାବ କ୍ରମାଗତ ଭାବରେ ପଡ଼ୁଛି। HUL ର ଏମଡି ଏବଂ ସିଇଓ ପ୍ରିୟା ନାୟାର ପୂର୍ୱରୁ ମଧ୍ୟ ସଙ୍କେତ ଦେଇଥିଲେ ଯେ ଇନପୁଟ କୋଷ୍ଟ ଆଧାରରେ କମ୍ପାନୀ ଏକ ସନ୍ତୁଳିତ ଉପାୟରେ ମୂଲ୍ୟ ବୃଦ୍ଧି କରିଚାଲିବ।
