ମାଲକାନଗିରି,୧ା୧(ଡି.ଏନ୍.ଏ.): ମାଲକାନଗିରି ଜିଲା ସଦରମହକୁମା ଠାରୁ ୫ କିଲୋମିଟର ଦୂର ସତୀଗୁଡ଼ା ଜଳଭଣ୍ଡାରକୁ ଲାଗି ରହିଥିବା ସତୀଗୁଡ଼ା ପ୍ରାକୃତିକ ପର୍ଯ୍ୟଟନସ୍ଥଳୀ ଏବଂ ଚିତ୍ରକୋଣ୍ଡାଠାରେ ଥିବା ପ୍ରାକୃତିକ ପର୍ଯ୍ୟଟନସ୍ଥଳୀରେ ପୂର୍ବବର୍ଷ ଭଳି ନୂଆବର୍ଷରେ ପର୍ଯ୍ୟଟକଙ୍କ ସଂଖ୍ୟା କମ୍ ଦେଖିବାକୁ ମିଳିଛି। ପ୍ରତିବର୍ଷ ନୂଆବର୍ଷରେ ହଜାର ହଜାର ସଂଖ୍ୟାରେ ପର୍ଯ୍ୟଟକ ଏହି ଦୁଇଟି ପର୍ଯ୍ୟଟନସ୍ଥଳୀକୁ ପରିଭ୍ରମଣରେ ଆସି ବଣଭୋଜି କରି ମଜା ନେବା ସହ ନୌବିହାର, ଶିଶୁ ଉଦ୍ୟାନ, ବିଭିନ୍ନ ପ୍ରାକୃତିକ ବୃକ୍ଷରାଜି, ଫୁଲ ବଗିଚା, ଦୋଳି ଖେଳ, ପାଣି ନିର୍ଝର ସହ ପ୍ରାକୃତିକ ପରିବେଶକୁ ଉପଭୋଗ କରିଥାନ୍ତି। କିନ୍ତୁ ଚଳିତ ବର୍ଷ ଉଭୟ ପର୍ଯ୍ୟଟନସ୍ଥଳୀ ପରିସରରେ ବନବିଭାଗ ପକ୍ଷରୁ ବଣଭୋଜି ନିଷେଧ କରାଯାଇଥିବାରୁ ଛତିଶଗଡ଼, ଆନ୍ଧ୍ର, ଏବଂ ମାଲକାନଗିରି ସହ ଅନ୍ୟ ଜିଲାରୁ ଆସିଥିବା ପର୍ଯ୍ୟଟକମାନେ ନିରାଶ ହୋଇ ଫେରି ଯାଉଥିବା ଦେଖିବାକୁ ମିଳିଛି। ଯଦ୍ୱାରା ଚଳିତ ବର୍ଷ ରାଜସ୍ବ ଆଦାୟ ବାଧାପ୍ରାପ୍ତ ହୋଇଛି। ଏ ସମ୍ବନ୍ଧରେ ସ୍ଥାନୀୟ ବନାଞ୍ଚଳ ଅଧିକାରୀ ଜଗନ୍ନାଥ ପ୍ରସାଦ ବିଶୋଇ ପ୍ରକାଶ କରିଛନ୍ତି, ପର୍ଯ୍ୟଟକମାନଙ୍କ ପାଇଁ ପର୍ଯ୍ୟଟନସ୍ଥଳୀ ପରିସରରେ କ୍ୟାଣ୍ଟିନ ବ୍ୟବସ୍ଥା କରାଯିବା ସହ ସେମାନଙ୍କର ଖାଦ୍ୟପେୟ, ଜଳଖିଆ ଇତ୍ୟାଦି ବ୍ୟବସ୍ଥା ଅଛି। ବଣଭୋଜି ଦ୍ୱାରା ପର୍ଯ୍ୟଟନସ୍ଥଳୀ ପରିବେଶ ଉପରେ କୁପ୍ରଭାବ ପଡୁଥିବାରୁ ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶ କ୍ରମେ ବଣଭୋଜିକୁ ନିଷେଧ କରାଯାଇଛି। ତେବେ ପର୍ଯ୍ୟଟନସ୍ଥଳୀକୁ ଲାଗି ରହିଥିବା ଅନ୍ୟ ଏକ ସ୍ଥାନରେ ବଣଭୋଜି ପାଇଁ ସ୍ବତନ୍ତ୍ର ବ୍ୟବସ୍ଥା କରାଯିବାର ଯୋଜନା ଅଛି ବୋଲି ପ୍ରକାଶ କରିଥିଲେ।
