ନୟାଗଡ଼,୧୬।୬(ଲୋକନାଥ ମିଶ୍ର): ନୟାଗଡ଼ ଜିଲାରେ ଗୋଷ୍ଠୀ ଉଠାଜଳସେଚନ ପ୍ରକଳ୍ପ ଚାଷୀଙ୍କ କାମରେ ଲାଗୁନି । ଅଚଳ ପ୍ରକଳ୍ପକୁ ସଚଳ କରିବାକୁ ବର୍ଷକୁ ୬କୋଟିରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହେଉଛି। ହେଲେ ପ୍ରକଳ୍ପ କାର୍ଯ୍ୟକ୍ଷମ ହେଉ ନ ଥିବାରୁ ଚାଷ ଜମିକୁ ପାଣି ଯୋଗାଇବାରେ ସକ୍ଷମ ହୋଇ ପାରୁନି। ଚାଷୀଙ୍କ ନାଁରେ ଉଠାଜଳସେଚନ ବିଭାଗର କେତେଜଣ କର୍ମଚାରୀ ଓ ଅଧିକାରୀ ଲାଭବାନ ହେଉଥିବା ଅଭିଯୋଗ ହୋଇଛି। ପ୍ରକଳ୍ପ ମରାମତି ନାଁରେ କେବଳ ଅପବ୍ୟୟ ଚାଲିଛି। ଉଠାଜଳସେଚନ ବିଭାଗ ଟାର୍ଗେଟ ପୂରଣ କରି ଲାଭବାନ ହେଉଛି। ଏହି ପରିପ୍ରେକ୍ଷୀରେ ଦେଖିଲେ ଉଠାଜଳସେଚନ ବିଭାଗର କାର୍ଯ୍ୟ ସନ୍ଦେହ ଘେରରେ ରହିଛି। ତଦନ୍ତ କରାଗଲେ ପ୍ରକୃତ ରହସ୍ୟ ପଦାକୁ ଆସିବ। ସରକାର କୃଷି ଓ କୃଷକଙ୍କ ପାଇଁ ବାର୍ଷିକ ଅନେକ କୋଟି ଟଙ୍କା ଖର୍ଚ୍ଚ କରୁଥିଲେ ମଧ୍ୟ ତାହା ପାଣିରେ ପଡୁଛି ଅଭିଯୋଗ ହୋଇଛି।
ସୂଚନା ଅନୁଯାୟୀ, ଚାଷୀଙ୍କ ଜମିକୁ ଜଳସେଚନରେ ସୁବିଧା ପାଇଁ ଜିଲାରେ ଉଠାଜଳସେଚନ ବିଭାଗ ପକ୍ଷରୁ ୬୩୫ ଗୋଷ୍ଠୀ ଉଠାଜଳସେଚନ ପ୍ରକଳ୍ପ ରହିଛି। ସେଥିରୁ ନୟାଗଡ଼ ବ୍ଲକରେ ୮୮, ଓଡ଼ଗାଁ ବ୍ଳକରେ ୯୯, ଖଣ୍ଡପଡ଼ା ବ୍ଳକରେ ୧୩୪, ଭାପୁର ବ୍ଲକରେ ୬୭, ଗଣିଆ ବ୍ଲକରେ ୫୨, ଦଶପଲ୍ଲା ବ୍ଲକରେ ୪୬, ନୂଆଗାଁ ବ୍ଲକରେ ୭୯, ରଣପୁର ବ୍ଲକରେ ୭୦ ରହିଛି । ଏହି ପ୍ରକଳ୍ପ ଦ୍ୱାରା ୧୪ ହଜାର ୪୭୮ ଜମିରେ ଜଳସେଚିତ ହୋଇ ପାରିବ ବୋଲି ଉଠାଜଳସେଚନ ବିଭାଗ ପକ୍ଷରୁ କୁହାଯାଉଛି । ତେବେ ଉପରୋକ୍ତ ପ୍ରକଳ୍ପରୁ ନୟାଗଡ ବ୍ଲକରେ ୨୧, ଓଡ଼ଗଁା ବ୍ଳକରେ ୧୫, ଖଣ୍ଡପଡା ବ୍ଳକରେ ୩୯, ଭାପୁର ବ୍ଳକରେ ୨୩, ଗଣିଆ ବ୍ଲକରେ ୨୩, ଦଶପଲ୍ଲା ବ୍ଲକରେ ୧୦, ନୂଆଗାଁ ବ୍ଳକରେ ୨୩, ରଣପୁର ବ୍ଲକରେ ୨୦ ପ୍ରକଳ୍ପ ଅଚଳ ଅଛି ବୋଲି ସରକାରୀ ରେକର୍ଡ କୁହୁଛି । କିନ୍ତୁ ଗ୍ରାଉଣ୍ଟ ଜିରୋ ରିପୋର୍ଟକୁ ଅନୁଧ୍ୟାନ କଲା ପରେ ପ୍ରାୟ ୧୦୦ ପ୍ରକଳ୍ପ ସଚଳ ଅଛି ବୋଲି ଜଣାପଡିଛି । ଏଣୁ ସରକାରୀ ରେକର୍ଡ ଅନୁସାରେ ୧୭୪ ପ୍ରକଳ୍ପ ଅଚଳ ପାଇଁ ୪୯୨୫ ହେକ୍ଟର ଜମିରେ ଜଳ ମାଡି ପାରୁନାହିଁ । ଏଭଳି ସ୍ଥଳେ ଅଚଳ ପ୍ରକଳ୍ପକୁ ସଚଳ କରିବା ପାଇଁ ସରକାର ୨୦୨୦-୨୧ ଆର୍ଥିକ ବର୍ଷରେ ୪୧ଟି ପ୍ରକଳ୍ପର କାମ ଆରମ୍ଭ କରିଥିଲେ । ଏଥିରୁ ୩୭ଟି ପ୍ରକଳ୍ପକୁ ସଚଳ କରାଯାଇ ପାଣି ପଞ୍ଚାୟତକୁ ହସ୍ତାନ୍ତର କରାଯାଇଛି ବୋଲି ଉଠାଜଳସେଚନ ବିଭାଗ ପକ୍ଷରୁ କୁହାଯାଇଛି । ଅଚଳ ପ୍ରକଳ୍ପକୁ ମରାମତି ପାଇଁ ୭କୋଟି ୭୦ ଲକ୍ଷ ୭୦ ହଜାର ଟଙ୍କା ଖର୍ଚ୍ଚ ହୋଇଛି । ସେହିଭଳି ୨୦୨୨-୨୩ ଆର୍ଥିକ ବର୍ଷରେ ପୁଣି ୩୨ ଅଚଳ ପ୍ରକଳ୍ପକୁ ମରାମତି ପାଇଁ ୬କୋଟି ୪୯ ଲକ୍ଷ ୭୦ ହଜାର ମଞ୍ଜୁର ହୋଇଛି । ଏଥିରୁ ମାତ୍ର ଗୋଟିଏ ପ୍ରକଳ୍ପ ସଚଳ ହୋଇଥିବାବେଳେ ଅନ୍ୟ ଗୁଡିକର କାମ ଚାଲୁ ରହିଛି । ଚାଷୀଙ୍କ ହିତ ପାଇଁ କାମ କରୁଥିବା ଉଠାଜଳସେଚନ ବିଭାଗର କାର୍ଯ୍ୟଧାରକୁ ଅନୁଧ୍ୟାନ କଲେ ପ୍ରକଳ୍ପଗୁଡିକ କାହିଁକି ନିର୍ମାଣ ହେଉଛି ବୋଲି ପ୍ରଶ୍ନ ଉଠୁଛି । ଚାଷୀଙ୍କ କାମରେ ଯଦି ପ୍ରକଳ୍ପ କାମରେ ଲାଗୁନି ତେବେ ବାରମ୍ବାର ପ୍ରକଳ୍ପକୁ ମରାମତି କାହିଁକି କରାଯାଉଛି । ମରାମତି ପରେ ପ୍ରକଳ୍ପ କେତେଦୂର କାର୍ଯ୍ୟ କରୁଛି ଜିଲା ପରିଷଦର ଏକ ଟିମ୍ ଯାଇ ଅନୁଧ୍ୟାନ କରିବା ପେ ର ସତ୍ୟ ପଦାକୁ ଆସିବ ବୋଲି ସାଧାରଣରେ ମତ ପ୍ରକାଶ ପାଇଛି ।
ଏ ନେଇ ଗଣିଆର ମକରନ୍ଦ ପ୍ରଧାନ, ନୂଆଗାଁର ବଦ୍ରି ନାରାୟଣ ନାୟକ, ଦଶପଲ୍ଲାର କାମାକ୍ଷା ସାହୁ, ନୟାଗଡ଼ର ରାମଚନ୍ଦ୍ର ନାୟକ କୁହନ୍ତି, ଉଠାଜଳସେଚନ ବିଭାଗ ପକ୍ଷରୁ ନୂଆ ପ୍ରକଳ୍ପ ନିର୍ମାଣ ଓ ପୁରୁଣା ପ୍ରକଳ୍ପ ମରାମତିକୁ ଗୁରୁତ୍ୱ ଦିଆଯାଉଛି । ଚାଷୀ ଉପକୃତ ହୁଅନ୍ତ କି ନାହିଁ ସେଥିପ୍ରତି ଲକ୍ଷ୍ୟ ନାହିଁ । ଜିଲା ପରିଷଦ ବୈଠକରେ କେବଳ ତଥ୍ୟ ଦେଇ ସବୁ କିଛି ଠିକ୍ ଚାଲିଛି ବୋଲି କୁହାଯାଉଛି । ଜିଲା ପରିଷଦ ବୈଠକରେ ଚାଷୀର ସମସ୍ୟା ନେଇ କେବଳ ଆଲୋଚନା ନ କରି ପ୍ରକଳ୍ପର କାର୍ଯ୍ୟ ଅନୁଧ୍ୟାନ କରାଗଲେ ବିଭାଗ କେତେଦୂର କାର୍ଯ୍ୟ କରୁଛି ତାହା ସ୍ପଷ୍ଟ ହୋଇଯିବ ବୋଲି ସେମାନେ ସୂଚନା ଦେଇଛନ୍ତି । ନୟାଗଡ଼ ଉଠାଜଳସେଚନ ଖଣ୍ଡ ନିର୍ବାହୀ ଯନ୍ତ୍ରୀ ନିରଞ୍ଜନ ଦାସ କୁହନ୍ତି, ଚାଷୀଙ୍କ ହିତ ପାଇଁ ବିଭାଗ କାର୍ଯ୍ୟ କରୁଛି । ଅଚଳ ପ୍ରକଳ୍ପ ମରାମତି ପାଇଁ ସରକାର ଯୋଗାଉଥିବା ଅନୁଦାନ ଠିକରେ ଖର୍ଚ୍ଚ ହେଉଛି। ଚାଷୀଙ୍କ କିଛି ଅସୁବିଧା ଥିଲେ ସେମାନେ ସେମାନଙ୍କ ସମସ୍ୟା ଅବଗତ କରାଇ ସମାଧାନ କରାଇପାରିବେ ବୋଲି ସେ କହିଛନ୍ତି।
