ନୂଆଦିଲ୍ଲୀ: ଅନେକ ଲୋକଙ୍କୁ ଦାମୀ ପୋଷାକ ପିନ୍ଧିବା ପସନ୍ଦ। ବହୁ ସମୟରେ କେତେଜଣ ଦାମୀ ପୋଷାକ ପିନ୍ଧି ଚର୍ଚ୍ଚାର ପରିସରକୁ ମଧ୍ୟ ଆସିଛନ୍ତି। ଫ୍ୟାଶନ୍ ଇତିହାସରେ ଏମିତି ଅନେକ ଅଧିକ ମୂଲ୍ୟର ଡ୍ରେସ୍ ତିଆରି ହୋଇଛିି। ହଜାରେ କି ଲକ୍ଷେ ନୁହେଁ ବରଂ କୋଟି କୋଟି ଟଙ୍କାରେ ଏହି ଡ୍ରେସ୍ ସବୁ ତିଆରି ହୋଇଛି, ଯାହାର ଆୟତନ ଏତେ ଅଧିକ ଯେ,ଯେଉଁଥିରେ ଦୁଇଟି ଦ୍ୱୀପ କିମ୍ବା ବଡ଼ ସହର ସହଜରେ ଜାଗା ହୋଇଯିବ।
ଦ ନାଇଟ୍ଙ୍ଗେଲ୍ ଅଫ୍ କୁଆଲା ଲମ୍ପୁର
ବର୍ତ୍ତମାନ ସମୟର ସବୁଠାରୁ ଦାମୀ ଡ୍ରେସ୍ ହେଉଛି ‘ଦ ନାଇଟ୍ଙ୍ଗେଲ ଅଫ୍ ଦ ଲମ୍ପୁର’। ଏହାକୁ ଡିଜାଇନ୍ କରିଛନ୍ତି ଫୈସାଲ ଅବଦୁଲ୍ଲାହା। ଏହି ଡ୍ରେସ୍ର ମୂଲ୍ୟ ୩୦ ମିଲିୟନ୍ ଡଲାର ଅର୍ଥାତ୍ ୨,୪୭,୨୫,୪୦,୦୦୦ ଟଙ୍କା। କ୍ରିମ୍ସନ୍ ସିଲ୍କ ଏବଂ ତାଫୋତା କପଡ଼ାରେ ଏହି ଡ୍ରେସ୍ ତିଆରି ହୋଇଥିବାବେଳେ ୭୫୦ ରିୟଲ୍ ଡାଇମଣ୍ଡ ଡ୍ରେସ୍ରେ ଖଞ୍ଜାଯାଇଛି।
ହାନି ଇଲ ବେହେରି ଓ୍ବେଡିଂ ଡ୍ରେସ୍
୧୫ ମିଲିୟନ୍ ଡଲାରରେ ଏହି ଓ୍ବେଡିଂ ଡ୍ରେସ୍ ତିଆରି କରାଯାଇଥିଲା। ୨୦୨୦ରେ ପ୍ୟାରିସ୍ ସ୍ଥିତ ହର୍ଟ କୋଟର୍ରେ ଏହି ଡ୍ରେସ୍ର ଅନାବରଣ କରାଯାଇଥିବାବେଳେ ଏଥିରେ ଶତାଧିକ ହୀରା ଓ ମୂଲ୍ୟବାନ ପଥର ଖଞ୍ଜାଯାଇଥିଲା। ହାନି ଇଲ୍ ବେହେରି ହେଉଛନ୍ତି ଇଜିପ୍ଟର ଜଣେ ଜଣାଶୁଣା ଫ୍ୟାଶନ୍ ଡିଜାଇନର। ଦାମୀ ଓ୍ବେଡିଂ ଡ୍ରେସ୍ ତିଆରି କରିବାରେ ସେ ବେଶ୍ ପରିଚିତ। ଇଜିପ୍ଟର ଜଣେ ସମ୍ଭ୍ରାନ୍ତ ପରିବାରର ଝିଅଙ୍କ ବାହାଘର ପାଇଁ ଏହି ଡ୍ରେସ୍ ତିଆରି ହୋଇଥିବାବେଳେ ଏହାକୁ ତିଆରି କରିବା ଲାଗି ୮୦୦ ଘଣ୍ଟା ଲାଗିଥିଲା।
ମାର୍ଟିନ୍ କାଟ୍ଜ ଆଣ୍ଡ ରେନୀ
ଷ୍ଟ୍ରଉସ୍ ଓ୍ବେଡିଂ ଡ୍ରେସ୍ ୨୦୦୬ରେ ମାର୍ଟିନ କାର୍ଟଜ୍ ଓ ରେନୀ ଏକ ଗାଉନ୍ ତିଆରି କରିଥିଲେ। ଗାଉନ୍ରେ ୧୫୦ କ୍ୟାରେଟର ହୀରା ଲାଗିଥିବାବେଳେ ଏହାର ମୂଲ୍ୟ ୧୬.୨ ମିଲିୟନ୍ ଡଲାର ରହିଥିଲା।
କୁଇନ୍ ଲେଟିଜିଆଙ୍କ ରୟାଲ୍ ଓ୍ବେଡିଂ ଡ୍ରେସ୍
ସ୍ପେନ୍ର କୁଇନ୍ ଲେଟିଜିଆଙ୍କ ବାହାର ଗାଉନ୍ରେ ହାତ ସିଲେଇ ଫ୍ଲୋରାଲ କାମ ହୋଇଥିଲା, ଯେଉଁଥିରେ ସୁନାର ପାତ ମଧ୍ୟ ଖଞ୍ଜାଯାଇଥିଲା। ୨୦୦୪ରେ ଏହି ଡ୍ରେସ୍ ୧୦.୭ ମିଲିୟନ୍ ଡଲାର ମୂଲ୍ୟରେ ତିଆରି କରାଯାଇଥିଲା। ସେହି ବର୍ଷ ଲେଟିଜିଆଙ୍କ ଏହି ଡ୍ରେସ୍ ଗିନିଜ୍ ଓ୍ବାଲର୍ଡ ରେକର୍ଡ କରିଥିଲା।
ୟୁମି କାଟ୍ସୁରା ହ୍ବାଇଟ୍ ଗୋଲ୍ଡ ଡାଇମଣ୍ଡ ଡ୍ରେସ୍
ଜାପାନର ଫେମସ୍ ଫ୍ୟାଶନ୍ ଡିଜାଇନର ୟୁମି କାଟ୍ସୁରାଙ୍କ ହ୍ବାଇଟ୍ ଗୋଲ୍ଡ ଡାଇମଣ୍ଡ ଡ୍ରେସ୍ର ମୂଲ୍ୟ ୮.୫ ନିୟୁତ ଡଲାର। ଡ୍ରେସ୍ରେ ହଜାରରୁ ଊର୍ଦ୍ଧ୍ୱ ମୋତି ସାଙ୍ଗକୁ ଲକ୍ଷାଧିକ ଡାଇମଣ୍ଡ ଖଞ୍ଜା ଯାଇଥିଲା। ଆମେରିକୀୟ ଅଭିନେତ୍ରୀ ମାରିଲିନ୍ ମୋନରେଙ୍କ ଏକ ଡ୍ରେସ୍ ମଧ୍ୟ ବେଶ୍ ଚର୍ଚ୍ଚା ସାଉଁଟିଥିଲା। ଆରେମିକାର ପୂର୍ବତନ ରାଷ୍ଟ୍ରପତି ଜନ୍ ଏଫ୍. କେନ୍ନେଡିଙ୍କ ଜନ୍ମ ଦିନ ଅବସରରେ ମୋନରେ ଏହି ପୋଷାକ ପିନ୍ଧି ଥିଲେ , ଯାହାର ମୂଲ୍ୟ ୪.୮ ମିଲିୟନ୍ ଡଲାର ଥିଲା।
