ପାଣିକୋଇଲି,୧୨।୨(ଡି.ଏନ.ଏ.): ପାଣିକୋଇଲି ଥାନା ପାଣିକୋଇଲି ପଞ୍ଚାୟତ ଅନ୍ତର୍ଗତ ମଣିପୁର ଗ୍ରାମରେ ଥିବା ଏକ ଫାର୍ମ ହାଉସରେ କେହି ଦୁର୍ବୃତ୍ତ ନିଆଁ ଲଗାଇ ଦେଇଛନ୍ତି। ଫଳରେ ଫାର୍ମ ହାଉସରେ ଥିବା ୨୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସାମଗ୍ରୀ ଓ ଗଛ ଜଳି ପାଉଁଶ ହୋଇଯାଇଛି। ଏନେଇ ଫାର୍ମ ହାଉସ ମାଲିକ ଥାନାରେ ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।
ସୂଚନା ମୁତାବକ, ମଣିପୁର ଗ୍ରାମର ଅଙ୍କୁର ଚରଣ ପଣ୍ଡା ମଣିପୁର ମୌଜାର ୮ ଏକର ପରିମିତ ଅଞ୍ଚଳରେ ମା’ ତାରିଣୀ ଫାର୍ମ ହାଉସ କରିଛନ୍ତି। ୨୦୧୬/୧୭ରେ ଉଦ୍ୟାନ ବିଭାଗ ସହାୟତରେ ସେ ଏହି ପ୍ରକଳ୍ପ ଆରମ୍ଭ କରିଥିଲେ। ପାର୍ମ ହାଉସରେ ୩ ଏକର ପରିମିତ ଅଞ୍ଚଳରେ ପୋଖରୀ ଖୋଳି ମାଛ ଚାଷ କରୁଥବାବେଳେ ଅନ୍ୟ ୫ ଏକରରେ ଆମ୍ବ, ନଡିଆ, ପିଜୁଳି, ତେଜପତ୍ର, କଦଳୀ, ଅଳଁା, କୋଳି ଆଦି ଗଛ ଲଗାଇଛନ୍ତି। ବହୁମୁଖି କୃଷି ଉଦ୍ୟୋଗ କରି ପଣ୍ଡା ବହୁବାର ପୁରସ୍କୃତ ହୋଇଛନ୍ତି। ଏଥିସହିତ ୫ ଏକର ଜମିରେ ବୁନ୍ଦା ଜଳସେଚନ ବ୍ୟବସ୍ଥା କରିବା ସହ ଫସଲ ସଂରକ୍ଷତ୍ତ ପାଇଁ ଏକ କ୍ଷୁଦ୍ର ଶୀତଳ ଭଣ୍ଡାର ନିର୍ମାଣ କରିଛନ୍ତି। ତେବେ ପଣ୍ଡାଙ୍କ ନାତିଙ୍କ ବ୍ରତଘର ଯୋଗୁ ଫାର୍ମରେ କେହି ନ ଥିଲେ। ଏହାର ସୁଯୋଗରେ ଦୁର୍ବୃତ୍ତ ନିଅଁା ଲଗାଇଦେଇଥିଲା। ଅଗ୍ନିକାଣ୍ଡ ଯୋଗୁ ୨ ଲକ୍ଷ ଟଙ୍କାରୁ ଊର୍ଦ୍ଧ୍ୱ ବୁନ୍ଦା ଜଳସେଚନ ପାଇପ ସହ ୫ ଲକ୍ଷ ଟଙ୍କାର ଶୀତଳ ଭଣ୍ଡାର କୁଲ ପାୱାର ମେଶିନ ପୋଡିଯାଇଛି। ଏଥିସହିତ ଆମ୍ବ, ପିଜୁଳି, ତେଜପତ୍ର ଶତାଧିକ ଗଛ ପୋଡି ଯାଇଛି, ଯାହାର ସମସ୍ତ ଆନୁମାନିକ ମୂଲ୍ୟ ୨୦ ଲକ୍ଷ ଟଙ୍କାରୁ ଊର୍ଦ୍ଧ୍ୱ ହେବ ବୋଲି ଆକଳନ କରାଯାଉଛି। ଫାର୍ମ ହାଉସକୁ ଶ୍ରୀହୀନ କରିଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ପଣ୍ଡା। ଅନ୍ୟପକ୍ଷରେ ତୁରନ୍ତ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି।
