କୁଜଙ୍ଗ, ୧୬ା୫(ଡି.ଏନ୍.ଏ.): ଏରସମା ତହସିଲ ଅନ୍ତର୍ଗତ ଅଭୟଚାନ୍ଦପୁର ମୌଜା ଭୋଷ୍କାଲିସ ପଏଣ୍ଟ ସମୁଦ୍ରକୂଳ ପ୍ରାକୃତିକ ବାଲୁକା ସ୍ତୂପ ଉପରେ ବାଲି ମାଫିଆଙ୍କ ଲୋଲୁପ ଦୃଷ୍ଟି ପଡ଼ିଛି। ପ୍ରାକୃତିକ ବାଲୁକା ସ୍ତୂପ ସଂଲଗ୍ନ ଘରୋଇ ଜମି ଉପରେ ବାଲି ଉଠାଣ ପାଇଁ ନାମକୁମାତ୍ର ରୟାଲଟି କାଟି ସରକାରୀ ଜାଗାରେ ଥିବା ବାଲୁକା ସ୍ତୂପରୁ ଦୈନିକ ଶହ ଶହ ଟ୍ରିପ ବାଲି ଉଠାଯାଇ ଚୋରା ଚାଲାଣ ହେଉଛି। ଏଥିରେ ଢିଙ୍କିଆ ଗ୍ରାମର କେତେଜଣ ବ୍ୟକ୍ତି ବାଲି ମାଫିଆଙ୍କୁ ପ୍ରୋତ୍ସାହନ ଦେଉଥିବାରୁ ଗ୍ରାମରେ ଚାପା ଅସନ୍ତୋଷ ପ୍ରକାଶ ପାଇଛି। ଗୋଟିଏ ପଟେ ରୟାଲଟି ଯେଉଁ ପ୍ଲଟ ଉପରେ କଟାଯାଇଛି ସେ ପ୍ଲଟରୁ ବାଲି ଉଠୁଛି କି ଅନ୍ୟ ସ୍ଥାନରୁ ଉଠୁଛି ତାହାକୁ ଯାଞ୍ଚ କରାଯାଉନାହିଁ। ଏପରିକି କେତେ ପରିମାଣର ବାଲି ଉଠୁଛି ତାର ମଧ୍ୟ ରାଜସ୍ବ ବିଭାଗ ହିସାବ ରଖିବା ପାଇଁ ତତ୍ପରତା ପ୍ରକାଶ କରୁନାହିଁ। ଫଳରେ ବାଲିମାଫିଆମାନେ ଲକ୍ଷ ଲକ୍ଷ ଟଙ୍କାର ବାଲି ବିନା ରାଜସ୍ବରେ ଲୁଟି ନେଉଛନ୍ତି ା ଏସମ୍ପର୍କରେ ଧରିତ୍ରୀରେ ଖବର ପ୍ରକାଶ ପାଇବା ପରେ ବାଲି ଉଠାଣ କିଛି ଦିନ ପର୍ଯ୍ୟନ୍ତ ବନ୍ଦ ରହିଥିଲା। ମାତ୍ର ପୁନର୍ବାର ଏବେ ବାଲି ଉଠାଣ ଆରମ୍ଭ ହୋଇଛି ା
ଏ ସମ୍ପର୍କରେ ଢିଙ୍କିଆ ଗ୍ରାମର ବିବେକାନନ୍ଦ ସ୍ବାଇଁ କହିଛନ୍ତି, ଏହି ବାଲିସ୍ତୂପ ଯୋଗୁ ୧୯୯୯ ମହାବାତ୍ୟାରେ ବଙ୍ଗୋପସାଗରରେ ଉଠିଥିବା ଉଚ୍ଚଢେଉ ଏହାକୁ ପାର କରିପାରି ନଥିଲା। ଫଳରେ ଢିଙ୍କିଆ, ମାହାଳ ଓ ତ୍ରିଲୋଚନପୁର ଆଦି ଗ୍ରାମକୁ ଲୁଣି ପାଣି ପଶି ନ ଥିତ୍ଲା କି କୌଣସି ଜୀବନହାନି ହୋଇ ନ ଥିଲା ା
ବାଲି ଉଠାଣ ସମ୍ପର୍କରେ ଏରସମା ତହସିଲଦାର ପ୍ରଜ୍ଞାନନ୍ଦ ଦାସ କହିଛନ୍ତି, ଯେଉଁ ପ୍ଲଟ ଉପରେ ରୟାଲଟି କଟାହେଇଛି ସେଠାରୁ ବାଲି ଉଠିବା କଥା ା ଯଦି ବେଆଇନ ଭାବେ ଅନ୍ୟ ସ୍ଥାନରୁ ଉଠାଯାଇଥାଏ ତାଙ୍କ ରୟାଲଟି ରଦ୍ଦ କରାଯାଇ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ା
