ନାଉଗାଁ,୧।୬(ସ୍ବ.ପ୍ର.): ଗ୍ରାମାଞ୍ଚଳର ଆର୍ଥତ୍କ ଅନଗ୍ରସର ଲୋକଙ୍କୁ ନିଜ ଅଞ୍ଚଳରେ କାର୍ଯ୍ୟ ଯୋଗାଇବା ପାଇଁ ଏମ୍ଜିଏନ୍ଆରଇଜିଏସ୍(ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା) କାର୍ଯ୍ୟକାରୀ କରାଯାଇଛି। କିନ୍ତୁ ନାଉଗାଁ ବ୍ଲକରେ ଏହି ଯୋଜନା ବାଟବଣା ହୋଇଥିବା ମନେ ହେଉଛି। ଏଠାରେ ଏହି ଯୋଜନାରେ ଶ୍ରମିକ ବଦଳରେ ମେଶିନକୁ କାମରେ ଲଗାଯାଉଛି। ମାତ୍ର ପ୍ରଶାସନ ପକ୍ଷରୁ ଏନେଇ କାର୍ଯ୍ୟାନୁଷ୍ଠାନ ନିଆଯାଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଏମ୍ଜିଏନ୍ଆର୍ଇଜିଏସ୍ର ପୋର୍ଟାଲ ତଥ୍ୟ ଅନୁସାରେ, ୨୦୨୨-୨୩ ଆର୍ଥତ୍କ ବର୍ଷରେ ନାଉଗାଁ ବ୍ଲକରେ ୧୫ ହଜାର ୭୧ ପରିବାର ଜବ୍କାର୍ଡ ପାଇଁ ଆବେଦନ କରିଥିଲେ। ସେଥିରୁ ୧୩ ହଜାର ୯୮୩ ପରିବାରଙ୍କୁ ଜବକାର୍ଡ ଯୋଗାଇ ଦିଆଯାଇଛି। ଏସବୁ ପରିବାର ମଧ୍ୟରେ ୩୪ ହଜାର ୧୩୬ ଜଣ ଶ୍ରମିକ ରହିଛନ୍ତି। ୬ ହଜାର ୫ ପରିବାରର ଆକ୍ଟିଭ ଜବ୍କାର୍ଡ ଥିବାବେଳେ ଉକ୍ତ କାର୍ଡରେ ୯ ହଜାର ୨ ଶହ ୨୮ଟି ଆକ୍ଟିଭ ଶ୍ରମିକ ରହିଛନ୍ତି। ଏହି ଯୋଜନାରେ ଶ୍ରମିକମାନେ କାର୍ଯ୍ୟ କରିବା ପାଇଁ ନିଜ ପଞ୍ଚାୟତରେ ଆବେଦନ କରିବେ। ପ୍ରଶାସନ ପକ୍ଷରୁ ଶ୍ରମିକମାନଙ୍କୁ କାର୍ଯ୍ୟ ଯୋଗାଇ ଦିଆଯିବ। କିନ୍ତୁ ଏହି ବ୍ଲକରେ କେତେଜଣ ଠିକାଦାର ଏହି ନିୟମକୁ ଉଲ୍ଲଂଘନ କରୁଥିବା ଅଭିଯୋଗ ହୋଇଛି। ସେମାନେ କେତେଜଣ ଜବକାର୍ଡଧାରୀ ଶ୍ରମିକଙ୍କୁ ହାତରେ ରଖି ବିଳମ୍ବିତ ରାତିରେ ମେଶିନ ଓ ଟ୍ରାକ୍ଟର ମାଧ୍ୟମରେ ମାଟି କାର୍ଯ୍ୟ କରୁଛନ୍ତି। ଓଷକଣା ଓ ତିରୁଣ ପଞ୍ଚାୟତରେ ଏହାର ଉଦାହରଣ ଦେଖିବାକୁ ମିଳିଛି। ଓଷକଣା ପଞ୍ଚାୟତର ଚଚ୍ଚିକାଇ ଠାକୁରାଣୀ ମନ୍ଦିର ପରିସରରେ ମାଟି ଫିଲିଙ୍ଗ, ନୂଆ ପୋଖରୀ ପୁନରୁଦ୍ଧାର,ତିରୁଣା ପଞ୍ଚାୟତର କୁରିକି ଚନ୍ଦନ ପୋଖରୀର ପୁନରୁଦ୍ଧାର କାର୍ଯ୍ୟରେ ମେଶିନ ଓ ଟ୍ରାକ୍ଟର ବ୍ୟବହାର କରାଯାଉଥିବା ଅଭିଯୋଗ ହୋଇଛି। ଫଳରେ ଅନେକ ଶ୍ରମିକ କାମ ନ ପାଇ ଘରେ ବସିବାକୁ ବାଧ୍ୟ ହେଉଛନ୍ତି। ରାତିରେ ମାଟି କାମ ହେଉଥିବାରୁ ଠିକାଦାର ମାନେ ମନଇଚ୍ଛା ସରକାରୀ ଓ ଗୋଚର ଜମିରୁ ମାଟି ଖୋଳିବାକୁ ପଛାଉ ନାହାନ୍ତି। ଏହି ସବୁ କାର୍ଯ୍ୟ ପ୍ରତି ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
ଏ ସମ୍ପର୍କରେ ବିଡିଓ ରଶ୍ମିରେଖା ମଲିକ କହିଛନ୍ତି, ପ୍ରାୟତଃ କାର୍ଯ୍ୟଗୁଡିକ ଜବକାର୍ଡ ମାଧ୍ୟମରେ ଶ୍ରମିକଙ୍କ ଦ୍ୱାରା କରାଯାଉଛି। ଯେଉଁ ପଞ୍ଚାୟତରେ ମେଶିନ ଦ୍ୱାରା କାର୍ଯ୍ୟ ହେଉଥିବା ଅଭିଯୋଗ ଆସୁଛି, ସେଠାରେ କାର୍ଯ୍ୟ ବନ୍ଦ ରଖାଯାଉଛି।
