ପଟ୍ଟାମୁଣ୍ଡାଇ,୨୨ା୫(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଅଞ୍ଚଳରେ ଦିନକୁଦିନ ବଢ଼ି ଚାଲିଛି ବେଆଇନ ନିଶା କାରବାର। ଏହା ସାଧାରଣ ଜନତାଙ୍କୁ ଅତିଷ୍ଠ କରୁଛି। ବାରମ୍ବାର ଅଭିଯୋଗ ପରେ ମଧ୍ୟ ସୁଧୁରୁନି ଅବସ୍ଥା। ନିଶା କାରବାର ରୋକିବା ପାଇଁ ଅବକାରୀ ବିଭାଗ ରହିଛି। ହେଲେ ପଟ୍ଟାମୁଣ୍ଡାଇରେ ଅବକାରୀ ଥାନା ନିର୍ମାଣ ହେବାଠାରୁ ଆଜିଯାଏଁ ତାହା ଠିକ୍ ଢଙ୍ଗରେ କାମ କରୁନାହିଁ ବୋଲି ଅଭିଯୋଗ ହେଉଛି। ଜିଲା ହେଡ୍କ୍ୱାର୍ଟର୍ସରେ କାର୍ଯ୍ୟ କରୁଥିବା କହୁଥିବା ବେଳେ ପଟ୍ଟାମୁଣ୍ଡାଇ ଅଫିସ ଗୃହରେ ବର୍ଷସାରା ତାଲା ଝୁଲୁଥିବା ଦେଖିବାକୁ ମିଳିଛି। ପଟ୍ଟାମୁଣ୍ଡାଇ ଅବକାରୀ ଥାନା ଅଧୀନରେ ୩୬ଟି ପଞ୍ଚାୟତ ସହ (ପୌରାଞ୍ଚଳର) ୨୦ଟି ଓ୍ବାର୍ଡ ମଧ୍ୟରୁ ମୁଖ୍ୟତଃ ପ୍ରତ୍ୟେକ ଛକ ସ୍ଥାନଗୁଡ଼ିକରେ ପ୍ରତିଦିନ ଦିନ ଦ୍ୱିପ୍ରହରରେ ଖୋଲାରେ ମଧ୍ୟ ଚୋରା ମଦ ବିକ୍ରି ହେଉଛି। ଏହାସହ ତାଳ ଦେଇ ଅନ୍ୟ ନିଶାଔଷଧ ସହଜରେ ହାତପାହାନ୍ତାରେ ମିଳିପାରୁଥିବା କୁହାଯାଉଛି। ପଟ୍ଟାମୁଣ୍ଡାଇ ପୌରାଞ୍ଚଳରେ ବେଆଇନ ନିଶାର ଅବାଧ କାରବାର ଏଭଳି ସ୍ତରକୁ ଗଲାଣି ଯେ, ଏହା କବଳରେ କଲେଜ ଛାତ୍ରଙ୍କଠାରୁ ଆରମ୍ଭ କରି ପ୍ରତ୍ୟେକ ବର୍ଗର ଯୁବକ ନିଶା କବଳରେ କବଳିତ ହୋଇ ନିଜର ଭବିଷ୍ୟତ ନଷ୍ଟ କରିବାରେ ଲାଗିଛନ୍ତି। ନାମକୁମାତ୍ର ଅବକାରୀ ଥାନା ଅଛି, କିନ୍ତୁ କୌଣସି ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଅଭିଯୋଗ ହେଉଛି। ଅବାଧ ବେଆଇନ ନିଶା ବ୍ୟବସାୟ ଏତେ ମାତ୍ରାରେ ବୃଦ୍ଧି ପାଉଛି ଯେ, ସହରାଞ୍ଚଳ ଓ ଗ୍ରାମାଞ୍ଚଳବାସୀ ତ୍ରାହି ତ୍ରାହି ଡାକିଲେଣି। ଯୁବସମାଜଠାରୁ ଆରମ୍ଭ କରି ବୟସ୍କ ବର୍ଗ ଧୀରେ ଧୀରେ ଏହି ନିଶା ସେବନ କରୁଛନ୍ତି। ନିଶା ଯୋଗୁ ହିତାହିତ ଜ୍ଞାନ ଭୁଲି ପ୍ରତ୍ୟେକ ସ୍ଥାନରେ ଆପରାଧିକ ପରିସ୍ଥିତି ସୃଷ୍ଟି କରୁଛନ୍ତି। ପଟ୍ଟାମୁଣ୍ଡାଇ ସହର ମଧ୍ୟରେ ନିଶାସକ୍ତଙ୍କ ଦୌରାତ୍ମ୍ୟ ଏତେ ବୃଦ୍ଧିପାଇଛି ଯେ, ଜନସାଧାରଣ ଦୈନିକ କିଛି ନା କିଛି ଘଟଣାକୁ ପ୍ରତ୍ୟକ୍ଷରେ ହେଉଥିଲେ ମଧ୍ୟ ଭୟରେ ନୀରବ ରହିବାକୁ ବାଧ୍ୟ ହେଉଛନ୍ତି। ପ୍ରତ୍ୟେକ ବ୍ୟକ୍ତି ନିଜର ପିଲାଙ୍କୁ ନେଇ ଚିନ୍ତାରେ ପଡିଲେଣି। ସେମାନଙ୍କ ପିଲା କେତେବେଳେ ନିଶା କବଳିତ ହେବେ ତାକୁ ନେଇ ପିତାମାତା ଘୋର ଚିନ୍ତାରେ ରହୁଛନ୍ତି। ପୂଜା ପାର୍ବଣ ପୂର୍ବରୁ ଜଣେ ୨ଜଣ ଚୋରା ମଦ ବେପାରୀଙ୍କୁ ଧରି ସେମାନଙ୍କ ନଁାରେ ମାମଲା ରୁଜୁ କରାଯାଏ। ଏମିତିକି ଏବେ ପାନ ଦୋକାନଠୁ ଆରମ୍ଭ କରି ଛୋଟ ଛୋଟ ରାଶନ ଦୋକାନରେ ମଧ୍ୟ ଚୋରା ମଦ କାରବାର ବିଶେଷ ମାତ୍ରାରେ ଦେଖିବାକୁ ମିଳୁଛି। ଅନ୍ୟପକ୍ଷେ ପଟ୍ଟାମୁଣ୍ଡାଇରେ ଅବକାରୀ ବିଭାଗର ଅଫିସ ଥାଇ ନ ଥିଲା ପରି ରହିଛି। ଏହି ସମ୍ବେଦନଶୀଳ ଘଟଣା ଉପରେ ବିଭାଗୀୟ କମିଶନର ଦୃଢ଼ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ପଟ୍ଟାମୁଣ୍ଡାଇ ଅବକାରୀ ଇନ୍ସପେକ୍ଟର କମଳ ପାଇକରାୟଙ୍କୁ ପଚାରିବାରେ ହେଡ୍କ୍ୱାର୍ଟରରେ କର୍ମଚାରୀ କମ୍ ଥିବାରୁ ସେଠାରେ କାମ କରିବାକୁ ପଡ଼ୁଛି। ଫଳରେ ପଟ୍ଟାମୁଣ୍ଡାଇ ଅବକାରୀ ଥାନାରେ କେହି ରହିପାରୁନାହାନ୍ତି ବୋଲି ସେ କହିଛନ୍ତି।
