ବରୀ,୧୦।୪(ମହେନ୍ଦ୍ର ସ୍ବାଇଁ): ୨୦୦୦ ମସିହାରୁ ବରୀ ବିଧାନସଭା ନିର୍ବାଚନମଣ୍ଡଳୀରେ କୌଣସି କଂଗ୍ରେସ ପ୍ରାର୍ଥୀ ନିର୍ବାଚନ ଲଢ଼ି ବିଜୟର ସ୍ବାଦ ଚାଖି ନାହାନ୍ତି। ଚଳିତ ନିର୍ବାଚନ ଲାଗି ତାରିଖ ଘୋଷଣା ପରେ ମଧ୍ୟ କଂଗ୍ରେସ ଏହି ନିର୍ବାଚନମଣ୍ଡଳୀରୁ ପ୍ରାର୍ଥୀଙ୍କ ନାମ ଘୋଷଣା କରି ନ ଥିବାରୁ ଦଳୀୟ କର୍ମୀମାନେ ଦ୍ୱନ୍ଦ୍ୱରେ ପଡ଼ିଛନ୍ତି।
୨୦୧୪ ନିର୍ବାଚନରେ ଶାସକ ଦଳ ପ୍ରାର୍ଥୀ ଦେବାଶିଷ ନାୟକ ୫୯, ୮୦୦ ଖଣ୍ଡ ଭୋଟ ପାଇଥିବା ବେଳେ ସ୍ବାଧୀନ ପ୍ରାର୍ଥୀ ଭାବେ ବିଶ୍ୱରଞ୍ଜନ ମଲିକ ୫୨,୬୨୮ ଖଣ୍ଡ, ଭାଜପାର ପ୍ରାର୍ଥୀ ନୀଳମଣି ସାମଲ ୯,୧୮୩ ଖଣ୍ଡ ଓ କଂଗ୍ରେସ ପ୍ରାର୍ଥୀ ଗଗନ ବିହାରୀ ଜେନା ୭,୬୮୨ ଖଣ୍ଡ ଭୋଟ ପାଇଥିଲେ। ସେତେବେଳେ ଶାସକ ଦଳ ପ୍ରାର୍ଥୀ ଦେବାଶିଷ ନାୟକ ୭,୧୭୩ ଖଣ୍ଡ ଭୋଟ ବ୍ୟବଧାନରେ ବିଜୟ ଲାଭ କରିଥିଲେ। କିନ୍ତୁ ୨୦୧୯ରେ ବରୀର ରାଜନୈତିକ ଚିତ୍ର ଓଲଟପାଲଟ ହୋଇଯାଇଥିଲା। ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିବା ବିଶ୍ୱରଞ୍ଜନ ମଲିକ ଭାଜପାରେ ଯୋଗଦେଇ ଶାସକ ଦଳର ପ୍ରାର୍ଥୀ ସୁନନ୍ଦା ଦାସଙ୍କୁ କଡ଼ା ଟକ୍କର ଦେଇ ୪୦୬୨ ଖଣ୍ଡ ଭୋଟ ବ୍ୟବଧାନରେ ପରାଜିତ ହୋଇଥିଲେ। କଂଗ୍ରେସ ପ୍ରାର୍ଥୀ ଉମେଶ ଚନ୍ଦ୍ର ଜେନା ୭୦୮୨ ଖଣ୍ଡ ଭୋଟ ପାଇ ଅମାନତ ହରାଇଥିଲେ। ବର୍ତ୍ତମାନ ସୁଦ୍ଧା କଂଗ୍ରେସ ପ୍ରାର୍ଥୀ ଘୋଷଣା କରି ନ ଥିବା ଏହି ଦଳର ଦୁର୍ବଳତାକୁ ପଦାରେ ପକାଇ ଦେଇଛି।
ଗତଥର କଂଗ୍ରେସ ପ୍ରାର୍ଥୀ ଉମେଶ ଚନ୍ଦ୍ର ଜେନା ଦଳ ଛାଡ଼ିବା ପରେ ଯୁବନେତା ଅମରେଶ ପରିଡ଼ା ତୃଣମୂଳ ସ୍ତରରେ କଂଗ୍ରେସ କର୍ମୀଙ୍କୁ ଏକଜୁଟ କରିଥିଲେ। ଅପରପକ୍ଷରେ ଜିଲା କଂଗ୍ରେସ ନେତ୍ରୀ ଆରତି ଦେଓ, ପ୍ରଦେଶ କଂଗ୍ରେସ କମିଟି ସଦସ୍ୟା କଳ୍ପନା ପଣ୍ଡା, ବରୀ ନିର୍ବାଚନମଣ୍ଡଳୀ ଯୁବ ସଭାପତି, ପୂର୍ବତନ ନୌସେନା ଅଧିକାରୀ ତଥା ବିଶିଷ୍ଟ କଂଗ୍ରେସ ନେତା ନବକିଶୋର ସାମଲଙ୍କ ପୁଅ ଅପୂର୍ବ ସାମଲ ମଧ୍ୟ କଂଗ୍ରେସ ଟିକେଟ ଦୌଡ଼ରେ ରହିଛନ୍ତି। ଦଳ ଡିଆଁ ରାଜନୀତି ଚାଲିଥିବାରୁ ମୂଳ କଂଗ୍ରେସ ପରିବାରରୁ ଦଳରେ ଦୀର୍ଘ ଦିନ ଧରି କାର୍ଯ୍ୟ କରିଥିବା ବ୍ୟକ୍ତିଙ୍କୁ ପ୍ରାର୍ଥୀ କରାଯିବାକୁ ଆଶାୟୀ ପ୍ରାର୍ଥୀ କଳ୍ପନା ପଣ୍ଡା ମତ ରଖିଛନ୍ତି। ସେହିପରି କଂଗ୍ରେସ ଏକ ଶୃଙ୍ଖଳିତ ଦଳ, ଆମେ ଶୃଙ୍ଖଳାରେ ବିଶ୍ୱାସ କରୁ। ଆମ ଦଳ ଯାହାକୁ ପ୍ରାର୍ଥୀ ଘୋଷଣା କରିବ ଆମେ ସମସ୍ତେ ଦଳୀୟ ପ୍ରାର୍ଥୀଙ୍କ ବିଜୟ ଲାଭ କରିବା କ୍ଷେତ୍ରରେ ସହଯୋଗ କରିବୁ ବୋଲି ଯୁବ ସମାଜସେବୀ ଅପୂର୍ବ ସାମଲ, ନାରୀ ନେତ୍ରୀ ଆରତୀ ଦେଓ ଓ ଇଞ୍ଜିନିୟର ଅମରେଶ ପରିଡ଼ା କହିଛନ୍ତି।
