ଆଳି, ୮ା୧୧(ଡି.ଏନ.ଏ.): କେନ୍ଦ୍ରାପଡ଼ା ଜିଲା ଆଳି ବ୍ଲକର ଉପାନ୍ତରେ ଏକମାଣିଆ ପଞ୍ଚାୟତ ରହିଛି। ଏହାର ଚତୁଃପାର୍ଶ୍ୱକୁ ଖରସ୍ରୋତା ଓ ବ୍ରାହ୍ମଣୀ ନଦୀ ଘେରି ରହିଛି। ଫଳରେ ସେମାନେ ବାହ୍ୟ ଜଗତରୁ ବିଚ୍ଛିନ୍ନ ହୋଇ ଅବହେଳିତ ଅବସ୍ଥାରେ ଜୀବନ ବିତାଉଛନ୍ତି। ଅଞ୍ଚଳବାସୀ ସେତୁ ନିର୍ମାଣ ନିମନ୍ତେ ବାରମ୍ବାର ସରକାରଙ୍କ ନିକଟରେ ଗୁହାରି କରିବା ପରେ ୨୦୧୬ ନଭେମ୍ବର ୮ରେ କେରଡ଼ାଗଡ଼ଠାରୁ ଏକମାଣିଆ ପର୍ଯ୍ୟନ୍ତ ଏକ ସେତୁ ନିର୍ମାଣ କରିବାକୁ ଭିତ୍ତିପ୍ରସ୍ତର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ଥାପନ କରିଥିଲେ। ଇତିମଧ୍ୟରେ ଭିତ୍ତିପ୍ରସ୍ତର ସ୍ଥାପନକୁ ୫ ବର୍ଷ ପୂରି ଗଲାଣି। କିନ୍ତୁ ସେତୁ ପାଇଁ ବାଲି ମୁଠାଏ ବି ପଡ଼ିନାହିଁ। ଫଳରେ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଉଛି।
୨୦୧୭ରେ ରାଜ୍ୟ ସରକାର ଏକମାଣିଆକୁ ନୂତନ ପଞ୍ଚାୟତର ମାନ୍ୟତା ଦେଇଥିଲେ। ନୂତନ ପଞ୍ଚାୟତ ମାନ୍ୟତା ଦେଇଥିଲେ ସତ, କିନ୍ତୁ ବିକାଶମୂଳକ କାର୍ଯ୍ୟ ପ୍ରତି ଦୃଷ୍ଟି ଦେଇନାହାନ୍ତି। ଏକମାଣିଆ, ନଳପାହି ଓ ଦକ୍ଷିଣଡିହା ଆଦି ୩ ଗ୍ରାମକୁ ନେଇ ଗଠିତ ପଞ୍ଚାୟତରେ ପ୍ରାୟ ୫ ହଜାରରୁ ଊର୍ଦ୍ଧ୍ୱ ଲୋକ ବସବାସ କରିଥାନ୍ତି। କିନ୍ତୁ ସେମାନଙ୍କ ଦୁଃଖ କହିଲେ ନ ସରେ। ସେମାନେ ଆଜି ପର୍ଯ୍ୟନ୍ତ ନିଜର ମୌଳିକ ଅଧିକାର ପାଇବାରୁ ବଞ୍ଚତ୍ତ ହୋଇ ରହିଛନ୍ତି। ଅଞ୍ଚଳର ଲୋକମାନେ ଘରୁ ଗୋଡ଼ କାଢ଼ି ବାହାରକୁ ଯିବାକୁ ଚାହିଁଲେ ଡଙ୍ଗାର ଆବଶ୍ୟକତା ପଡ଼ିଥାଏ। ରୋଗୀଙ୍କୁ ଚିକିତ୍ସା ନିମନ୍ତେ ଭରା ନଦୀରେ ଡଙ୍ଗି ସାହାଯ୍ୟରେ ଡାକ୍ତରଖାନା ନେବାକୁ ପଡିଥାଏ। ପଞ୍ଚାୟତର ଗୋଟିଏ ପାର୍ଶ୍ୱରେ ଆଳି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ଅନ୍ୟ ପାର୍ଶ୍ୱରେ ରାଜନଗର ସ୍ବାସ୍ଥ୍ୟକେନ୍ଦ୍ର ରହିଛି। କିନ୍ତୁ ଏଠାକୁ ଆମ୍ବୁଲାନ୍ସ ସେବା ସ୍ବପ୍ନ ପାଲଟିଛି। ଏପରି କି ଅଗ୍ନିକାଣ୍ଡ ଘଟିଲେ ଦମକଳ ଗାଡି ମଧ୍ୟ ଯିବା ଅସମ୍ଭବ। ଏହି ସେତୁ ନିର୍ମାଣ କରାଗଲେ ପଞ୍ଚାୟତବାସୀ ଉପକୃତ ହୋଇପାରିବେ ବୋଲି ଏକମାଣିଆ ସରପଞ୍ଚ ଗୀତାଞ୍ଜଳି ମଲିକ, ଅନନ୍ତ କରଣ, ବିଚିତ୍ର କରଣ ପ୍ରମୁଖ କହିଛନ୍ତି।
