ନୂଆଦିଲ୍ଲୀ,୬।୧୦: ଭାରତୀୟ କ୍ରିକେଟ ଦଳ ଗୁରୁବାର ସକାଳେ ଟି-୨୦ ବିଶ୍ୱକପ୍ ଖେଳିବା ପାଇଁ ଅଷ୍ଟ୍ରେଲିଆ ଗସ୍ତରେ ଯାଇଛି। ସୋସିଆଲ ମିଡିଆରେ ଫଟୋ ଶେୟାର କରି ବିସିସିଆଇ ଏ ବିଷୟରେ ସୂଚନା ଦେଇଛି। ରୋହିତ ଶର୍ମାଙ୍କ ନେତୃତ୍ୱରେ ଭାରତ ଦ୍ୱିତୀୟ ଥର ପାଇଁ ଟି -୨୦ ବିଶ୍ୱକପ ଟାଇଟଲ ଜିତିବାକୁ ଚାହୁଁଛି। ରୋହିତ ପ୍ରଥମ ଥର ପାଇଁ ଆଇସିସି ଟୁର୍ନାମେଣ୍ଟରେ ଅଧିନାୟକତ୍ୱ କରୁଛନ୍ତି, କିନ୍ତୁ ଆଇପିଏଲରେ ତାଙ୍କର ଅନେକ ଅଧିନାୟକତ୍ୱ ଅଭିଜ୍ଞତା ରହିଛି ଏବଂ ତାଙ୍କର ରେକର୍ଡ ମଧ୍ୟ ଭଲ। ୨୦୦୭ରେ ଭାରତ ପ୍ରଥମ ଟି-୨୦ ବିଶ୍ୱକପ ଜିତିଥିଲା। ସେବେଠାରୁ ଭାରତ ଏହି ଟୁର୍ନାମେଣ୍ଟ ଜିତିବାରେ ସକ୍ଷମ ହୋଇ ନାହିଁ। ଦୁଇଥର ଟି -୨୦ ବିଶ୍ୱକପ ଜିତିଥିବା ୱେଷ୍ଟଇଣ୍ଡିଜ ହେଉଛି ଏକମାତ୍ର ଦଳ। ଏଥର ଭାରତ ମଧ୍ୟ ଏହି ସ୍ବତନ୍ତ୍ର କ୍ଲବରେ ସ୍ଥାନ ପାଇବାକୁ ଚେଷ୍ଟା କରିବ।
ବିସିସିଆଇ ପରେ ଅନେକ ଖେଳାଳି ମଧ୍ୟ ସେମାନଙ୍କର ଫଟୋ ଶେୟାର କରିଥିଲେ। ବର୍ତ୍ତମାନ ଭାରତୀୟ ଖେଳାଳିମାନେ ଅଭ୍ୟାସ ଆରମ୍ଭ କରିବେ ଏବଂ ଅଷ୍ଟ୍ରେଲିଆ ବାତାବରଣରେ ଅଭ୍ୟସ୍ତ ହେବାକୁ ଚେଷ୍ଟା କରିବେ। ଏଠାରେ ଥିବା ପିଚଗୁଡିକରେ ବହୁତ ବାଉନ୍ସ ଏବଂ ସ୍ପିଡ ଅଛି, ଯାହା ପରଖିବା କଷ୍ଟକର।
ଟି-୨୦ବିଶ୍ୱକପ ପୂର୍ବରୁ ଭାରତ ଘରୋଇ ସିରିଜରେ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକାକୁ ପରାସ୍ତ କରିଛି। ଏଭଳି ପରିସ୍ଥିତିରେ ଭାରତୀୟ ଖେଳାଳିଙ୍କ ଆତ୍ମବିଶ୍ୱାସ ବହୁତ ଭଲ ରହିଛି। ତେବେ ଭାରତର ଅନେକ ସମସ୍ୟା ରହିଛି। ଏଥିରେ ଡେଥ୍ ଓଭରର ବୋଲିଂ ସବୁଠାରୁ ଗୁରୁତ୍ୱପୂର୍ଣ୍ଣ ଅଟେ।
