ଆନନ୍ଦପୁର,୧୬।୫(ସ୍ବ.ପ୍ର.): ସ୍ତ୍ରୀଙ୍କୁ ପନିକିରେ ହାଣିବାରୁ ସ୍ବାମୀଙ୍କୁ ଗିରଫ କରିଛି ପୋଲିସ। ଏଭଳି ଘଟଣା ଆନନ୍ଦପୁର ଥାନା ଖଡିପାଳ ଗ୍ରାମରେ ଚର୍ଚ୍ଚାର ବିଷୟ ପାଲଟିଛି। ଏହି ଘଟଣାରେ ସ୍ବାମୀଙ୍କୁୁ ପୋଲିସ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି। ଗିରଫ ସ୍ବାମୀ ଘସିପୁରା ଥାନା ଗୋହିରା ଗ୍ରାମର କମଳାକାନ୍ତ ନାଏକଙ୍କ ପୁଅ କ୍ଷୀରୋଦ ନାଏକ।
ସୂଚନାଯୋଗ୍ୟ, ଗୋହିରା ଗ୍ରାମର କ୍ଷୀରୋଦ ଘରଜ୍ୱାଇଁ ଭାବେ ଆନନ୍ଦପୁର ଥାନା ଖଡିପାଳ ଗ୍ରାମରେ ରହି ଆସୁଥିଲେ। ସବୁ ସମୟରେ ନିଶାଶକ୍ତ ଅବସ୍ଥାରେ ରହୁଥିବା କ୍ଷୀରୋଦ ପ୍ରାୟ ସମୟରେ ନିଜର ଶ୍ୱଶୁର ଘର ଲୋକ ଓ ସ୍ତ୍ରୀ ଲକ୍ଷ୍ମୀଙ୍କ ସହିତ ସବୁବେଳେ କଳିଝଗଡା କରୁଥିଲେ। ରବିବାର ବିଳମ୍ବିତ ରାତିରେ ଖଡିପାଳ ଗ୍ରାମରେ ଅଷ୍ଟପ୍ରହରୀ ନାମ ଯଜ୍ଞ ଚାଲିଥିବା ସମୟରେ କ୍ଷୀରୋଦଙ୍କର ଗ୍ରାମର କେତେକ ଲୋକଙ୍କ ସହିତ ପାଟିତୁଣ୍ଡ ହୋଇଥିଲା। ଲୋକେ ତାଗିଦ କରିବାରୁ ସେ ଘରକୁ ପଳାଇ ଆସିଥିଲେ। ଘରେ ପହଞ୍ଚିି ଲକ୍ଷ୍ମୀଙ୍କ ସହିତ ପାଟିତୁଣ୍ଡ କରିଥିଲେ। ଝଗଡା ଅଧିକ ହେବାରୁ ଉତ୍ୟକ୍ତ ହୋଇ ଏକ ପନିକୀ ସାହାଯ୍ୟରେ ଲକ୍ଷ୍ମୀଙ୍କ ବେକକୁ ହାଣି ଦେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ। ପରିବାର ଲୋକେ ଲକ୍ଷ୍ମୀଙ୍କୁ ଗୁରୁତର ଅବସ୍ଥାରେ ପ୍ରଥମେ ଆନନ୍ଦପୁର ମୁଖ୍ୟ ଚିକିତ୍ସାଳୟ ନେଇଥିଲେ। ପରେ ତାଙ୍କ ସ୍ଥିତି ଗମ୍ଭୀର ହେବାରୁ କଟକକୁ ସ୍ଥାନାନ୍ତର କରାଯାଇଥିଲା।
ଘଟଣାକୁ ନେଇ ଆନନ୍ଦପୁର ଥାନାରେ ଅଭିଯୋଗ ହେବା ପରେ ପୋଲିସ କେସ୍ ନମ୍ବର ୯୮/୨୩ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପୋଲିସ ଅଭିଯୁକ୍ତ ସ୍ବାମୀ କ୍ଷୀରୋଦକୁ ମଙ୍ଗଳବାର ଗିରଫ କରି କୋର୍ଟ ଚାଲାଣ କରିଛି।
