ନୂଆଦିଲ୍ଲୀ, ୧୧।୫(ପି.ଟି.)-
ଭାରତର ଟିନ୍ ବ୍ୟାଟିଂ ସେନ୍ସେସନ ଶେଫାଳି ବର୍ମା ‘ଦି ହଣ୍ଡ୍ରେଡ’ ଟୁର୍ନାମେଣ୍ଟର ଉଦ୍ଘାଟନୀ ସଂସ୍କରଣରେ ବର୍ମିଂହାମ ଫୋଏନିକ୍ସ ପକ୍ଷରୁ ଖେଳିବେ। ଏହା ବ୍ୟତୀତ ଚଳିତ ବର୍ଷ ଶେଷଭାଗରେ ହେବାକୁଥିବା ମହିଳା ବିଗ୍ବାଶ୍ ଲିଗ୍ରେ ସେ ସିଡ୍ନୀ ଫ୍ରାଞ୍ଚାଇଜ୍ ପକ୍ଷରୁ ପ୍ରତିନିଧିତ୍ୱ କରିବା ସମ୍ଭାବନା ରହିଛି। ୧୭ ବର୍ଷୀୟା ଶେଫାଳି ସମ୍ପ୍ରତି ଆଇସିସି ମହିଳା ଟି୨୦ ର଼୍ୟାଙ୍କିଙ୍ଗ୍ର ନମ୍ବରଓ୍ବାନ ସ୍ଥାନରେ ଅଛନ୍ତି। ତାଙ୍କ ବ୍ୟତୀତ ୧୦୦ ବଲ୍ ଟୁର୍ନାମେଣ୍ଟରେ ଭାରତୀୟ ଅଧିନାୟିକା ହରମନପ୍ରୀତ କୌର, ଉପଅଧିନାୟିକା ସ୍ମୃତି ମନ୍ଧାନା, ଜେମିମା ରୋଡ୍ରିଗ୍ବେଜ ଓ ଦୀପ୍ତି ଶର୍ମା ଖେଳିବେ। ଏହି ପ୍ରତିଯୋଗିତା ୮ଟି ଲେଖାଏ ମହିଳା ଓ ପୁରୁଷ ଦଳକୁ ନେଇ ଅନୁଷ୍ଠିତ ହେବ। ”ବର୍ମିଂହାମ ପ୍ରାଞ୍ଚାଇଜ୍ ଶେଫାଳିଙ୍କୁ ନେବା ପାଇଁ ଚାହିଁଲା ପରେ ଚୁକ୍ତି ପ୍ରାୟତଃ ଶେଷ ହୋଇଛି। ସେ ଦଳରେ ନ୍ୟୁଜିଲାଣ୍ଡର ସୋଫି ଡେଭିନଙ୍କ ସ୍ଥାନ ନେବେ“ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଏକ ସୂତ୍ରରୁ ପ୍ରକାଶ। ସେ ମହିଳା ବିଗ୍ବାଶ୍ ଲିଗ୍ରେ ଖେଳିବାନେଇ ମଧ୍ୟ ଆଲୋଚନା ଚାଲିଛି ବୋଲି କୁହାଯାଇଛି।
କୋଭିଡ୍-୧୯ ମହାମାରୀ ଯୋଗୁ ଗତବର୍ଷ ବନ୍ଦ ରହିଥିବା ‘ଦି ହଣ୍ଡ୍ରେଡ’ ଟୁର୍ନାମେଣ୍ଟ ଚଳିତ ବର୍ଷ ଜୁଲାଇ ୨୧ରୁ ଆରମ୍ଭ ହେବା କାର୍ଯ୍ୟକ୍ରମ ରହିଛି। ଲଣ୍ଡନରେ ଦି ଓଭାଲ ଇନ୍ଭିନ୍ସବଲ୍ସ ଏବଂ ମାଞ୍ଚେଷ୍ଟର ଓରିଜିନାଲ୍ସ ମଧ୍ୟରେ ଉଦ୍ଘାଟନୀ ମ୍ୟାଚ ଅନୁଷ୍ଠିତ ହେବ। ଶେଫାଳିଙ୍କ ପାଇଁ ବିଦେଶରେ ଏହା ହେବ ପ୍ରଥମ ଟି୨୦ ପ୍ରତିଯୋଗିତା। ସମ୍ପ୍ରତି ବିଶ୍ୱ କ୍ରିକେଟରେ ପାଓ୍ବାରଫୁଲ୍ ଷ୍ଟ୍ରାଇକରଭାବେ ବିଶେଷ ପରିଚିତ ଶେଫାଳି ୨୨ଟି ଅନ୍ତର୍ଜାତୀୟ ମ୍ୟାଚରେ ୧୪୮.୩୧ ଷ୍ଟ୍ରାଇକ୍ରେଟ୍ରେ ୬୧୭ ରନ ସଂଗ୍ରହ କରିଛନ୍ତି। ଭାରତୀୟ ମହିଳା କ୍ରିକେଟ ଦଳର ମୁଖ୍ୟ କୋଚ୍ ଚୟନ ଚଳିତ ସପ୍ତାହରେ ଅନୁଷ୍ଠିତ ହେବ। ମଦନ ଲାଲଙ୍କ ନେତୃତ୍ୱାଧୀନ ପରାମର୍ଶଦାତା କମିଟି ଏହି ଦାୟିତ୍ୱ ସମ୍ପନ୍ନ କରିବ। ବର୍ତ୍ତମାନର କୋଚ୍ ଡବ୍ଲ୍ୟୁଭି ରମଣଙ୍କ ସମେତ ମୋଟ ୩୫ ଜଣ ଏହି ପଦ ପାଇଁ ଆବେଦନ କରିଛନ୍ତି। ଏହା ମଧ୍ୟରେ ୫ ମହିଳା ସାମିଲ ଅଛନ୍ତି। ସେମାନେ ହେଲେ ପୂର୍ବତନ ଚୟନ କମିଟି ମୁଖ୍ୟ ହେମଲତା କାଲା, ମମତା ମାବେନ, ଜୟା ଶର୍ମା, ସୁମନ ଶର୍ମା ଓ ନୁଶିନ ଅଲ୍ ଖାଦିର। ସେହିପରି ପୂର୍ବତନ କୋଚ୍ ରମେଶ ପାଓ୍ବାର ଓ ତୁଷାର ଆରୋଥେ ମଧ୍ୟ ଏହି ଦୌଡ଼ରେ ସାମିଲ ଅଛନ୍ତି।
