କଟକ ଅଫିସ,୧୨।୧୨: ସମ୍ବଲପୁର ହୀରାକୁଦ ଡ୍ୟାମର ଜଣେ ପୂର୍ବତନ କର୍ମଚାରୀଙ୍କ ଆକାଉଣ୍ଟ ଦୀର୍ଘ ବର୍ଷ ଧରି ସେଟେଲମେଣ୍ଟ ହୋଇ ନ ଥିବା ଘଟଣାରେ ହାଇକୋର୍ଟ କ୍ଷୁବ୍ଧ ହୋଇଛନ୍ତି। ମାମଲାର ପରବର୍ତ୍ତୀ ଶୁଣାଣି ଅର୍ଥାତ ୨୧।୧୨।୨୦୨୦ ପୂର୍ବରୁ ଆକାଉଣ୍ଟ ସେଟେଲମେଣ୍ଟ କରା ନ ଗଲେ ଅର୍ଥ ଓ ଆଇନ ବିଭାଗ ସଚିବଙ୍କ ଦରମା ବନ୍ଦ କରାଯିବ ବୋଲି ଶୁକ୍ରବାର ଜଷ୍ଟିସ ସଞ୍ଜୁ ପଣ୍ଡା ଓ ଜଷ୍ଟିସ ଏସ୍. କେ. ପାଣିଗ୍ରାହୀଙ୍କ ଦ୍ୱାରା ଗଠିତ ଖଣ୍ଡପୀଠ କହିଛନ୍ତି ।
ପ୍ରକାଶ ଯେ, ମିଥୁରାମ ଭୋଇ ହୀରାକୁଦ ଡ୍ୟାମରେ ୩୭ବର୍ଷ ଧରି ଜଣେ ୱାର୍କ ଚାର୍ଜ କର୍ମଚାରୀ ଭାବେ କାମ କରି ଚାକିରିରୁ ୩୦।୬।୧୯୯୮ରେ ଅବସର ନେଇଥିଲେ। ବର୍ତ୍ତମାନ ତାଙ୍କୁ ୮୪ ବର୍ଷ ବୟସ। ୨୦୧୫ରେ ସେ ଓଡ଼ିଶା ପ୍ରଶାସନିକ ଟ୍ରିବ୍ୟୁନାଲଙ୍କ ଆଶ୍ରୟ ନେଇଥିଲେ। ଟ୍ରିବ୍ୟୁନାଲ ୮।୯।୨୦୧୫ରେ ମାମଲାର ଶୁଣାଣି କରିଥିଲେ। ଟ୍ରିବ୍ୟୁନାଲ ମିଥୁରାମଙ୍କୁ ଅତି କମ୍ରେ ଗୋଟିଏ ଦିନ ପାଇଁ କାମରେ ନିୟମିତ କରାଇ ସର୍ବନିମ୍ନ ଦରମା ସହ ପେନ୍ସନ୍ ଓ ଏରିୟର ଦେବା ପାଇଁ ଜଳ ସମ୍ପଦ ବିଭାଗକୁ ନିର୍ଦ୍ଦେଶ ଦେଇଥିଲେ। ତେବେ ଏହି ନିର୍ଦ୍ଦେଶକୁ ଚ୍ୟାଲେଞ୍ଜ କରି ଜଳସମ୍ପଦ ବିଭାଗ ତରଫରୁ ଏକ ରିଟ୍ ପିଟିଶନ(ଡବ୍ଳ୍ୟୁପିସି ୯୦୯୯/୧୬) ହାଇକୋର୍ଟରେ ଦାଖଲ କରାଯାଇଥିଲା। ୧୨।୧୨।୨୦୧୯ରେ ପୂର୍ବତନ ମୁଖ୍ୟ ବିଚାରପତି ଜଷ୍ଟିସ କେ.ଏସ୍. ଜାଭେରୀ ଓ ଜଷ୍ଟିସ କେ. ଆର୍ ମହାପାତ୍ରଙ୍କ ଦ୍ୱାରା ଗଠିତ ଖଣ୍ଡପୀଠ ମାମଲାର ଶେଷ ଶୁଣାଣି କରିଥିଲେ। ଅଦାଲତ ଆବେଦନକାରୀ(ଅଧୀକ୍ଷଣ ଯନ୍ତ୍ରୀ ହୀରାକୁଦ ଡ୍ୟାମ, ବୁର୍ଲା ଓ ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ)ଙ୍କୁ ମିଥୁରାମଙ୍କ ଆକାଉଣ୍ଟ ସେଟେଲମେଣ୍ଟ ପାଇଁ ଦୁଇଟି ପର୍ଯ୍ୟାୟରେ ଶେଷ କରିବାକୁ ନିର୍ଦ୍ଦେଶ ଦେଇଥିଲେ। ମିଥୁରାମଙ୍କୁ ଚତୁର୍ଥ ଶ୍ରେଣୀ କର୍ମଚାରୀ ଭାବେ ଯେକୌଣସି ପଦବୀରେ ସ୍ଥାନିତ କରି ଦରମା ସହ ପେନ୍ସନ୍ ଓ ଏରିୟର ଦେବାକୁ ନିର୍ଦ୍ଦେଶ ଦେଇଥିଲେ। ଏପରି କି ଏହାକୁ ୧।୨।୨୦୨୦ ପୂର୍ବରୁ ଆକ୍ଚୁଆଲ ପେନ୍ସନ୍ ଓ ୧୦।୪।୨୦୨୦ ପୂର୍ବରୁ ଏରିୟର ପ୍ରଦାନ କରିବାକୁ କହିଥିଲେ। କିନ୍ତୁ କୋର୍ଟଙ୍କ ଆଦେଶକୁ ସରକାରୀସ୍ତରରେ ଅବମାନନା କରାଯାଇଥିଲା । ୨୮।୯।୨୦୨୦ରେ ମିଥୁରାମ ଏକ ଅଦାଲତ ଅବମାନନା ମାମଲା ହାଇକୋର୍ଟରେ ଫାଇଲ କରିଥିଲେ। ୨୩।୧୧।୨୦ରେ ମାମଲାର ଶୁଣାଣି କରି ମାନ୍ୟବର ଅଦାଲତ ସରକାରୀ ଓକିଲଙ୍କୁ ଅବମାନନାର କାରଣ ୮ ଡିସେମ୍ବର ପୂର୍ବରୁ ଜଣାଇବାକୁ ନିର୍ଦ୍ଦେଶ ଦେଇଥିଲେ ା ୭।୧୨।୨୦ରେ ପ୍ରତିପକ୍ଷ ତରଫରୁ ଏକ କାରଣ ଦର୍ଶାଅ ସତ୍ୟପାଠ ଦାଖଲ କରାଯାଇ ଅର୍ଥ ଓ ଆଇନ ବିଭାଗର ସହମତିରେ ଏହାକୁ ବିଚାର କରାଯାଉଥିବାରୁ ବିଳମ୍ବ ହେଉଥିବା ଦର୍ଶାଯାଇଥିଲା। ଶୁକ୍ରବାର ଶୁଣାଣିରେ ଅଦାଲତଙ୍କୁ ପ୍ରତିପକ୍ଷ ଆଉ ଅଧିକ ୩ମାସ ସମୟ ମାଗିଥିଲେ ା କିନ୍ତୁ ପୂର୍ବ ନିର୍ଦ୍ଦେଶକୁ ଏକ ବର୍ଷ ବିତିଥିଲେ ସୁଦ୍ଧା ଅଦାଲତ ନିର୍ଦ୍ଦେଶ କାର୍ଯ୍ୟକାରୀ କରାଯାଇ ନ ଥିବାରୁ ଆସନ୍ତା ୨୧ତାରିଖ ପୂର୍ବରୁ ମିଥୁରାମଙ୍କ ଆକାଉଣ୍ଟ ସେଟେଲ କରିବାକୁ କୁହାଯାଇଛି। ନଚେତ ଆଇନ ଓ ଅର୍ଥ ବିଭାଗ ସଚିବଙ୍କ ଦରମା ବନ୍ଦ କରାଯିବ ବୋଲି କୋର୍ଟ ଆଦେଶ ଦେଇଛନ୍ତି ।
