ବରଗଡ଼,୨୩।୪(ପ୍ରେମାନନ୍ଦ ଖମାରୀ): ତାପମାତ୍ରା ଥମିବାର ନଁା ନେଉ ନାହିଁ। ବରଗଡ଼ ଜିଲାରେ ଦିନକୁଦିନ ତାପମାତ୍ରା ବଢ଼ି ଚାଲିଛି। ତାତି ସାଙ୍ଗକୁ ଗୁଳୁଗୁଳି, ଗ୍ରୀଷ୍ମ ପ୍ରବାହ ଜନଜୀବନକୁ ଆହୁରି ଦହଗଞ୍ଜ କରିପକାଉଛି। ସକାଳୁ ସନ୍ଧ୍ୟା ପର୍ଯ୍ୟନ୍ତ ଏହାର ପ୍ରଭାବ ଲାଗି ରହୁଛି। ରାତିରେ ମଧ୍ୟ ଗୁଳୁଗୁଳିରୁ ନିସ୍ତାର ମିଳୁ ନାହିଁ। ବିଭିନ୍ନ ସମୟରେ ବିଦ୍ୟୁତ୍ କାଟ୍ ଆହୁରି ଅସ୍ତବ୍ୟସ୍ତ କରିପକାଉଛି। ଅନ୍ୟପଟେ ଗ୍ରୀଷ୍ମ ମୁକାବିଲା ପାଇଁ ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଇଥିବା କୁହାଯାଉଥିଲେ ସୁଦ୍ଧା ତାହା ଧର୍ମକୁ ଆଖିଠାର ଭଳି ହୋଇଥିବା ପରିଲକ୍ଷିତ ହେଉଛି।
ତାତି ବୃଦ୍ଧି ଯୋଗୁ ଗ୍ରାମାଞ୍ଚଳଠାରୁ ସହରାଞ୍ଚଳ ପର୍ଯ୍ୟନ୍ତ ଲୋକଙ୍କ ଦୁର୍ଦ୍ଦଶା ବଢ଼ି ଚାଲିଛି। ସହରାଞ୍ଚଳରେ ଏହି ସମସ୍ୟା ଅଧିକ ରହିଛି। ତାତି ସମୟରେ ଲୋକେ ପୂର୍ବରୁ ରାସ୍ତାପାର୍ଶ୍ୱ ଦୋକାନ ବାରଣ୍ଡାରେ ଆଶ୍ରୟ ନେଇ କିଛି ସମୟ ବିତାଉଥିଲେ। ମାତ୍ର ଜବରଦଖଲ ଉଚ୍ଛେଦ ଯୋଗୁ ସେଭଳି ଅନେକ ଦୋକାନ ଗୃହକୁ ହଟାଇଦେଇଛି। କେବଳ ସେତିକି ନୁହେଁ, ତାତି ସମୟରେ ଲୋକଙ୍କୁ ଛାଇ ଦେଉଥିବା ରାସ୍ତାପାର୍ଶ୍ୱ ସମେତ ବିଭିନ୍ନ ସ୍ଥାନରେ ଦୀର୍ଘଦିନରୁ ରହିଥିବା ଗଛଗୁଡ଼ିକ ମଧ୍ୟ ଆଉ ନାହିଁ। ଫଳରେ ଏବେ ଟାଣଖରାରେ ଆଶ୍ରୟ ନେବା ପାଇଁ ଲୋକଙ୍କୁ ବହୁ ହଟହଟା ହେବାକୁ ପଡୁଛି।
ଫଳରେ ଏବେ ତାତିରୁ ମୁକ୍ତି ପାଇଁ ମୁଣ୍ଡ ଗୁଞ୍ଜିବାକୁ ପଥଚାରୀମାନଙ୍କୁ ବାର ଶୁଣ୍ଢୀପିଣ୍ଡା ହେବାକୁ ପଡୁଛି। ସେହିପରି ରାସ୍ତାଘାଟରେ ରହିଥିବା ଅସ୍ଥାୟୀ ବସ୍ଷ୍ଟପ୍, ଅଟୋ ଷ୍ଟାଣ୍ଡଗୁଡ଼ିକରେ ଯାତ୍ରୀମାନଙ୍କୁ ମଧ୍ୟ ଖରାତାତି ସହିତ ବସ୍, ଅଟୋ ଆଦିକୁ ଦୀର୍ଘ ସମୟ ଧରି ଅପେକ୍ଷା କରିବାକୁ ପଡୁଛି। ବରଗଡ଼ ସହର ସମେତ ଜିଲାର ବିଭିନ୍ନ ସ୍ଥାନରେ ଲୋକେ ଏଭଳି ଦୁର୍ଦ୍ଦଶାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି। ମାତ୍ର ଏଭଳି ସ୍ଥାନରେ କେଉଁଠି ମଧ୍ୟ ରାସ୍ତାପାର୍ଶ୍ୱରେ ଗ୍ରୀଷ୍ମ ମୁକାବିଲା ପାଇଁ ଆଶ୍ରୟସ୍ଥଳୀ ଖୋଲାଯାଇଥିବା ଦେଖିବାକୁ ମିଳୁ ନାହିଁ ଏବଂ ପଥଚାରୀଙ୍କଠାରୁ ଆରମ୍ଭ କରି ଯାତ୍ରୀଙ୍କ ପର୍ଯ୍ୟନ୍ତ ସମସ୍ତଙ୍କୁ ହଟହଟା ହେବାକୁ ପଡୁଛି।
ସେହିପରି ରାସ୍ତାଘାଟ କିମ୍ବା ଜନବହୁଳ ସ୍ଥାନରେ ପର୍ଯ୍ୟାପ୍ତ ପାନୀୟଜଳ ବ୍ୟବସ୍ଥା ମଧ୍ୟ ରହିଥିବା ଦେଖିବାକୁ ମିଳୁନାହିଁ। କାଁ ଭାଁ କେଉଁଠି ଜଳଛତ୍ର ଖୋଲାଯାଇଥିଲେ ମଧ୍ୟ ତାହା ପର୍ଯ୍ୟାପ୍ତ ନୁହେଁ। ଅନ୍ୟପଟେ ବିଭିନ୍ନ ଅନୁଷ୍ଠାନ ପକ୍ଷରୁ ରାସ୍ତାପାର୍ଶ୍ୱରେ ଥଣ୍ଡା ପାନୀୟ, ସରବତ ଆଦି ବଣ୍ଟନ କରାଯାଉଛି। ତେବେ ପର୍ଯ୍ୟାପ୍ତ ଜଳଛତ୍ର ନ ଥିବାରୁ ବାଟେଘାଟେ ଲୋକେ ରାସ୍ତାପାର୍ଶ୍ୱ ଦୋକାନରୁ ପାଣି, ସରବତ କିଣି ପିଉଥିବା ପରିଲକ୍ଷିତ ହେଉଛି। ଏହାସହିତ ଫୁଟ୍ପାଥ୍ରୁ ତରଭୁଜ କିଣି ଖାଇବା ସହିତ ପଇଡ଼ ପାଣି ପିଉଥିବା ଦେଖିବାକୁ ମିଳୁଛି। ତେବେ ତାତି ଯେଭଳି ବଢ଼ି ଚାଲିଛି, ତୁରନ୍ତ ପଥଚାରୀଙ୍କ ପାଇଁ ଅସ୍ଥାୟୀ ଆଶ୍ରୟସ୍ଥଳୀ ନିର୍ମାଣ ସହିତ ପର୍ଯ୍ୟାପ୍ତ ଜଳଛତ୍ର ଖୋଲା ନଗଲେ ଲୋକଙ୍କ ଏହି ଦୁର୍ଦ୍ଦଶା ଆହୁରି ବଢ଼ିବା ସହିତ ଲୋକେ ଅଂଶୁଘାତର ସମ୍ମୁଖୀନ ହେବାର ମଧ୍ୟ ଆଶଙ୍କା ରହିଛି।
Dharitri – Odisha’s No.1 Odia Daily
