ନୂଆଦିଲ୍ଲୀ, ୨୪ା୩(ପି.ଟି.):ମୁସଲମାନଙ୍କ ମଧ୍ୟରେ ବହୁବିବାହ ଏବଂ ନିକାହ ହଲାଲାର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରି ଦାଏର ପିଟିଶନଗୁଡ଼ିକର ଶୁଣାଣି ପାଇଁ ସାନି ୫ ଜଣିଆ ସାମ୍ବିଧାନିକ ପୀଠ ଗଠନ କରିବାକୁ ସୁପ୍ରିମକୋର୍ଟ ଗୁରୁବାର କହିଛନ୍ତି। ଆଇନଜୀବୀ ଅଶ୍ୱିନୀ ଉପାଧ୍ୟାୟ ଏହି ପ୍ରସଙ୍ଗରେ ସର୍ବୋଚ୍ଚ ଅଦାଲତରେ ଜନସ୍ବାର୍ଥ ମାମଲା (ପିଆଇଏଲ୍) ଦାଏର କରିଥିଲେ। ଭାରତୀୟ ଦଣ୍ଡ ସଂହିତାର ଧାରା ୪୯୪ ବହୁବିବାହ ଏବଂ ନିକାହ ହଲାଲାକୁ ଅନୁମତି ଦେଇଛି। ଏହାକୁ ରଦ୍ଦ କରାଯାଉ ବୋଲି ସେ ଭାରତର ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଜଷ୍ଟିସ ପି.ଏସ୍. ନରସିଂହ ଏବଂ ଜେ.ବି. ପର୍ଡିଓ୍ବାଲାଙ୍କ ଖଣ୍ଡପୀଠଙ୍କୁ ନିବେଦନ କରିଥିଲେ। ପଲିଗେମି ଏବଂ ନିକାହ ହଲାଲାକୁ ଅସାମ୍ବିଧାନିକ ଓ ବେଆଇନ ଘୋଷଣା କରିବାକୁ ସେ ପିଟିଶନରେ କୋର୍ଟଙ୍କୁ ଅନୁରୋଧ କରିଥିଲେ। ଏହାକୁ ଆମେ ବିଚାର କରୁଛୁ ଏବଂ ଉପଯୁକ୍ତ ପର୍ଯ୍ୟାୟରେ ଏକ ସାମ୍ବିଧାନିକ ପୀଠ ଗଠନ କରାଯିବ ବୋଲି ସିଜେଆଇ କହିଛନ୍ତି। ଗତବର୍ଷ ଅଗଷ୍ଟ ୩୦ରେ ଜଷ୍ଟିସ ଇନ୍ଦିରା ବାନାର୍ଜୀ, ହେମନ୍ତ ଗୁପ୍ତା, ସୂର୍ଯ୍ୟ କାନ୍ତ, ଏମ୍.ଏମ୍. ସୁନ୍ଦ୍ରେଶ ଏବଂ ସୁଧାଂଶୁ ଧୁଲିଆଙ୍କ ନେଇ ଗଠିତ ୫ ଜଣିଆ ପୀଠ ଏହି ମାମଲାରେ ଜାତୀୟ ମାନବାଧିକାର କମିଶନ (ଏନ୍ଏଚ୍ଆର୍ସି), ଜାତୀୟ ମହିଳା କମିଶନ (ଏନ୍ସିଡବ୍ଲ୍ୟୁ) ଏବଂ ଜାତୀୟ ସଂଖ୍ୟାଲଘୁ କମିଶନ (ଏନ୍ସିଏମ୍)କୁ ପକ୍ଷଭୁକ୍ତ କରି ପିଆଇଏଲ୍ ଉପରେ ସେମାନଙ୍କୁ ଜବାବ ମାଗିଥିଲେ। ଜଷ୍ଟିସ ବାନାର୍ଜୀ ଏବଂ ଜଷ୍ଟିସ୍ ଗୁପ୍ତା ଇତିମଧ୍ୟରେ ଅବସର ନେଇସାରିଛନ୍ତି। ବହୁବିବାହ ଏବଂ ନିକାହ ହଲାଲା ପ୍ରଥା ବିରୋଧରେ ୮ ପିଟିଶନ ଶୁଣାଣି ପାଇଁ ଥିବାରୁ ସାମ୍ବିଧାନିକ ପୀଠର ପୁନର୍ଗଠନ ଆବଶ୍ୟକ ହୋଇପଡ଼ିଛି।
