ଭବାନୀପାଟଣା,୨୨।୧: କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ବିଶ୍ୱନାଥପୁର ସ୍ବାସ୍ଥ୍ୟକେନ୍ଦ୍ରରେ କରୋନା ଟିକାକରଣର ଶୁଭାରମ୍ଭ ହୋଇଛି। ସ୍ବାସ୍ଥ୍ୟକର୍ମୀମାନେ କାର୍ଯ୍ୟକ୍ରମରେ କଳାବ୍ୟାଜ୍ ପିନ୍ଧି ସହଯୋଗ କରିଥିଲେ ମଧ୍ୟ ଟିକା ନେଇ ନ ଥିଲେ। ଲାଞ୍ଜିଗଡ଼ ପଞ୍ଚାୟତ ସମିତି ଅଧ୍ୟକ୍ଷ ଇ.ଫକୀର ମୋହନ ମାଝି ମୁଖ୍ୟଅତିଥି ଭାବେ ଯୋଗଦେଇ ଟିକାକରଣ କାର୍ଯ୍ୟକ୍ରମର ଉଦ୍ଘାଟନ କରିଥିଲେ। ପ୍ରଥମ ଟିକା ସଫେଇ କର୍ମଚାରୀ ଗୌରଚନ୍ଦ୍ର ପୂଝାରୀଙ୍କୁ ଦିଆଯାଇଥିଲା। ଏଥିରେ ଚିକିତ୍ସା ଅଧିକାରୀ ଭବାନୀଶଙ୍କର ଲେଙ୍କା, ଡ. ନିହାର ସାହୁ, ବିପିଏମ୍ଓ ସୁରଜିତ ସିଂ, ଭବାନୀଶଙ୍କର ସିଂ ଓ ପିଏଚ୍ଇଓ ଦିବାକର ପ୍ରଧାନ ପ୍ରମୁଖ ଉପସ୍ଥିତ ରହିଥିଲେ। ପ୍ରଥମ ପର୍ଯ୍ୟାୟରେ ୧୦୦ଜଣଙ୍କ ଟିକା ଦିଆଯାଇଥିଲା। ସ୍ବାସ୍ଥ୍ୟ କର୍ମୀମାନେ କହିଛନ୍ତି, ସରକାର ତାଙ୍କ ପ୍ରତି ଅବହେଳା କରୁଛନ୍ତି। ପଦୋନ୍ନତି, କ୍ୟାଡର ବ୍ୟବସ୍ଥା ଲାଗୁ କରୁନାହାନ୍ତି। ପ୍ରତିବାଦ ସ୍ବରୂପ ଗୁରୁବାର କରୋନା ଟିକାକରଣ ସମୟରେ ସ୍ବାସ୍ଥ୍ୟକର୍ମୀମାନେ କଳାବ୍ୟାଜ୍ ପିନ୍ଧି ଟିକାକରଣ କରିଥିଲେ। ବିଶ୍ୱନାଥପୁର ଚିକିତ୍ସାଳୟରେ ଟିକାକରଣରେ ମହିଳା ସ୍ବାସ୍ଥ୍ୟକର୍ମୀ ମାଳତୀ ଲତା ବାରିକ, ପ୍ରତିମା ବାଗ, ଅଞ୍ଜଳି ସାହୁ, ସୁନୀଲ ଚାଲାନ, ନରେଶ ମାଝୀ, କାଳିଆ ସାହୁ ପ୍ରମୁଖ ସହଯୋଗ କରିଥିଲେ ମଧ୍ୟ ଟିକା ନେଇ ନ ଥିଲେ।
