କେନ୍ଦ୍ରାପଡ଼ା ଅଫିସ ୨ା୧୧: କେନ୍ଦ୍ରାପଡ଼ା ଜିଲା ରାଜନଗର ବ୍ଲକ ରଙ୍ଗଣୀ ପଞ୍ଚାୟତ ଶୈଳେନ୍ଦ୍ର ନାରାୟଣପୁର ଉଚ୍ଚ ପ୍ରାଥମିକ ବିଦ୍ୟାଳୟ ଅବ୍ୟବସ୍ଥା ଘେରରେ ରହିଛି। ଏହି ସ୍କୁଲରେ ପ୍ରଧାନ ଶିକ୍ଷୟିତ୍ରୀ ବର୍ଷବର୍ଷ ଧରି ବିଭିନ୍ନ ଆଳ ଦେଖାଇ ସ୍କୁଲ ଆସୁନାହାନ୍ତି। ଏହି ସ୍କୁଲରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପ୍ରାୟ ୨ ଶହ ଛାତ୍ରୀଛାତ୍ର ପାଠପଢୁଥିବାବେଳେ ୫ଟି ଶିକ୍ଷକ ଶିକ୍ଷାଦାନ କରୁଛନ୍ତି। ତେବେ ପ୍ରତିଦିନ ପ୍ରଧାନ ଶିକ୍ଷୟିତ୍ରୀଙ୍କୁ ଆରମ୍ଭ କରି ଶିକ୍ଷକମାନେ ଠିକ୍ ସମୟରେ ସ୍କୁଲ ଆସୁନାହାନ୍ତି। ଏପରି କି ସ୍କୁଲ ଗେଟ୍ ମଧ୍ୟ ଠିକ୍ ସମୟରେ ଖୋଲା ଯାଉନାହିଁ। ଫଳରେ ସ୍କୁଲ ଗେଟ୍ ସମ୍ମୁଖରେ ଛାତ୍ରୀଛାତ୍ରଙ୍କୁ ଦୀର୍ଘ ସମୟ ଧରି ଅପେକ୍ଷା କରି ରହୁଛନ୍ତି ବୋଲି ଅଭିଭାବକମାନେ କହିଛନ୍ତି। ବ୍ଲକ ଶିକ୍ଷାଧିକରୀଙ୍କ କାର୍ଯ୍ୟାଳୟ ପ୍ରାୟ ୪୦ କିମି ଦୂର ହୋଇଥିବାରୁ ଗ୍ରାମବାସୀ ବିଇଓଙ୍କ ନିକଟରେ ଅଭିଯୋଗ କରି ପାରୁନାହାନ୍ତି ବୋଲି କହିଛନ୍ତି।
ଅଭିଭାବକ ମହାସଙ୍ଗ ସମ୍ପାଦକ ନରେନ୍ଦ୍ର ଧଳ କୁହନ୍ତି, ଶିକ୍ଷା କ୍ଷେତ୍ରରେ ସୁଦ୍ଧାର ଆଣିବାକୁ ରାଜ୍ୟ ସରକାର ପଦକ୍ଷେପ ନେଉଛନ୍ତି। ବିଦ୍ୟାଳୟ ପ୍ରତି ଛାତ୍ରୀଛାତ୍ରଙ୍କୁ ଆକୃଷ୍ଟ କରିବାକୁ ସରକାରଙ୍କ ପକ୍ଷରୁ ପର୍ଯ୍ୟାୟକ୍ରମେ ଶିକ୍ଷକମାନଙ୍କୁ ନିଯୁକ୍ତି ଦିଆଯାଉଛି। ବିଦ୍ୟାଳୟ ଓ ଶିକ୍ଷକମାନଙ୍କୁ ତଦାରଖ କରିବାକୁ ବ୍ଲକ ଓ ଜିଲା ସ୍ତରରେ ପଦାଧିକାରୀଙ୍କୁ ନିଯୁକ୍ତି ଦିଆଯାଇଛି। ମାତ୍ର ଏହାର ବ୍ୟତିକ୍ରମ ଦେଖାଦେଇଛି ଶୈଳେନ୍ଦ୍ରନାରାୟଣପୁର ଉଚ୍ଚ ପ୍ରାଥମିକ ବିଦ୍ୟାଳୟରେ। ଏହି ବିଦ୍ୟାଳୟର ସିଆରସିସି, ବିଆରସିସି ଥାଇ ମଧ୍ୟ ପ୍ରଧାନ ଶିକ୍ଷୟିତ୍ରୀ ରଞ୍ଜୁମଞ୍ଜରୀ ସିଂ ନିୟମିତ ସ୍କୁଲ ଅସୁନାହାନ୍ତି। ମାତ୍ର ସିଆରସିସି, ବିଆରସିସିଙ୍କ କାଗଜ କଲମରେ ସବୁ ସୀମିତ ହୋଇରହିଛି ବୋଲି ଅଭିଯୋଗ ହେଉଛି। ଏହି ଦୁର୍ନୀତିରେ ବିଦ୍ୟାଳୟର ସିଆରସିସି ଓ ବିଆରସିସି ସାମିଲି ଅଛନ୍ତି ବୋଲି ପ୍ରତୀୟମାନ ହେଉଛି ବୋଲି ସେ କହିଛନ୍ତି। ଅଭିଭାବକ ଅଶୋକ କୁମାର ଜେନା କହିଛନ୍ତି, ଶୈଳେନ୍ଦ୍ରନାରାୟଣପୁର ଉଚ୍ଚ ପ୍ରାଥମିକ ବିଦ୍ୟାଳୟରେ ଥିବା ପ୍ରଧାନ ଶିକ୍ଷୟିତ୍ରୀ ସିଂ ଚାକିରି କରିବା ଦିନଠୁ ଏ ପର୍ଯ୍ୟନ୍ତ କେବେ ବି ନିୟମିତ ଭାବେ ବିଦ୍ୟାଳୟକୁ ଆସନ୍ତି ନାହିଁ। ରାଜ୍ୟରେ ଶିକ୍ଷା କ୍ଷେତ୍ରରେ ସୁଦ୍ଧାର ଆସିବ ବୋଲି ସରକାର ସ୍ବପ୍ନ ଦେଖିାଉଛନ୍ତି। ଏହି ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ଆଦୌ ବିଦ୍ୟାଳୟ ଆସୁ ନ ଥିବା ବେଳେ ପ୍ରଧାନ ଶିକ୍ଷୟିତ୍ରୀଙ୍କ ନକଲି ଦସ୍ତଖତ ବିଦ୍ୟାଳୟର ଅନ୍ୟ ଜଣ ଶିକ୍ଷକ କରନ୍ତି। କେବେ ରେଜିଷ୍ଟ୍ରାର ତାଙ୍କ ଘରକୁ ନେଇ ଦସ୍ତଖସ୍ତ କରାଇ ଆଣନ୍ତି ବୋଲି ଜଣାପଡିଛି। ପ୍ରତି ମାସ ଦରମା ସେ ନେଉଛନ୍ତି ଅଭିଯୋଗ ହେଉଛି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ଯଦି ୭ ଦିନ ମଧ୍ୟରେ ପ୍ରଧାନ ଶିକ୍ଷୟିତ୍ରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆ ନ ଯାଏ ଆଗାମୀ ଦିନରେ ବିଦ୍ୟାଳୟ ସମ୍ମୁଖରେ ଧାରଣ ଦିଆଯିବ ଚେତାବନୀ ଦିଆଯାଇଛି ବୋଲି ସେ କହିଛନ୍ତି। ଏ ବାବଦରେ ବିଇଓ ମନୋରଞ୍ଜନ ସେଠୀଙ୍କୁ ପଚାରିବାରେ ଶୈଳେନ୍ଦ୍ର ନାରାୟଣପୁର ଉଚ୍ଚ ପ୍ରାଥମିକ ବିଦ୍ୟାଳୟରେ ଥିବା ପ୍ରଧାନ ଶିକ୍ଷୟିତ୍ରୀ ସିଂ ବିରୋଧରେ ଆଗରୁ ଅଭିଯୋଗ ହୋଇଥିଲା। ଗତ ୫ ମାସ ତାଙ୍କ ଦରମା ବନ୍ଦ କରାଯାଇଥିଲା। ପୁଣି ଏଭଳି ଅଭିଯୋଗ ଆସିଛି। ତଦନ୍ତ ପରେ ସତ୍ୟାସତ୍ୟ ମିଳିଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।
