ମାଲକାନଗିରି/କୋରୁକୋଣ୍ଡା/ଏମ୍ଭି-୭୯,(ଡି.ଏନ୍.ଏ.): ମାଲକାନଗିରି ଜିଲା କୋରୁକୋଣ୍ଡା ବ୍ଲକ ଅଧୀନ ମାରିବାଡା ପଞ୍ଚାୟତର ମାରିବାଡାସ୍ଥିତ ଆଶ୍ରମ ବିଦ୍ୟାଳୟରେ ଗତ ୩ ତାରିଖରେ ୨୦ରୁ ଉର୍ଦ୍ଧ୍ୱ ଛାତ୍ର ଛାତ୍ରାବାସ ଛାଡି ଦାୟିତ୍ୱରେ ଥିବା ପରିଚାଳିକାଙ୍କ ବିରୋଧରେ ଚାଉଳ ବିକ୍ରି ଅଭିଯୋଗ ନେଇ ରାତିରେ ହଷ୍ଟେଲ ପାଚେରି ଡେଇଁ ଜିଲାପାଳଙ୍କୁ ଭେଟିବାକୁ ଯାଇଥିଲେ। ଏହି ଘଟଣାର ତଦନ୍ତ ପରେ ପ୍ରଶାସନ ପଦକ୍ଷେପ ନେଇଛି। ଘଟଣାରେ ପ୍ରଧାନଶିକ୍ଷକ ସମେତ ୨ ଶିକ୍ଷକଙ୍କ ବଦଳି ହୋଇଛି। ହଷ୍ଟେଲ ପରିଚାଳିକାଙ୍କ ସମେତ ୨ଜଣ ନିଲମ୍ବତି ହୋଇଛନ୍ତି। ମାରିବାଡା ହଷ୍ଟେଲ ପରିଚାଳିକା ଛାତ୍ରୀଛାତ୍ରଙ୍କ ପାଇଁ ଆସୁଥିବା ଚାଉଳ ଏକ ଅଟୋରେ ବାହାରେ ବିକ୍ରି କରିବାକୁ ନେଉଥିବାର ଫଟୋ ଉପସ୍ଥାପନ କରି ଛାତ୍ରମାନେ ଅଭିଯୋଗ କରିଥିଲେ। ଏନେଇ ୬ ତାରିଖରେ ଲୋକାୟୁକ୍ତ ମଧ୍ୟ ଘଟଣା ସମ୍ପର୍କରେ ୬ ସପ୍ତାହ ମଧ୍ୟରେ ଉତ୍ତର ରଖିବାକୁ ଜିଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ। ମଙ୍ଗଳବାର ଜିଲା ପ୍ରଶାସନ ତଦନ୍ତ କରି ଆଶ୍ରମ ବିଦ୍ୟାଳୟର ପିଲାଙ୍କ ଚାଉଳ ଚୋରି ଅଭିଯୋଗରେ ପରିଚାଳିକା ରଞ୍ଜିତା ବେହେରା ଓ ସହକାରୀ ଶିକ୍ଷକ ଶ୍ରୀକୁମାର ଦୋରା ପିଲାଙ୍କୁ ନିଲମ୍ବିତ କରିଛନ୍ତି। ପ୍ରଧାନ ଶିକ୍ଷକ ଭଗବାନ ନାୟକଙ୍କ ସମେତ ଆଉ ଜଣେ ସହକାରୀ ଶିକ୍ଷକ ପ୍ରଦୀପ ସେଠୀଙ୍କୁ ଅନ୍ୟତ୍ର ବଦଳି କରାଯାଇଛି ବୋଲି କୋରୁକୋଣ୍ଡୁ ଡବ୍ଲ୍ୟୁଇଓ ପ୍ରଶାନ୍ତ ବେଉରା କହିଛନ୍ତି। ସେହିଭଳି ପଡିଆ ବ୍ଲକର କୋଲାଗୋଣ୍ଡା ଆଶ୍ରମ ବିଦ୍ୟାଳୟରେ ଅଜଣା ରୋଗରେ ଛାତ୍ର ମୃତ୍ୟୁ ଘଟଣାରେ ମଧ୍ୟ ଜିଲା ପ୍ରଶାସନ ପଦକ୍ଷେପ ନେଇଛି। ପ୍ରଧାନ ଶିକ୍ଷୟିତ୍ରୀ ସାବିତ୍ରୀ ମଣ୍ଡଳଙ୍କୁ କାର୍ଯ୍ୟରେ ଅବହେଳା ଯୋଗୁ ନିଳମ୍ବିତ କରାଯାଇଥିବା ବେଳେ ରୋଷେୟା ଯୋଗି ମାଡକାମିଙ୍କୁ ଚାକିରିରୁ ବହିଷ୍କାର କରାଯାଇଛି। ହଷ୍ଟେଲର ମାଟ୍ରନ ମୋନିକା ସିକଦାରଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି।
