ଅମରପାଲି,୯ା୫ (ଡି.ଏନ.ଏ): ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳରେ ଚଳିତ ରବିଋତୁରେ ପ୍ରଚୁର ପରିମାଣରେ କଖାରୁ(ମାଖନ) ଉତ୍ପାଦନ ହୋଇଛି। ହେଲେ ବିକ୍ରି କରି ପାରୁ ନ ଥିବାରୁ ଚାଷୀ ମୁଣ୍ଡରେ ହାତ ଦେଇ ବସିଛି। ହଜାର ହଜାର କୁଇଣ୍ଟାଲ କଖାରୁ ନଷ୍ଟ ହେବାକୁ ବସିଲାଣି। ଚଳିତ ବର୍ଷ ବୀରମହାରାଜପୁର ବ୍ଲକରେ ପ୍ରାୟ ୫ଶହ ହେକ୍ଟର ଜମିରେ କଖାରୁ ଚାଷ ହୋଇଥିଲା। ବ୍ଲକର କମିରା, ବିକଳପୁର, ସୁବଳୟା, ବଳରାମପୁର, ପଣ୍ଡୁଆ ଆଦି ଗ୍ରାମର ଚାଷୀ ପ୍ରବଳ ମାତ୍ରାରେ କଖରୁ ଚାଷ କରିଥିଲେ। ଏଥିପାଇଁ ଚାଷୀଙ୍କୁ କୌଣସି ସରକାରୀ ସହାୟତା ପ୍ରଦାନ କରାଯାଇ ନ ଥିଲା। ଚାଷୀ ଋଣ କରି ଚାଷ କରିଥିଲା। ଆଶାନୁରୂ ଅମଳ ମଧ୍ୟ ହୋଇଥିଲା। କୁଇଣ୍ଟାଲ ପ୍ରତି ଏକ ହଜାର ଟଙ୍କା ର ବିକ୍ରି ଲକ୍ଷ୍ୟ ରଖିଥିବା ଚାଷୀ ଏବେ ବିକ୍ରି କରିପାରୁନାହିଁ। ଅଭାବି ବିକ୍ରିର ଶିକାର ଚାଷୀ ଏବେ ହାତାଶ ହୋଇ ପଡିଛି। ଋଣ କିପରି ପରିଶୋଧ କରିବ ଚିନ୍ତାରେ ପଡିଯାଇଛି। ବିକ୍ରିବଟାର କୌଣସି ସୁବିଧା ନ ଥିବା ବେଳେ ଅମଳ ଫସଲ ରଖିବା ପାଇଁ ଶୀତଳ ଭଣ୍ଡାରର ମଧ୍ୟ ବ୍ୟବସ୍ଥା ନାହିଁ। ତେଣୁ ଚାଷୀ ବାଧ୍ୟ ହୋଇ କୁଇଣ୍ଟାଲ ପ୍ରତି ୩ ରୁ ୪ଶହ ଟଙ୍କାରେ କଖାରୁ ବିକ୍ରି କରୁଛି। ଏନେଇ କମିରା ପଞ୍ଚାୟତ ଅନ୍ତର୍ଗତ ବିକଳପୁର ଗ୍ରାମର ଚାଷୀ ପରକ୍ଷିତ କର୍ଣ୍ଣ କହନ୍ତି, ସେ ପ୍ରାୟ ୩ ଏକର ଜମିରେ କଖାରୁ ଚାଷ କରିଥିଲେ। ଭଲ ଅମଳ ମଧ୍ୟ ହୋଇଛି। ମାତ୍ର ଏବେ ବିକ୍ରି ହେଉନାହିଁ। ତେଣଉ ସେ କେମିତି ଋଣ ପରିଶୋଧ କରିବେ ଚିନ୍ତାରେ ଅଛନ୍ତି ବୋଲି କହିଛନ୍ତି। ଏ ନେଇ ବୀରମହାରାଜପୁର ଅତିରିକ୍ତ ଉଦ୍ୟାନ କୃଷି ନିର୍ଦ୍ଦେଶକ ବିଦ୍ୟାଧର ଦାଶଙ୍କୁ ପଚାରିବାରୁ କଖାରୁ ଚାଷ ପାଇଁ ସେମିତି କୌଣସି ସରକାରୀ ସହାୟତା ବ୍ୟବସ୍ଥା ନାହିଁ। ଚଳିତ ରବିଋତୁରେ ବୀରମହାରାଜପୁର ଓ ଉଲୁଣ୍ଡା ବ୍ଲକରେ ପ୍ରାୟ ୩ଶହ ହେକ୍ଟର ଜମିରେ ପନିପରିବା ଚାଷ ହାତକୁ ନିଆଯାଇଛି।ସେଥିରେ କଖାରୁ ଚାଷକୁ ସାମିଲ କରାଯାଇ ନାହିଁ। ଆଗାମୀ ଦିନରେ ଏଥିପ୍ରତି ଦୃଷ୍ଟିଦେଇ କଖାରୁ ଚାଷକୁ ଏଥିରେ ସାମିଲ କରି ଚାଷୀଙ୍କୁ ସୁବିଧା ସୁଯୋଗ ପ୍ରଦାନ ବ୍ୟବସ୍ଥା କରାଯିବ ବୋଲି କହିଛନ୍ତି।
