ଜି.ଉଦୟଗିରି,୧୧ା୯(ଶିଶିର ପଟ୍ଟନାୟକ)-ଜି.ଉଦୟଗିରି ଥାନା ଅଧୀନ କଳିଙ୍ଗା ପଞ୍ଚାୟତର ନନ୍ଦଗିରି ଗ୍ରାମରୁ ପୋଲିସ ସୋମବାର ଜଣେ ମହିଳାଙ୍କ ଝୁଲନ୍ତା ମୃତଦେହ ଜବତ କରିଛି। ସେ ହେଲେ ଶୁଭଶ୍ରୀ ପ୍ରଧାନ (୨୨)। ଝିଅକୁ ହତ୍ୟା କରାଯାଇଥିବା ଶୁଭଶ୍ରୀଙ୍କ ବାପା ଜଳନ୍ଧର ପ୍ରଧାନ ଅଭିଯୋଗ କରିଛନ୍ତି। ଥାନା ଅଧିକାରୀ ଅଜୟ କୁମାର ସ୍ବାଇଁ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଶୁଭଶ୍ରୀଙ୍କ ସ୍ବାମୀଙ୍କୁ ପୋଲିସ ଅଟକ ରଖିଛି।
ସୂଚନାନୁଯାୟୀ, ମଣ୍ଡାକିଆ ନିକଟସ୍ଥ ବିଅରପାଙ୍ଗା ଗ୍ରାମର ଶୁଭଶ୍ରୀ ନନ୍ଦଗିରି ଗ୍ରାମର ଅମନ ଦିଗାଲ(୨୫)ଙ୍କୁ ଦୁଇ ବର୍ଷ ପୂର୍ବେ ବିବାହ କରିଥିଲେ। ଉଭୟେ ନନ୍ଦଗିରିସ୍ଥିତ ଘରେ ରହୁଥିଲେ। ତେବେ ଶୁଭଶ୍ରୀ ଚୁନରିରେ ଝୁଲୁଥିବା ସୋମବାର ସକାଳେ ପଡ଼ୋଶୀ ମାନେ ଦେଖି ପୋଲିସକୁ ଖବର ଦେଇଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରିଥିଲା। ଏଣେ ଶୁଭଶ୍ରୀର ବାପା ଜଳନ୍ଧର ପ୍ରଧାନ ତାଙ୍କ ଝିଅକୁ ଜ୍ୱାଇଁ ମାରି ଝୁଲାଇ ଦିଆଯାଇଛି ବୋଲି ଏତଲା ଦେବା ପରେ ପୋଲିସ କେସ ନମ୍ବର ୧୧୬/୨୩ ଅନୁଯାୟୀ ମକଦ୍ଦମା କରି ମୃତ ଶୁଭଶ୍ରୀର ସ୍ବାମୀ ଅମନ ଦିଗାଲକୁ ନେଇ ଥାନାରେ ଅଟକ ରଖିଛି। ମୃତଦେହକୁ ବ୍ୟବଛେଦ ପାଇଁ ପଠାଯାଇଛି।
