ବଲାଙ୍ଗୀର ଅଫିସ,୧୯।୧୧: ବଲାଙ୍ଗୀରର ଅଗ୍ରଣୀ ଲୋକନୃତ୍ୟ ଓ ନାଟ୍ୟାନୁଷ୍ଠାନ ନଟରାଜ କଳା ପରିଷଦର ରଜତ ଜୟନ୍ତ୍ରୀ ଉତ୍ସବ ସ୍ଥାନୀୟ କୋଶଳ କଳାମଣ୍ଡଳ ପଡିଆ ପୁରୁଣା ମଞ୍ଚରେ ଶୁକ୍ରବାର ଉଦ୍ଘାଟିତ ହୋଇଛି। ଡ. ଶ୍ରୀକର ମିଶ୍ର ଅଧ୍ୟକ୍ଷତାରେ ଅନୁଷ୍ଠିତ ଉତ୍ସବରେ ପରିଷଦ ସଭାପତି ହରି ନାରାୟଣ ପୂଜାରୀ, ମୁଖ୍ୟଅତିଥି ବଲାଙ୍ଗୀର ବିଧାୟକ ନରସିଂହ ମିଶ୍ର ମଞ୍ଚାସୀନ ଥିଲେ। ବିଧାୟକ ମିଶ୍ର ଉତ୍ସବକୁ ଉଦ୍ଘାଟନ କରିଥିଲେ। ସଭାରେ ପ୍ରାଧ୍ୟାପକ ଚୁଡାମଣି ରଥଙ୍କୁ ସ୍ବର୍ଗତ ସୁବାସ ପୂଜାରୀଙ୍କ ସ୍ମୃତିରେ କୋଶଳ ଗୌରବ ନାଟ୍ୟ ସମ୍ମାନ ଓ ବିଶିଷ୍ଟ କଳାକାର ଲଳିତ ପୂଜାରୀଙ୍କୁ ସ୍ବର୍ଗତ ଜ୍ୟୋତି ରଞ୍ଜନ ପାଣିଗ୍ରାହୀଙ୍କ ସ୍ମୃତିରେ ଯୁବ କଳାକାର ନାଟରାଜ ସମ୍ମାନ ପ୍ରଦାନ କରାଯାଇଥିଲା। ସଭାରେ ବିଧାୟକ ମିଶ୍ର କହିଥିଲେ ଯେ, ବିନା ପୃଷ୍ଠପୋଷକତାରେ କଳା, ସଂସ୍କୃତି ନାଟ୍ୟ ସଙ୍ଗଠନ ବଞ୍ଚତ୍ବା କଷ୍ଟକର। ଏଭଳି ପରିସ୍ଥିତିରେ ନଟରାଜ କଳା ପରିଷଦ ଦୀର୍ଘ ୨୫ ବର୍ଷ ଧରି ସଫଳତାର ସହ କଳା, ସଂସ୍କୃତିର ଉତ୍ତରଣ ଦିଗରେ କାର୍ଯ୍ୟ କରି ଆଜି ରଜତ ଜୟନ୍ତୀ ପାଳନ କରୁଛି। ଏହା ସାଧାରଣ କଥା ନୁହେଁ ବୋଲି କହି ପରିଷଦ କଳାକାର, ସଦସ୍ୟ ଓ ବଲାଙ୍ଗୀରବାସୀଙ୍କୁ ବିଧାୟକ ମିଶ୍ର ଶୁଭେଚ୍ଛା ଜଣାଇଥିଲେ। ନାଟକ ମାଧ୍ୟମରେ ସମାଜ ସଂସ୍କାର ଆଣିବା ଦିଗରେ ଏହି ଅନୁଷ୍ଠାନ ଆଗକୁ ମଧ୍ୟ କାର୍ଯ୍ୟ କରିବ ବୋଲି ସେ ଆଶାପୋଷଣ କରିଥିଲେ। ଶମ୍ଭୁପ୍ରସାଦ ଦାଶ କାର୍ଯ୍ୟକ୍ରମ ସଂଯୋଜନା ଏବଂ ହିମାଂଶୁ ଶେଖର ପାଢ଼ୀ ଧନ୍ୟବାଦ ଅର୍ପଣ କରିଥିଲେ।
ଉଦ୍ଘାଟନୀ ଉତ୍ସବ ସନ୍ଧ୍ୟାରେ ଦୁଇଟି ନାଟକ ପରିବେଷଣ କରାଯାଇଥିଲା। ପ୍ରଥମ ନାଟକ ଆଶାପୁରନୁ ଆମେରିକାରେ କଳାକାରମାନେ ନିଖୁଣ ଅଭିନୟ କରି ମଧ୍ୟବିତ୍ତ ପରିବାରର ଜୀବନ ସଂଘର୍ଷ, ଆଶା-ନିରାଶାର ମର୍ମସ୍ପର୍ଶୀ ଚିତ୍ର ଉପସ୍ଥାପନ କରିଥିଲେ। ପ୍ରଶାନ୍ତ ଖମାରୀଙ୍କ ନିର୍ଦ୍ଦେଶିତ ନାଟକରେ ଜ୍ୟୋତି ବେଦବାକ, ପ୍ରହଲ୍ଲାଦ ଦର୍ଜୀ, ପ୍ରଶାନ୍ତ ପଣ୍ଡା ଓ ପ୍ରାୟମ୍ଭ ପ୍ରତିକ ଜାଲ, ଶ୍ରୀପ୍ରଦା ଷଡଙ୍ଗୀ ନିଖୁଣ ଅଭିନୟ କରିଥିଲେ। ଦ୍ୱିତୀୟ ନାଟକ ‘ଅ ଆ ଇ’ ମଞ୍ଚସ୍ଥ ହୋଇଥିଲା। ଏହି ବାସ୍ତବଧର୍ମୀ ନାଟକରେ ଦୁଇ ଜଣ ଗବେଷକ ଜୀବନର ସତ୍ୟ ଖୋଜି ଖୋଜି କେମତି ଶ୍ମଶାନକୁ ପହଞ୍ଚତ୍ଥିଲେ ତାହା ପ୍ରଦର୍ଶିତ ହୋଇଥିଲା। ନାଟକରେ ଦେବବ୍ରତ, ମଧୁ, ରାମ, ସୁମିତ, ନବଘନ, ସରୋଜ, ସୈଲିନ, ଟୁନା, ଅନିଲ, ଟଙ୍କଧର, ସଞ୍ଜୀବ, ବିଶ୍ୱଜିତ, ଅର୍ଜୁନ ଓ ପୂଜା ନିଖୁଣ ଅଭିନୟ କରିଥିଲେ।
