ନୟାଗଡ଼,୧୨।୧୧(ଲୋକନାଥ ମିଶ୍ର)ବର୍ଷା ଅଭାବରୁ ପାହାଡ଼ ପର୍ବତ ପରିବେଷ୍ଠିତ ନୟାଗଡ଼ ଜିଲାରେ ଧାନ ଫସଲ ଉଜୁଡିଥିଲେ ମଧ୍ୟ ମରୁଡ଼ି ଅଞ୍ଚଳ ଘୋଷଣା କରାଯାଉ ନ ଥି୍ବାରୁ ସାଧାରଣରେ କ୍ଷୋଭ ପ୍ରକାଶ ପାଇଛି। ଧାର କରଜ, ବ୍ୟାଙ୍କରୁ ଋଣ ଆଣିଥିବା ଚାଷୀକୁ ଋଣ ପରିଶୋଧର ଚିନ୍ତା ଘାରିଛି। ଉଜୁଡା ଫସଲକୁ ଦେଖି ରଣପୁର ବ୍ଲକ ଜଙ୍କିଆ ପଞ୍ଚାୟତ ଓସ୍ତପଡାରେ ଗୋବିନ୍ଦ ସାହୁ(୬୫) ନାମକ ଜଣେ ଚାଷୀ ବିଲରେ ଥିବା ଏକ ଗଛରେ ଝୁଲି ଆମତ୍ହତ୍ୟା କରିଛନ୍ତି । ଗୋବିନ୍ଦଙ୍କ ଆମତ୍ହତ୍ୟା ପରେ ଆଉ କେହି ଚାଷୀ ଆମତ୍ହତ୍ୟା ଯେ ନ କରିବେ କହି ହେବ ନାହିଁ। ସେ ନେଇ ଚାଷୀ ପରିବାରରେ ଭୟ ଘାରିଲାଣି। ଏନେଇ ନବନିର୍ମାଣ ସେବା ସ୍ବରାଜ ସରକାର ମୋ ଦଳର ନୟାଗଡ଼ ଜିଲା ଉପସଭାପତି ରଣଜିତ ଦଳବେହେରା କୁହନ୍ତି, ୮୫ ପ୍ରତିଶତ ଜମିରେ ମରୁଡ଼ି ପରିସ୍ଥିତି ସୃଷ୍ଟି ହୋଇଛି । ଧାନରେ ଫୁଲ ଉଡିବା ସମୟରେ ବର୍ଷା ଅଭାବ ଯୋଗୁ ଏପରି ପରିସ୍ଥିତି ସୃଷ୍ଟି କରିଛି । ୧୫ ପ୍ରତିଶତ ଜମିରେ ଧାନ ଫସଲ ହୋଇଥିଲେ ମଧ୍ୟ ଅମଳ କମିବ। ଚଳିତ ବର୍ଷ ମଣ୍ଡିରେ ଧାନ ବିକ୍ରି ପାଇଁ ଭିଡ଼ ଜମିବ ନାହିଁ । ଯେଉଁ ଚାଷୀ ଧାନ ବିକିଲେ ନାହିଁ ସେ ମରୁଡ଼ିର ଶିକାର ହୋଇଥିବ ଜଣାପଡିବ। ଯେଉଁ ଚାଷୀ ଧାନ ମଣ୍ଡିରେ ବିକ୍ରି କରିବେ ସେ କିଛି ଧାନ ପାଇଥିବା ଜଣାପଡିବ। ତେବେ ସରକାର ନୟାଗଡ଼ ଜିଲାକୁ ମରୁଡ଼ି ଅଞ୍ଚଳ ରୂପେ ଘୋଷଣା କରିବା ଦରକାର। ନୟାଗଡ଼ର ସାମଜିକ କର୍ମୀ ବିଶ୍ୱନାଥ ମହାପାତ୍ର କୁହନ୍ତି, ନୟାଗଡ଼ ଜିଲାରେ ଜଳସେଚନର ସୁବିଧା ନାହିଁ । ଜଳସେଚନ ସୁବିଧା ଥିଲେ ଚଳିତ ବର୍ଷ ଧାନ ଭଲ ହୋଇଥାଆନ୍ତା । ଧାନ ବାହାରୁଥିବାବେଳେ ପାଣି ମିଳିଲାନି। ବିଭିନ୍ନ ସ୍ଥାନରେ ନଦୀ ବନ୍ଧ କରି, ପୋଖରୀ କାଟି, ପାଣି ପାଇପରେ ଜମିରେ ପାଣି ମଡାଗଲା। ହେଲେ କିଛି ଜମି ବଞ୍ଚତ୍ଗଲା। କିନ୍ତୁ ମରୁଡ଼ି ପରିସ୍ଥିତିକୁ ବଦଳା ଯାଇ ପାରିଲା ନାହିଁ। ଜିଲାର ଅନେକ ସ୍ଥାନରେ ମରୁଡ଼ି ହୋଇଛି । କୃଷି ବିଭାଗ ଚିହ୍ନଟ ନ କରି ଚୁପ ହୋଇ ବସି ରହିଛି । ସିପିଏମ୍ର ବରିଷ୍ଠ ନେତା ସୁରେଶ ଚନ୍ଦ୍ର ସ୍ବାଇଁ ଓ କଂଗ୍ରେସ ନେତା ସତ୍ୟବ୍ରତ ନାୟକ କୁହନ୍ତି, ରଣପୁର ବ୍ଳକକୁ ମରୁଡ଼ି ଅଞ୍ଚଳ ରୂପେ ଘୋଷଣା ପାଇଁ ବିଭିନ୍ନ ସମୟରେ ଆନ୍ଦୋଳନ କରାଯାଇଛି। ତହସିଲ ସମ୍ମୁଖରେ ଧାରଣା ଦିଆଯାଇଛି। ହେଲେ ଚାଷୀ ଅଭିଯୋଗ ଶୀତଳଭଣ୍ଡାରକୁ ଚାଲି ଯାଇଛି । ନୂଆଗଁା ବ୍ଲକ ନୂଆଗଁାର ସୁଧିର କୁମାର ପ୍ରଧାନ କୁହନ୍ତି, ୨ମାସ ହେଲା ମେଘ ଛାଡିବା ପରେ ମରୁଡ଼ି ହୋଇଛି । ବିଲ ଫାଟି ଅଁା କରି ରହିଛି । ଧାନ ଗର୍ଭରେ ଅଛି କିନ୍ତୁ ବାହାରି ପାରୁନି। ଯେଉଁ କିଛି ଜମିରେ ଧାନ ବାହାରି ପଡିଛି ସେଥିରେ ୭୫ ପ୍ରତିଶତ ଅଗାଡି ହୋଇଯିବ । କିଛି ସ୍ଥାନରେ ଚାଷୀ ଧାନ ଗଛକୁ କାଟି ଗୋରୁ ଗାଈକୁ ଖୁଆଉଛନ୍ତି । ଆଉ କିଛି ସ୍ଥାନରେ ଧାନ ବିଲରେ ଗୋରୁ ଚରିଲେଣି। ଏଣୁ ନୂଆଗଁା ବ୍ଲକ୍କୁ ମରୁ୍ଡ଼ି ଅଞ୍ଚଳ ଘୋଷଣା କରାଯାଉ। ଗୋଡ଼ିପଡାର ଗଶେଶ୍ୱର ମିଶ୍ର କୁହନ୍ତି, ଆମର ୯ମାଣ ଜମି ଅଛି। ସବୁ ଜମି ଫାଟି ଅଁା କରିଛି । ଧାନ ବାହାରି ଜଳିଗଲା। ଧାନ ବାହାରି ନ ପାରି ଜଳିଗଲା। ଧାନ ଫସଲ ଉଜୁଡିବା ପରେ ଚିନ୍ତା ଘାରିଛି। ନୟାଗଡ଼ ଲାଉସେଣାର ଚାଷୀ ଯୁଧିଷ୍ଠିର ନାୟକ କୁହନ୍ତି, ମୁଁ ୯ମାଣ ଜମି ଚାଷ କରିଛି। ବ୍ୟାଙ୍କରୁ ୩ ଲକ୍ଷ ଟଙ୍କା ଋଣ କରିଛି। ମୋ ଫସଲ ଉଜୁଡି ଯାଇଛି। କିପରି ଋଣ ପରିଶୋଧ କରିବି ଚିନ୍ତା ଘାରିଲାଣି। ସରକାର ଆମ ମାନଙ୍କର ଜମିକୁ ଦେଖି ନୟାଗଡ଼ ଜିଲାକୁ ମରୁଡ଼ି ଅଞ୍ଚଳ ଘୋଷଣା କରନ୍ତୁ ବୋଲି ସେ କହିଛନ୍ତି।
