ମୃତକଙ୍କ ପରିବାରକୁ ଦିଆଯାଇଛି ୫ଲକ୍ଷ
9:33 amDecember 2, 2020December 2, 2020 / 43

କଟକ ଅଫିସ,୨ା୧୨: ପୁରୀ ହାଜତ ମୃତ୍ୟୁ ମାମଲାକୁ ନେଇ ହାଇକୋର୍ଟରେ ହୋଇଥିବା ଜନସ୍ବାର୍ଥ ମାମଲାରେ ରାଜ୍ୟ ସରକାର ମଙ୍ଗଳବାର ସତ୍ୟପାଠ ଦାଖଲ କରିଛନ୍ତି। କେ. ରମେଶଙ୍କ ପରିବାରକୁ କ୍ଷତିପୂରଣ ବାବଦରେ ୫ଲକ୍ଷ ଟଙ୍କା ପ୍ରଦାନ କରାଯାଇଛି। ସେହିପରି ସିଆର୍‌ପିସି ୧୭୬ ଦଫା ଅନୁସାରେ ପୁରୀ ଜିଲା ଜଜ୍‌ ଜଣେ ବିଚାରବିଭାଗୀୟ ମାଜିଷ୍ଟ୍ରେଟଙ୍କୁ ମୃତ୍ୟୁର କାରଣ ସମ୍ପର୍କରେ ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ଆଗକୁ ଏନ୍‌ଏଚ୍‌ଆର୍‌ସି ଯେଉଁ ନିର୍ଦ୍ଦେଶ ଦେବେ, ସେହି ଅନୁସାରେ ତଦନ୍ତ ଆଗେଇବ ବୋଲି ସରକାର ସତ୍ୟପାଠରେ ଉଲ୍ଲେଖ କରିଛନ୍ତି। ଅପରପକ୍ଷରେ ଆବେଦନକାରୀ ଓକିଲ ମଙ୍ଗଳବାର ଆଉ ଏକ ସତ୍ୟପାଠ ଦାଖଲ କରିଛନ୍ତି। ଏଥିରେ ସେ କହିଛନ୍ତି , ରମେଶଙ୍କୁ ପୋଲିସ ବାହାରୁ ନୁହେଁ ବରଂ ଘରୁ ଉଠାଇ ନେଇଥିଲା। ଏପରି କି ବାସେଳି ସାହି ଥାନା ମଧ୍ୟରେ ତାଙ୍କୁ ମାଡ଼ ମରାଯିବାବେଳେ ଖୋଦ୍‌ ଏସ୍‌ପି ଅଖିଳେଶ୍ୱର ସିଂ ଉପସ୍ଥିତ ଥିଲେ। ମାମଲାର ପରବର୍ତ୍ତୀ ଶୁଣାଣି ଆସନ୍ତା ୧୪ତାରିଖରେ ହେବ।
ଘଟଣା ରାତିରେ ଏସ୍‌ପି ସିଂ ଥାନାରେ ଉପସ୍ଥିତ ଥିବା ନେଇ ଆବେଦନକାରୀ ଓକିଲ ଶରତ ରାୟଗୁରୁ ଅଦାଲତରେ ସତ୍ୟପାଠ ଦାଖଲ କରିବା ପରେ ଘଟଣା ନୂଆ ମୋଡ଼ ନେଇଛି। ରମେଶଙ୍କୁ ଗତ ୧୬ତାରିଖ ମଧ୍ୟରାତ୍ରିରେ ଘରୁ ପୋଲିସ ଉଠାଇ ନେଇଥିଲା ଏବଂ ପରେ ଜିଲା ମୁଖ୍ୟ ଚିକିତ୍ସାଳୟରେ ତାଙ୍କର ୧୮ତାରିଖରେ ମୃତ୍ୟୁ ହୋଇଥିବାନେଇ ପରିବାର ପକ୍ଷରୁ ଅଭିଯୋଗ ହୋଇଥିଲା। ତେବେ ରମେଶଙ୍କ ମୃତ ଦେହକୁ ପରିବାରକୁ ହସ୍ତାନ୍ତର ନ କରି ନଭେମ୍ବର ୧୯ରେ ସଂସ୍କାର କରାଯାଇଥିଲା। ଏହାର ଦିନକ ପରେ ଜାତୀୟ ମାନବାଧିକାର କମିଶନ (ଏନ୍‌ଏଚ୍‌ଆର୍‌ସି) ରାଜ୍ୟ ସରକାରଙ୍କୁ ଏହି ହାଜତ ମୃତ୍ୟୁ ସମ୍ପର୍କରେ ଜଣାଇବାକୁ ରିପୋର୍ଟ ତଲବ କରିଥିଲେ। ସୁପ୍ରିମକୋର୍ଟଙ୍କ ଗାଇଡଲାଇନକୁ ଉଲ୍ଲଂଘନ କରି ଏବେ ବି ହାଜତ ମୃତ୍ୟୁ ଭଳି ଘଟଣା ଘଟୁଥିବା ନେଇ ଏନ୍‌ଏଚ୍‌ଆର୍‌ସି ଉଦ୍‌ବେଗ ପ୍ରକାଶ କରିଥିଲେ। ଅପରପକ୍ଷରେ ରମେଶଙ୍କ ହାଜତରେ ମୃତ୍ୟୁ ହୋଇନାହିଁ, ବରଂ ତାଙ୍କୁ କାବୁ କରିବାକୁ ଗଲାବେଳେ ପୋଲିସ ସହିତ ଧସ୍ତାଧସ୍ତି ହେବାରୁ ସେ ତଳେ ପଡ଼ିଯାଇ ଆହତ ହୋଇଥିଲେ। ପରେ ତାଙ୍କୁ ହସ୍ପିଟାଲ ନିଆଯାଇଥିଲା ଏବଂ ସେଠାରେ ତାଙ୍କର ମୃତ୍ୟୁ ହୋଇଥିଲା ପୋଲିସ ହାଇକୋର୍ଟରେ ନିଜର ଜବାବ ଦାଖଲ କରିଥିଲା। ତେଣୁ ଏହି ଘଟଣାର ସତ୍ୟାସତ୍ୟ ଉନ୍ମୋଚନ ପାଇଁ ଅଦାଲତଙ୍କ ପ୍ରତ୍ୟକ୍ଷ ନିରୀକ୍ଷଣରେ ତଦନ୍ତ କରିବା ସହ ଘଟଣାରେ ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆବେଦନକାରୀ ଓକିଲ ରାୟଗୁରୁ ଅଦାଲତରେ ପ୍ରାର୍ଥନା କରିଛନ୍ତି।