କେସିଙ୍ଗା,୯ା୪(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର ୨୬ଟି ପଞ୍ଚାୟତରେ ଥିବା ୧୧୦ଟି ଗ୍ରାମରେ ପ୍ରଚଣ୍ଡ ଗ୍ରୀଷ୍ମତାପ ଯୋଗୁ ନଦୀନାଳ, ପୋଖରୀ, ଚେକ୍ ଡ୍ୟାମ୍, ନଳକୂପ ଶୁଖିଯାଉଛି। ସମଗ୍ର ୨୬ଟି ପଞ୍ଚାୟତରେ ସରକାରୀ ଓ ବେସରକାରୀ ୫୫୪ଟି ପୋଖରୀ ଅଛି। କେଉଁ ପୋଖରୀରେ ୨ରୁ୩ ତ ଆଉ କେଉଁଠି ୪ରୁ ୫ଫୁଟ ପାଣି ରହିଛି। ଗ୍ରୀଷ୍ମପ୍ରବାହରେ କେତେକ ପୋଖରୀ ସମ୍ପୂର୍ଣ୍ଣ ଶୁଖି ଗଲାଣି। ଘରୋଇ କୂଅଗୁଡ଼ିକ ଶୁଖିଯାଉଛି। ଜଳସ୍ତର ହ୍ରାସ ଯୋଗୁ କୂଅ, ପୋଖରୀ, ବୋର୍ଓ୍ବେଲ, ଚେକ୍ଡ୍ୟାମ ଓ ବିଭିନ୍ନ ଜଳାଶୟ ଶୁଖିବାରେ ଲାଗିଛି। ବର୍ତ୍ତମାନ ସମଗ୍ର କେସିଙ୍ଗା ବ୍ଲକରେ ଗ୍ରୀଷ୍ମପ୍ରବାହ ବୃଦ୍ଧି ପାଇବାରେ ଲାଗିଛି। ଗତ ମାର୍ଚ୍ଚରେ ତାପମାତ୍ରା ୩୬.୫ରୁ, ମାର୍ଚ୍ଚ ୨୯ରେ ୩୯.୮ ଡିଗ୍ରୀ ରହିଥିବାବେଳେ ବର୍ତ୍ତମାନ ୪୦.୨ ଡିଗ୍ରୀ ତାପମାତ୍ରା ଥିବା କେସିଙ୍ଗା ସିଡବ୍ଲ୍ୟୁସି କର୍ତ୍ତୃପକ୍ଷ ପ୍ରକାଶ କରିଛନ୍ତି। ପ୍ରଚଣ୍ଡ ଗ୍ରୀଷ୍ମ ତାତି ସାଙ୍ଗକୁ ଭୂତଳ ଜଳ ହ୍ରାସ ଓ ପାନୀୟ ଜଳ ଅଭାବ ଯୋଗୁ ଲୋକେ ଡହକବିକଳ ହେଉଛନ୍ତି। ଚାଷୀମାନେ ରବିଚାଷ ପାଇଁ ବହୁତ କଷ୍ଟ ଅନୁଭବ କରୁଛନ୍ତି। ବହୁ ସ୍ଥାନରେ ଭୂତଳ ଜଳସ୍ତର ହ୍ରାସ ଯୋଗୁ ଗ୍ରାମ୍ୟ ଜଳ ଯୋଗାଣ ବିଭାଗ(ଆର୍ବ୍ଲ୍ୟୁଏସ୍ଏସ୍ ବିଭାଗ ପକ୍ଷରୁ କେସିଙ୍ଗା ବ୍ଲକର ପ୍ରତ୍ୟେକ ଗ୍ରାମରେ ୧୮୧୦ଟି ନଳକୂଅ ସ୍ଥାପନ କରାଯାଇ ଥିବା ବିଭାଗ ପକ୍ଷରୁ ସୂଚନା ଦିଆଯାଇଛି। ଗ୍ରାମ୍ୟ ଜଳ ଯୋଗାଣ ବିଭାଗ ପକ୍ଷରୁ ଏକ ଭ୍ରାମ୍ୟମାଣ ଗାଡ଼ି କରାଯାଇଛି। କେସିଙ୍ଗା ଅଞ୍ଚଳର ଗ୍ରାମଞ୍ଚଳରେ ଥିବା ପୋଖରୀ, ନଈ, ଚେକ୍ଡ୍ୟାମ ଶୁଖି ଯିବାରୁ ଗାଈ,ଗୋରୁ,ଛେଳି, ମେଣ୍ଢା, ବତକ, ଇତ୍ୟାଦି ଗୃହପାଳିତ ପ୍ରାଣୀଙ୍କ ପାନୀୟଜଳ ପିଇବା ଓ ଗାଧୋଇବାରେ ସମସ୍ୟା ଦେଖାଯାଉଛି। ଏ ସଂକ୍ରାନ୍ତରେ କେସିଙ୍ଗା ଆର୍ଡବ୍ଲ୍ୟୁଏସ୍ଏସ୍ର ଉପଖଣ୍ଡ ଅଧିକାରୀ(S.D.O.) ଧର୍ମେନ୍ଦ୍ର ସେଠ୍ଙ୍କୁ ପଚାରିବାରୁ କେସିଙ୍ଗା ବ୍ଲକର ୨୬ଟି ପଞ୍ଚାୟତରେ ୧୮୧୦ଟି ନଳକୂଅ ଅଛି ଓ ଭ୍ରାମ୍ୟମାନ ଗାଡ଼ିର ବ୍ୟବସ୍ଥା କରାଯାଇଛି। ଯେଉଁ ଗ୍ରାମରୁ ଫୋନ୍ ଆସିଲେ ସେହି ଗ୍ରାମକୁ ତୁରନ୍ତ ଯାଇ ନଳକୂଅ ଠିକ୍ କରାଯାଉଛି ବୋଲି ପ୍ରକାଶ କରିଛନ୍ତି।
