ଭୁବନେଶ୍ୱର, ୧୧।୫(ବ୍ୟୁରୋ): ରାଜଧାନୀର ଇନ୍ଫୋସିଟି ଥାନା ଅନ୍ତର୍ଗତ ନନ୍ଦନବିହାରରେ ରହୁଥିବା ମଡେଲ ସୌମ୍ୟ ରଞ୍ଜନ ପାଣିଗ୍ରାହୀଙ୍କ ଆତ୍ମହତ୍ୟା ମାମଲା କମିଶନରେଟ ପୋଲିସ ପାଇଁ ଚିନ୍ତାର ବିଷୟ ପାଲଟିଛି। ହାଇକୋର୍ଟଙ୍କ ନିର୍ଦ୍ଦେଶକ୍ରମେ ପୋଲିସ ଏହି ଘଟଣାର ଅଢ଼େଇ ମାସ ପରେ ଏପ୍ରିଲ ୧୯ରେ ଅଭିଯୁକ୍ତ ପ୍ରେମିକା ସୋନାଲି ନନ୍ଦ ଓ ତାଙ୍କ ମା’ଙ୍କ ନାମରେ ମାମଲା (ନଂ. ୧୦୦/୨୦୨୨) ରୁଜୁ କରିଥିଲା। ତେବେ ଏଯାବତ୍ ସେମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ତେଣୁ ସୌମ୍ୟଙ୍କ ପରିବାର ଲୋକେ ମଙ୍ଗଳବାର ଭୁବନେଶ୍ୱରର ନୂତନ ଡିସିପି ପ୍ରତୀକ ସିଂଙ୍କୁ ଭେଟି ନ୍ୟାୟ ମାଗିଛନ୍ତି।
ସୌମ୍ୟଙ୍କ ମା’ ମୋହିନୀ ପାଣିଗ୍ରାହୀ, ଭଉଣୀ ଲକ୍ଷ୍ମୀପ୍ରିୟା ଏବଂ ଭିଣୋଇ ଡିସିପିଙ୍କୁ ମାମଲା ବିଷୟରେ ଜଣାଇଛନ୍ତି। ମାମଲା ରୁଜୁ ହୋଇଥିଲେ ବି କ’ଣ ପାଇଁ ପ୍ରେମିକା ଓ ତାଙ୍କ ମା’ଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ ତାହା ପଚାରିଥିଲେ। ଏହି ମାମଲା ସମ୍ପର୍କରେ ଅନୁଧ୍ୟାନ କରିବେ ବୋଲି ଡିସିପି ସିଂ ସେମାନଙ୍କୁ କହିଛନ୍ତି। ଅପରପକ୍ଷରେ, ନୂଆ ଡିସିପି ଏହି ମାମଲାକୁ ଗୁରୁତ୍ୱର ସହ ନେଇ ବିଚାର କରିବେ ବୋଲି ଆଶା ରଖିଥିବା ମୋହିନୀ ଗଣମାଧ୍ୟମକୁ କହିଛନ୍ତି। ଗାୟିକା ସୋନାଲିଙ୍କ ସହ ମଡେଲ୍ ସୌମ୍ୟ ପ୍ରେମ ସମ୍ପର୍କରେ ଥିଲେ। ଉଭୟଙ୍କ ମଧ୍ୟରେ ବିବାହ ସ୍ଥିର ହୋଇଥିଲା। ସୋନାଲି ପ୍ରତାରଣା କରିବାରୁ ସୌମ୍ୟ ଜାନୁୟାରୀ ୩୦ ତାରିଖ ରାତିରେ ତାଙ୍କ ରୁମ୍ରେ ଏକ ଚିଠି ଛାଡ଼ି ଯିବା ସହ ଫ୍ୟାନରେ ଝୁଲି ଆତ୍ମହତ୍ୟା କରିଥିଲେ। ତାଙ୍କ ମୃତ୍ୟୁ ଲାଗି ପ୍ରେମିକା ସୋନାଲିଙ୍କୁ ସେ ଦାୟୀ କରିଥିଲେ। ପରିବାର ଲୋକେ ଥାନାରେ ସୋନାଲି ଓ ତାଙ୍କ ମା’ଙ୍କ ନାଁରେ ଅଭିଯୋଗ କରିଥିଲେ ବି ପୋଲିସ କେବଳ ଅପମୃତ୍ୟୁ ମାମଲା ରୁଜୁ କରିଥିଲା। ତେଣୁ ସୌମ୍ୟଙ୍କ ଭଉଣୀ ଲକ୍ଷ୍ମୀପ୍ରିୟା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ୩ ସପ୍ତାହ ମଧ୍ୟରେ ଆଇନ୍ ଅନୁଯାୟୀ କାର୍ଯ୍ୟାନୁଷ୍ଠାନ ନେବାକୁ ତତ୍କାଳୀନ ଡିସିପି ଉମାଶଙ୍କର ଦାସଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ହେଲେ ୩ ସପ୍ତାହ ମଧ୍ୟରେ କୌଣସି କାର୍ଯ୍ୟାନୁଷ୍ଠାନ ନ ହେବାରୁ ସୌମ୍ୟଙ୍କ ପରିବାର ପକ୍ଷରୁ ଅଦାଲତ ଅବମାନନା ମାମଲା ଦାଏର କରାଯାଇଥିଲା। ଏପ୍ରିଲ୍ ୧୧ରେ ମାମଲାର ଅଗ୍ରଗତି ନେଇ ମେ ୫ ମଧ୍ୟରେ ଜଣାଇବାକୁ ହାଇକୋର୍ଟ ଭୁବନେଶ୍ୱର ଡିସିପିଙ୍କୁ ନିର୍ଦ୍ଦେଶ ଦେବାରୁ ସୋନାଲି ଓ ତାଙ୍କ ମା’ଙ୍କ ନାମରେ ଏକ ମାମଲା ରୁଜୁ କରାଯାଇଥିଲା।
