ପୁରୀ ଅଫିସ,୧୬।୧୨: ଶ୍ରୀମନ୍ଦିରରେ ଶ୍ରୀମହାପ୍ରଭୁଙ୍କ ଦେବଦୀପାବଳି ଉତ୍ସବ ମଙ୍ଗଳବାର ଶେଷ ହୋଇଛି। ମାର୍ଗଶିର ଶୁକ୍ଳ ପ୍ରତିପଦା ତିଥିରେ ମହାପ୍ରଭୁଙ୍କ ପହିଲି ଭୋଗ ନୀତି ପରେ ଦ୍ୱିତୀୟ ଭୋଗମଣ୍ଡପ ଅପରାହ୍ନ ୨ ଘଣ୍ଟା ୨୫ମିନିଟ୍ରେ ସମ୍ପନ୍ନ ହୋଇଛି। ଏହାପରେ ଦକ୍ଷିଣୀ ଘର ଭୋଗ ଶେଷ ହେବାପରେ ମହାପ୍ରଭୁଙ୍କ ମଇଲମ ଅପରାହ୍ନ ୪ଟା ୩୫ମିନିଟ୍ରେ ଶେଷ ହେବାପରେ ଶ୍ରୀଜୀଉମାନଙ୍କ ଶ୍ରାଦ୍ଧବେଶ ଅପରାହ୍ନ ୪ଟା ୪୦ମିନିଟ୍ରେ ଆରମ୍ଭ ହୋଇ ୫ଟା ୨୫ରେ ଶେଷ ହୋଇଥିଲା। ସନ୍ଧ୍ୟା ଆଳତି ୫ଟା ୩୦ରେ ଶେଷ ହୋଇଥିଲା। ସେହିପରି ସନ୍ଧ୍ୟାଧୂପ ପ୍ରସାଦ ବାହାରି ପାଣି ପଡ଼ିବାପରେ ଜୟବିଜୟ ଦ୍ୱାର ବନ୍ଦ ହୋଇ ପୋଛା ମରା ହୋଇଥିଲା। ଏହାପରେ ଦେବଦୀପାବଳି ସମାପନ ନିମନ୍ତେ ପୂର୍ବଦିନ ଭଳି ଚାଉଳ ଗଛ ହେବାପରେ ଦକ୍ଷିଣ ଘରୁ ଶ୍ରୀମଦନ ମୋହନଙ୍କୁ ବିଜୟ କରିଥିଲେ। ମୁଦିରସ୍ତ ପ୍ରସାଦ ଲାଗି ହେବାପରେ ୩ଜଣ ପୂଜାପଣ୍ଡା ସଂସ୍କାର କରିଥିଲେ। ଏହାପରେ ପୂଜାପଣ୍ଡା ପତି ମହାପାତ୍ର ମୁଦିରସ୍ତ ସିଂହାସନ ଉପରକୁ ଯାଇ ବନ୍ଦାପନା ନୀତି କରି ଓହ୍ଲାଇ ଠାକୁର ଠାକୁରାଣୀଙ୍କୁ ଆଜ୍ଞାମାଳ ଲାଗିପରେ ମହାଜନ ସେବକମାନେ ଠାକୁର, ଠାକୁରାଣୀଙ୍କୁ ହାତରେ ବିଜେ କରାଇ ଜୟ-ବିଜୟ ଦ୍ୱାର ଭିତର ପାଖରେ ହୋଇଥିବା ଚାଉଳ ଗଛ ନିକଟରେ ଛିଡ଼ା ହୋଇଥିଲେ। ପଢ଼ିଆରୀ ଜୟ-ବିଜୟ ଦୁଆର ଫିଟାଇବାପରେ ମହାଦୀପ ବନ୍ଦାପନା ଶେଷ ହୋଇ ମହାଦୀପ ନେଇ ଚୁନରା ସେବକମାନେ ଶ୍ରୀମନ୍ଦିର ଚୂଡାକୁ ବିଜୟ କରିଥିଲେ। ପରେ ଶ୍ରୀମଦନ ମୋହନ ଶ୍ରୀଦେବୀ ଭୂଦେବୀକୁ ମହାଜନ ସେବକମାନେ ହାତରେ ବିଜେ କରାଇ ଝୁଲଣ ମଣ୍ଡପ ତଳେ ଥିବା ବିମାନକୁ ବିଜୟ କରାଇଥିଲେ। ରୁନ୍ଧାବଡ଼ି ଫୁଲମାଳ ଲାଗି ହୋଇ ବିମାନବଡୁଙ୍କ ଦ୍ୱାରା ବିମାନକୁ ଜଗନ୍ନାଥ ବଲ୍ଲଭ ମଠକୁ ବିଜୟ କରାଇଥିଲେ। ସେଠାରେ ମୂଳିଆ ସୁଆସିଆଁରେ ଦେଇଥିବା କାଠ ଭଦ୍ରାସନ ଉପରେ ଆସ୍ଥାନ ପଢିଆରୀ କରିଥିବା ଚାଉଳ ଗଛରେ ଦୀପ ସଂସ୍କାର କରିଥିଲେ। ପରେ ମୁଦିରସ୍ତ ବନ୍ଦାପନା କରି ମହାପ୍ରଭୁଙ୍କ ପିତୃପୁରୁଷଙ୍କ ଉଦ୍ଦେଶ୍ୟରେ ଶ୍ରଦ୍ଧା କାର୍ଯ୍ୟ ସମାପନ କରି ବିଜେ ପ୍ରତିମାମାନେ ଶ୍ରୀମନ୍ଦିରଖୁ ବାହୁଡା ବିଜେ କରିଥିଲେ।
