ବାଷ୍ଟନ/ନୂଆଦିଲ୍ଲୀ,୨୨।୪: ଆମେରିକା ଗସ୍ତରେ ଯାଇଥିବା କଂଗ୍ରେସ ନେତା ତଥା ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ସେଠାର ଏକ କାର୍ଯ୍ୟକ୍ରମରେ ଭାରତର ନିର୍ବାଚନ କମିଶନଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ମହାରାଷ୍ଟ୍ର ନିର୍ବାଚନରେ ମତଦାନ ସଂଖ୍ୟାକୁ ନେଇ ସେ ପ୍ରଶ୍ନ ଉଠାଇବା ସହ ନିର୍ବାଚନ କମିଶନ ସାଲିସ୍ କରିଥିବା କହିଛନ୍ତି। ବିଦେଶ ମାଟିରେ ତାଙ୍କର ଏଭଳି ଅଭିଯୋଗକୁ ନେଇ ଭାଜପା ତୀବ୍ର ପ୍ରତିକ୍ରିୟା ପ୍ରକାଶ କରିବା ସହ ତାଙ୍କୁ ଦେଶଦ୍ରୋହୀ କହିଛି।
ରବିବାର ବୋଷ୍ଟନ୍ରେ ଏକ କାର୍ଯ୍ୟକ୍ରମରେ ରାହୁଲ କହିଥିଲେ, ମହାରାଷ୍ଟ୍ର ବିଧାନସଭା ନିର୍ବାଚନରେ ଯେତିକି ଲୋକ ଭୋଟ ଦେଇଛନ୍ତି, ତାହା ରାଜ୍ୟର ବୟସ୍କମାନଙ୍କ ସଂଖ୍ୟାଠାରୁ ଅଧିକ। ନିର୍ବାଚନ ଦିନ ଅପରାହ୍ନ ୫ଟା ୩୦ ସୁଦ୍ଧା ୬୫ ଲକ୍ଷ ଭୋଟର ମତଦାନ କରିଥିବା ନିର୍ବାଚନ କମିଶନ ତଥ୍ୟ ଦେଇଥିଲେ। ତେବେ ଏହା ବାସ୍ତବତା ଦୃଷ୍ଟିରୁ ଅସମ୍ଭବ। କାରଣ ଜଣେ ଭୋଟର ଭୋଟ ଦେବା ପାଇଁ ୩ ମିନିଟ୍ ସମୟ ଲାଗିବ। ତାହା ହୋଇଥିଲେ ଏତେସଂଖ୍ୟାରେ ମତଦାନ ପାଇଁ ରାତି ୨ଟା ପର୍ଯ୍ୟନ୍ତ ଭୋଟରମାନଙ୍କୁ ଲାଇନ୍ରେ ଛିଡ଼ାହେବାକୁ ପଡ଼ିଥାନ୍ତା, ଯାହା ହୋଇନାହିଁ। ମତଦାନ ବେଳର ଭିଡିଓଗ୍ରାଫି ଦେବାକୁ ନିର୍ବାଚନ କମିଶନ ମନା କରିଦେଇ ସେଥିପାଇଁ ଅନୁମତି ଦିଆଯାଇପାରିବ ନାହିଁ ବୋଲି ଆଇନରେ ପରିବର୍ତ୍ତନ କରାଇଥିବା ରାହୁଲ କହିଛନ୍ତି। ଏଥିରୁ ସ୍ପଷ୍ଟ ହେଉଛି ଯେ, ନିର୍ବାଚନ କମିଶନ ସାଲିସ୍ କରିଛନ୍ତି ଓ ବ୍ୟବସ୍ଥାରେ ତ୍ରୁଟି ରହିଛି, ଯାହାକୁ ମୁଁ ଅନେକ ବାର କହିଆସୁଛି କଂଗ୍ରେସ ନେତା କହିଛନ୍ତି।
ରାହୁଲଙ୍କ ମନ୍ତବ୍ୟ ଉପରେ ପ୍ରତିକ୍ରିୟା ଦେଇ ଭାଜପା ଏମ୍ପି ତଥା ଦଳର ରାଷ୍ଟ୍ରୀୟ ମୁଖାପତ୍ର ସମ୍ବିତ ପାତ୍ର କହିଛନ୍ତି, ନ୍ୟାଶନାଲ ହେରାଲ୍ଡ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କାର୍ଯ୍ୟାନୁଷ୍ଠାନ ଯୋଗୁ କ୍ଷୁବ୍ଧ ଥିବା ରାହୁଲ ବିଦେଶରେ ନିର୍ବାଚନ କମିଶନଙ୍କ ବିରୋଧରେ ବିଷୋଦ୍ଗାର କରିଛନ୍ତି। ବିଦେଶ ମାଟିରେ ଦେଶର ଅନୁଷ୍ଠାନକୁ ରାହୁଲ ଅପମାନିତ କରିଛନ୍ତି। ଦୁର୍ନୀତିରେ ସମ୍ପୃକ୍ତ ରାହୁଲ ଓ ତାଙ୍କ ମାଆ ସୋନିଆଙ୍କୁ ସମ୍ପତ୍ତି ହେରଫେର ମାମଲାରେ ଜେଲ ପଠାଯିବ ବୋଲି ଭାଜପା କହିଛି। ରାହୁଲ ଯେତେବେଳେ ବିଦେଶ ଯାଉଛନ୍ତି, ଭାରତ ଓ ଏହାର ଗଣତାନ୍ତ୍ରିକ ବ୍ୟବସ୍ଥା ବିରୋଧରେ ଘୃଣିତ ଚିନ୍ତାଧାରା ଶେୟାର କରିବାକୁ ଭୁଲୁନାହାନ୍ତି ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି।
