ରାଉରକେଲା,୧୭ା୬(ଦିନେଶ ମିଶ୍ର) ସ୍ମାର୍ଟସିଟି ରାଉରକେଲାରେ ଦିନକୁ ଦିନ ଜନସଂଖ୍ୟା ସାଙ୍ଗକୁ ଗାଡିମୋଟର ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏହାକୁ ଦୃଷ୍ଟିରେ ରଖି ସ୍ମାର୍ଟସିଟି ପକ୍ଷରୁ ବହୁ ଉନ୍ନୟନମୂଳକ କାର୍ଯ୍ୟକ୍ରମ କରାଯାଉଥିଲେ ମଧ୍ୟ ଟ୍ରାଫିକକୁ ଅଣଦେଖା କରାଯାଉଛି। ସହରରେ ଟ୍ରାଫିକ ନିୟନ୍ତ୍ରଣ ପାଇଁ ବିଭିନ୍ନ ଛକରେ ଟ୍ରାଫିକ ପୋଲିସଙ୍କ ପାଇଁ କୌଣସି ଟ୍ରାଫିକ ପୋଷ୍ଟ ନ ଥିବାରୁ ସେମାନେ ରାସ୍ତାକଡ଼ ଗଛମୂଳ ନଚେତ ଖୋଲା ଆକାଶ ତଳେ ଛିଡା ହୋଇ କାର୍ଯ୍ୟ କରୁଛନ୍ତି। ଅନ୍ୟପକ୍ଷେ ଢିଲା ଟ୍ରାଫିକ୍ ବ୍ୟବସ୍ଥା ଯୋଗୁ କମ୍ ବୟସର ପିଲାମାନେ ଦ୍ରୁତବେଗରେ ଗାଡ଼ି ଚାଳନା କରିବା ଯୋଗୁ ବିଭିନ୍ନ ସମୟରେ ଦୁର୍ଘଟଣାମାନ ଘଟୁଛି।
୨୦୧୬ ସେପ୍ଟେମ୍ବର ୨୦ ତାରିଖରେ ରାଉରକେଲା ସ୍ମାର୍ଟସିଟି ମାନ୍ୟତା ପାଇବା ପରେ ଟ୍ରାଫିକ ବ୍ୟବସ୍ଥାକୁ ତ୍ୱରାନିତ କରିବା ପାଇଁ ବିଭିନ୍ନ ଛକରେ ୨୨ଟି ଟ୍ରାଫିକ ପୋଷ୍ଟ୍ ବ୍ୟବସ୍ଥା କରାଯାଇଥିଲା। ସହରର ବିଶ୍ରା ଛକ, ଟ୍ରାଫିକ ଗେଟ୍, ଉଦିତନଗର, ପାନପୋଷ, ଛେଣ୍ଡ, ରେଲୱେ ଷ୍ଟେଶନ ଭଳି ପ୍ରମୁଖ ଛକମାନଙ୍କରେ ଏହି ପୋଷ୍ଟ କରାଯାଇଥିଲା। ସମୟକ୍ରମେ ବିଭାଗୀୟ ଅଣଦେଖା ମନୋଭାବ ଯୋଗୁ ବିଭିନ୍ନ ଛକରେ ଟ୍ରାଫିକ ପୋଷ୍ଟ ଗୁଡିକ ନଷ୍ଟ ହୋଇଯାଇଥିଲା। ଫଳରେ ଦୀର୍ଘଦୀନ ଧରି ଖତ ଖାଉଥିବା ଟ୍ରାଫିକ ପୋଷ୍ଟଗୁଡିକୁ ସ୍ଥାନୀୟ ସ୍ମାର୍ଟସିଟି ଓ ପୋଲିସ ପ୍ରଶାସନ ପକ୍ଷରୁ ଉଠାଇ ନିଆଯାଇଥିଲା। କିନ୍ତୁ ଟ୍ରାଫିକ ପୋଲିସ ପାଇଁ କୌଣସି ବିକଳ୍ପ ବ୍ୟବସ୍ଥା କରାଯାଇ ନ ଥିଲା। ଏଭଳି ପରିସ୍ଥିତିରେ ଟ୍ରାଫିକ ପୋଷ୍ଟରେ ଛିଡାହୋଇ ଟ୍ରାଫିକ ନିୟନ୍ତ୍ରଣ କରିବା କଷ୍ଟକର ହୋଇପଡିଥିଲା। ସ୍ମାର୍ଟସିଟିରେ କାର୍ଯ୍ୟରତ ବିଭିନ୍ନ ଛକରେ ଟ୍ରାଫିକ ପୋଲିସ ନାହିଁ ନ ଥିବା ହଇରାଣ ହୋଇଥିଲେ। ଏପରକି ବର୍ତ୍ତମାନ ସୁଦ୍ଧା ବିଭିନ୍ନ ଛକରେ କାର୍ଯ୍ୟରତ ଟ୍ରାଫିକ ପୋଲିସମାନଙ୍କ ପାଇଁ କୌଣସି ଟ୍ରାଫିକ ପୋଷ୍ଟ ବ୍ୟବସ୍ଥା କରାଯାଇ ନ ଥିବାରୁ ସେମାନେ ରାସ୍ତାକଡ ଓ ଗଛମୂଳ ନଚେତ ଖୋଲା ଆକାଶତଳେ ଛିଡା ହୋଇ ଡ୍ୟୁଟି କରୁଛନ୍ତି।
ଏଭଳି ପରିସ୍ଥିତିରେ ସେକ୍ଟର-୩ ଟ୍ରାଫିକ୍ ଛକରେ ଦୁଇ ସପ୍ତାହ ତଳେ ଜଣେ ଟ୍ରାଫିକ ପୋଲିସ ପ୍ରବଳ ଖରାରେ କାର୍ଯ୍ୟରତ ବେଳେ ଅସୁସ୍ଥ ହୋଇପଡିଥିଲେ। ସେହିପରି ପାନପୋଷ ହକି ଛକ, ବେଦବ୍ୟାସ, ଉଦିତନଗର ଛକରେ କାର୍ଯ୍ୟରତ ଟ୍ରାଫିକ ପୋଲିସ ପ୍ରବଳ ଖରା ଓ ବର୍ଷାରୁ ନିଜକୁ ରକ୍ଷା କରିବା ପାଇଁ ସେଠାରେ ଥିବା ବ୍ୟବସାୟୀଙ୍କ ଦୋକାନ ତଳେ ରହି କାର୍ଯ୍ୟ କରୁଥିବା ଦେଖିବାକୁ ମିଳିଛି। ଏମିତିକି ଟ୍ରାଫିକ ପୋଲିସଙ୍କ ପାଇଁ କୌଣସି ପାନୀୟ ଜଳ, ସିଙ୍ଗନାଲ ବ୍ୟବସ୍ଥା ନାହିଁ। ଆଗକୁ ବର୍ଷାଦିନ ଆସୁଥିବାବେଳେ ବିଭିନ୍ନ ଛକରେ ଟ୍ରାଫିକ ନିୟନ୍ତ୍ରଣ କିଭଳି ହେବ ସେ ନେଇ ସାଧାରଣରେ ଚିନ୍ତାପ୍ରକାଶ ପାଇଛି। ଏ ନେଇ ରାଉରକେଲା ଅତିରିକ୍ତ ଏସ୍ପି ବିକ୍ରମ କେଶରୀ ଭୋଇଙ୍କୁ ପଚାରିବାରୁ ସେ କହିଥିଲେ, ଟ୍ରାଫିକ ପୋଲିସ ପାଇଁ ପୋଷ୍ଟ ବ୍ୟବସ୍ଥା ଏକ ମୁଖ୍ୟ ସମସ୍ୟା ସାଜିଛି। ସ୍ମାର୍ଟସିଟି ପକ୍ଷରୁ ବର୍ତ୍ତମାନ ସହରରେ ଟ୍ରାଫିକ ନିୟନ୍ତ୍ରଣ ପାଇଁ ପ୍ରତ୍ୟେକ ଛକରେ ନୂତନ ପୋଷ୍ଟ ସହ ଟ୍ରାଫିକ୍ ଭାଓଲେଶନ ଡିଟେକ୍ଶନ ସିଷ୍ଟମ (ଟିଭିଡିଏସ୍) ଲାଗିଛି। ଏଥିସହ ୧୧୦ଟି ସ୍ଥାନରେ ୪୭୪ଟି ସିସି କ୍ୟାମେରା ବ୍ୟବସ୍ଥା କରାଯାଇଛି। ଆଗାମୀ ୩ ମାସ ଭିତରେ ଏହା କାର୍ଯ୍ୟକାରୀ ହେଲେ ଉକ୍ତ ସମସ୍ୟା ଦୂର ହେବ ବୋଲି ଭୋଇ ସୂଚନା ଦେଇଥିଲେ।
