ମୁମ୍ବାଇ,୧୪।୧: ବିକଶିତ ବଜାର ମଧ୍ୟରେ ଆମେରିକା ଶେୟାର ବଜାର ବର୍ତ୍ତମାନ ସବୁଠାରୁ ଭଲ କାରବାର କରୁଛି। ସେହିଭଳି ଅଭିବୃଦ୍ଧିଶୀଳ ବଜାରଗୁଡିକର କଥା ବିଚାରକୁ ନେଲେ ଭାରତ ସବୁଠାରୁ ଆଗରେ ରହିଛି। ବିକାଶଶୀଳ ବଜାରଗୁଡିକ ମଧ୍ୟରେ ଭାରତୀୟ ଶେୟାର ବଜାର ସବୁଠୁ ମହଙ୍ଗା ବୋଲି ଏକ ରିପୋର୍ଟରେ ପ୍ରକାଶ ପାଇଛି। ଏହି ବଜାରଗୁଡ଼ିକରେ ଅଧିକ ରିଟର୍ନ ମିଳିବା ଆଶା କମ୍ ରହିଛି। ନିବେଶ ଉପରେ ନିବେଶକ ଘାଟା ସହିବାର ଆଶଙ୍କା ମଧ୍ୟ ରହିଛି। ଭାରତର ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ ନିଫ୍ଟି ବର୍ତ୍ତମାନ ୨୮.୯୬ର ଫର୍ଓ୍ବାର୍ଡ ପିଇ ଉପରେ କାରବାର କରୁଛି। ଫରଓ୍ବାର୍ଡ ପିଇର ଅର୍ଥ ହେଲା ଏହା ଯେତେ ମହଙ୍ଗା ହେବ ବଜାର ସେତେ ମହଙ୍ଗା ହେବ। ଏହାକୁ ପ୍ରାଇସ ଟୁ ଆର୍ନିଂ ବୋଲି କୁହାଯାଇଥାଏ। ଅର୍ଥାତ୍ ଶେୟାର ମୂଲ୍ୟ ଏବଂ ଶେୟାର ପିଛା ହେଉଥିବା ହାରାହାରି ଆୟକୁ ଏଥିରେ ବିଚାର କରାଯାଇଥାଏ। ନିଫ୍ଟିର ହାରାହାରି ୫ ବର୍ଷର କାରବାରକୁ ବିଚାରକୁ ନେଲେ ଏହା ୪୮.୫୭% ପ୍ରିମିୟମ (ଅଧିକ ମୂଲ୍ୟ ପ୍ରଦାନ କରି) ଉପରେ କାରବାର କରୁଛି।
ଦ୍ୱିତୀୟ ଥର ଲାଗି ନିଫ୍ଟି ଏଭଳି ମହଙ୍ଗା ହୋଇଛି। ଯେତେବେଳେ ବଜାରରେ କୌଣସି ବଡ ଧରଣର ହ୍ରାସ ଦେଖାଦିଏ ସେତେବେଳେ ଏହା ଏକ ନୂଆ ଉଚ୍ଚ ସ୍ତର ହାସଲ କରିନିଏ। ୨୦୦୮ର ବିଶ୍ୱ ମାନ୍ଦାବସ୍ଥା ଯୋଗୁ ବଜାରରେ ବଡ ଧରଣର ହ୍ରାସ ପରିଲକ୍ଷିତ ହୋଇଥିଲା। ୨୦୦୮ ଜାନୁୟାରୀରୁ ଅକ୍ଟୋବର ମଧ୍ୟରେ ସୂଚକାଙ୍କ ପ୍ରାୟ ୬୦% ଖସିଥିଲା। ୨୦୦୮ର ଆରମ୍ଭରେ ନିଫ୍ଟି ଏହାର ହାରାହାରି ୫ ବର୍ଷର ପିଇର ୪୦% ସ୍ତରରେ କାରବାର କରୁଥିଲା। ଅଭିବୃଦ୍ଧିଶୀଳ ବଜାର ମଧ୍ୟରେ ଥାଇଲାଣ୍ଡ ବର୍ତ୍ତମାନ ୨୦.୩୧% ଫରଓ୍ବାର୍ଡ ପିଇରେ କାରବାର କରୁଛି। ୫ ବର୍ଷରେ ଏହାର ହାରାହାରି ପ୍ରିମିୟମ ୨୨.୪୭% ରହିଛି। ବିକଶିତ ବଜାର ମଧ୍ୟରେ ଆମେରିକାର ନାସ୍ଦାକ ୩୩.୮୮ ପିଇରେ କାରବାର କରୁଛି। ୫ ବର୍ଷରେ ଏହାର ହାରାହାରି ପ୍ରିମିୟମ ୩୬.୯୮% ରହିଛି। ଜାପାନର ନିକେଇ ୨୪.୯୬ ଫର୍ଓ୍ବାର୍ଡ ପିଇ ସ୍ତରରେ ରହିଥିବା ବେଳେ ୫ ବର୍ଷର ହାରାହାରି ପ୍ରିମିୟମ ୪୨.୧୯% ରହିଛି।
ବଜାର ମହଙ୍ଗା ହୋଇଥିଲେ ମଧ୍ୟ ଶେୟାର ବିକି ବଜାର ଛାଡିବାର ଏହା ସମୟ ନୁହେଁ ବୋଲି ବିଶେଷଜ୍ଞ କୁହନ୍ତି। ଅଧିକ ଭାଲ୍ୟୁଏଶନ ଏକ ଚିନ୍ତାର ବିଷୟ ହୋଇଥାଏ। ମାତ୍ର ନିବେଶକ କେବଳ ଭାଲ୍ୟୁଶନ ଆଧାର ଉପରେ ମାର୍କେଟ ଟାଇମିଂର ଆକଳନ କରିପାରିବେ ନାହିଁ। ନିଫ୍ଟିର ୧୮ ପ୍ରମୁଖ ଶେୟାର ୫ ବର୍ଷର ହାରାହାରି ଭାଲ୍ୟୁଏଶନ ତୁଳନାରେ ୪୦% ଅଧିକ ପ୍ରିମିୟମରେ କାରବାର କରୁଛନ୍ତି। ଏହା ମଧ୍ୟରେ ରିଲାଏନ୍ସ, ଟିସିଏସ୍, ଏଚ୍ସିଏଲ୍ ଟେକ୍ନୋଲୋଜି ଏବଂ ଏଚ୍ଡିଏଫ୍ସି ଭଳି କମ୍ପାନୀ ରହିଛନ୍ତି।