ଭଦ୍ରକ ଅଫିସ,୧୮।୨: ଭଦ୍ରକ ଜିଲା ତିହିଡ଼ି ବ୍ଲକ ଅଧୀନ ଗୋବିନ୍ଦପୁର ପଞ୍ଚାୟତ ସୋଳନ୍ଦୀ ନଦୀରେ ବୁଧବାର ସନ୍ଧ୍ୟାରେ ଜଣେ ମାଛଧରାଳିଙ୍କ ଜାଲରେ ଏକ ଡଲ୍ଫିନ ପଡ଼ିଛି। ଏହାର ଓଜନ ପ୍ରାୟ ୧ କୁଇଣ୍ଟାଲ ହେବ ବୋଲି ଅନୁମାନ କରାଯାଉଛି। ନଦୀ ତଟବର୍ତ୍ତୀ କୃତ୍ତିବାସପୁର ଗାଁର ଜଣେ ମାଛଧରାଳିଙ୍କ ଜାଲରେ ପଡ଼ିଥିଲା ଏହି ଡଲ୍ଫିନ। କୂଳକୁ ଅଣାଯିବା ପରେ ଡଲ୍ଫିନଟି ମରିପଡିଥିବା ଜଣାପଡ଼ିଥିଲା। ଖବର ପାଇ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ମୃତ ଡଲ୍ଫିନକୁ ନେଇଯାଇଥିଲେ। ସୂଚନା ଥାଉକି, ସମୁଦ୍ର ଉପକୂଳବର୍ତ୍ତୀ ବୈତରଣୀ ଓ ସାଳନ୍ଦୀ ନଦୀକୁ ଡଲଫିନଗୁଡ଼ିକ ଚଳପ୍ରଚଳ କରୁଥିବା ବେଳେ ବିଭିନ୍ନ ସମୟରେ ମାଛଧରା ଜାଲରେ ପଡ଼ି ମୃତ୍ୟୁ ହେଉଥିବା ରେକର୍ଡ଼ ମଧ୍ୟ ରହିଛି।
