ସୁନ୍ଦରଗଡ଼/କୁତ୍ରା,୨୨ା୭(ଡି.ଏନ୍.ଏ.): ସୁନ୍ଦରଗଡ଼ ଜିଲା କୁତ୍ରା ବ୍ଲକ ଅନ୍ତର୍ଗତ ଗଏରବହାଲ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ଆୟୁଷ ଡାକ୍ତର ସାରଦା ପ୍ରସନ୍ନ ବେହେରା ୪ ହଜାର ଟଙ୍କା ନେଉଥିବା ବେଳେ ଭିଜିଲାନ୍ସ ହାତରେ ଧରିପଡିଛନ୍ତି।
ଘଟଣାରୁ ପ୍ରକାଶ ଯେ, ଗତ ରବିବାର ଅଟୋ ଚାଳକ ଅରବିନ୍ଦ ଖାଲଖୋ ନିଜ ଓଟୋରେ ଛୁରିଚଖାରୁ ଯାତ୍ରୀ ନେଇ ବଡମାଲ ଆସୁଥିବା ବେଳେ ଏକ ବୁଲାଣିରେ ଭାରସାମ୍ୟ ହରାଇ ଓଲଟି ପଡ଼ିଥିଲେ । ସେଥିରେ ୩ ଜଣ ଆହତ ହୋଇଥିବା ବେଳେ ସମସ୍ତଙ୍କୁ ଗୋଏରବାହାଲ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଆଣାଯାଇଥିଲା। ତେବେ ସେଠାରେ ଦାୟିତ୍ୱରେ ଥିବା ଡାକ୍ତର ସାରଦା ପ୍ରସନ୍ନ ବେହେରା ୩ ଜଣଙ୍କ ଚିକିତ୍ସା ଓ ପୋଲିସକୁ ଖବର ନ ଦେବା ପାଇଁ ଗାଡ଼ିଚାଳକଙ୍କୁ ଟଙ୍କା ମାଗୁଥିଲେ ଏବଂ ତାଙ୍କ ଠାରୁ ପ୍ରଥମେ ୮ ହଜାର ଟଙ୍କା ନେଇଥିବା ବେଳେ ଆହୁରି ଟଙ୍କା ମାଗିବାରୁ ଅରବିନ୍ଦ ଗୁରୁବାର ସୁନ୍ଦରଗଡ଼ ଭିଜିଲାନ୍ସ ପାଖରେ ଅଭିଯୋଗ କରିଥିଲେ। ଆଜି ପୁଣି ଆଉ ୪ ହଜାର ଟଙ୍କା ନେଉଥିବା ବେଳେ ସୁନ୍ଦରଗଡ଼ ଭିଜିଲାନ୍ସ ଡିଏସ୍ପି ସୁଧାଂଶୁ ଶେଖର ପୂଜାରୀ ଓ ତାଙ୍କ ଟିମ୍ ଆସି ଡାକ୍ତରଙ୍କ ସରକାରୀ କ୍ବାର୍ଟରରେ କାବୁ କରିଥିଲେ।
