ସାତମାଇଲ, ୬ା୫ ଅକ୍ଷୟତୃତୀୟାରେ ସରିଛି ଅଖିମୁଠି ଅନୁକୂଳ। ବିହନ ବୁଣି ଚାଷ ପାଇଁ ପାଗ ଭିଡ଼ିଲେଣି ଚାଷୀ। ଚଳିତ ବର୍ଷ ମୌସୁମୀ ବର୍ଷା ସ୍ବାଭାବିକ ହେବ ବୋଲି ପାଣିପାଗ ବିଭାଗ କରିଥିବା ଅନୁମାନ ସେମାନଙ୍କ ମଧ୍ୟରେ ଖେଳାଇ ଦେଇଛି ଉଲ୍ଲାସ। କରୋନା ମହାମାରୀ, ଅନାବୃଷ୍ଟି ଏବଂ ଅତିବୃଷ୍ଟି ଭଳି ପ୍ରାକୃତିକ ବିପର୍ଯ୍ୟୟ ପାଇଁ ଦୁଇବର୍ଷ ହେଲା ଚାଷକାର୍ଯ୍ୟ ପ୍ରଭାବିତ ହୋଇଥିବାବେଳେ ଚଳିତବର୍ଷ ଏଥିରୁ ମୁକୁଳିବାକୁ ଆଶା ବାନ୍ଧିଛି ଚାଷୀ ପରିବାର। ତେବେ କୋମାରେ ଥିବା କୃଷି ବିଭାଗ ପାଇଁ ଚିନ୍ତାରେ ପଡ଼ିଛନ୍ତି ଢେଙ୍କାନାଳ ଜିଲା ହିନ୍ଦୋଳ ବ୍ଲକ ଅଞ୍ଚଳର ଚାଷୀ। ଯୋଜନାର ସଫଳ ରୂପାୟନରେ ଅଧିକାରୀଙ୍କ ଆନ୍ତରିକତା ଅଭାବ, ଫସଲ ବୀମା ଟଙ୍କା ନ ମିଳିବା ସର୍ବୋପରି ହାତରେ ଅର୍ଥ ନ ଥିବାରୁ ଖରିଫ୍ ଚାଷ କେମିତି ଆରମ୍ଭ ହେବ ତାହାକୁ ନେଇ ବ୍ୟସ୍ତବିବ୍ରତ ହୋଇପଡ଼ିଛନ୍ତି ସେମାନେ।
ଢେଙ୍କାନାଳ ଜିଲାର ବୃହତ୍ତମ ବ୍ଲକ ହିନ୍ଦୋଳ ୩୫ ପଞ୍ଚାୟତକୁ ନେଇ ଗଠିତ। ବ୍ଲକ ଏବଂ ୧୬ ଓ୍ବାର୍ଡବିଶିଷ୍ଟ ଏନ୍ଏସିର ଅଧିକାଂଶ ପରିବାର କୃଷି ଉପରେ ନିର୍ଭରଶୀଳ। ହିନ୍ଦୋଳ ସଦରରେ ଚାଷୀଙ୍କ ପରାମର୍ଶ ପାଇଁ କାର୍ଯ୍ୟାଳୟ ରହିଛି। ଚାଷଜନିତ ସମସ୍ୟାର ସମାଧାନ କରିବା ପାଇଁ ଏଠାରେ କାର୍ଯ୍ୟ କରୁଛନ୍ତି କୃଷି ଅଧିକାରୀ, ସରକାରୀ କୃଷି ଅଧିକାରୀ, କୃଷି ଅଧିଦର୍ଶକ। ଏଥିସହ କୃଷି ଯୋଜନାର ସଫଳ ରୂପାୟନ ପାଇଁ କ୍ଷେତ୍ରସ୍ତରରେ ୧୦ ଭିଏଡବ୍ଲ୍ୟୁ ଏବଂ କୃଷକ ସାଥୀ ନିଯୁକ୍ତି ପାଇଛନ୍ତି। ତେବେ ଅଧିକାଂଶ ସମୟରେ କାର୍ଯ୍ୟାଳୟରେ କାହାରି ଦେଖାମିଳୁନାହିଁ। ଅଫିସ୍ରେ ତାଲା ଝୁଲୁଛି। ତେଣୁ ଉଚିତ ପରାମର୍ଶ ନ ପାଇ ଚାଷୀ ବାଟବଣା ହେଉଥିବା ଅଭିଯୋଗ ହେଉଛି।
ଚାଷୀଙ୍କ କହିବା କଥା, ମରୁଡ଼ି କାରଣରୁ ଗତ ଖରିଫ୍ ଋତୁରେ ବ୍ୟାପକ ଫସଲ ନଷ୍ଟ ହୋଇଥିଲା। ପ୍ରିମିୟମ ପୈଠ ସତ୍ତ୍ୱେ ଫସଲ କ୍ଷତିଜନିତ ବୀମାଟଙ୍କା ଅଦ୍ୟାବଧି ମିଳିନାହିଁ। ଏ ନେଇ ବୀମା କମ୍ପାନୀ କୌଣସି ସ୍ପଷ୍ଟୀକରଣ ଦେଉନାହିଁ। କେନ୍ଦ୍ର ସରକାରଙ୍କ ‘ପିଏମ୍-କିଷାନ’ ଏବଂ ରାଜ୍ୟ ସରକାରଙ୍କ ‘କାଳିଆ’ ଯୋଜନାରେ ଶତାଧିକ ଅଣଚାଷୀ ସାମିଲ ହୋଇଛନ୍ତି। ତେଣୁ ପ୍ରକୃତ ହିତାଧିକାରୀଙ୍କ ପାଖରେ ସୁବିଧା ପହଞ୍ଚତ୍ ପାରୁନାହିଁ। ଉକ୍ତ ଯୋଜନାରେ ସାମିଲ ହୋଇଥିବା କେତେଜଣ ଚାଷୀ ପ୍ରଥମ, ଦ୍ୱିତୀୟ କିସ୍ତି ଟଙ୍କା ପାଇବା ପରେ ଜମାଖାତାକୁ ଅର୍ଥ ଆସୁନାହିଁ। ବିହନ ଓ କୃଷି ଉପକରଣ ବଣ୍ଟନରେ ପାତର ଅନ୍ତର କରାଯାଉଛି। ଅଧିକାରୀମାନେ ନିୟମିତ କାର୍ଯ୍ୟାଳୟକୁ ଆସୁନାହାନ୍ତି। ଚାଷୀଙ୍କ ସହିତ ସମ୍ପର୍କ ରଖୁ ନ ଥିବାରୁ ଉଚିତ ପରାମର୍ଶ ମିଳିପାରୁନାହିଁ। ଏହାର ସମାଧାନ ନିମନ୍ତେ ଚାଷୀମାନେ କୃଷି କାର୍ଯ୍ୟାଳୟକୁ ଦୌଡୁଥିଲେ ମଧ୍ୟ ଅଧିକାରୀମାନେ ଅଣଦେଖା କରୁଛନ୍ତି। ତେଣୁ କୃଷକ କଲ୍ୟାଣ ଯୋଜନା ବାଟ ହୁଡ଼ିଥିବା ସେମାନେ କହିଛନ୍ତି। ତଳରୁ ଉପର ଯାଏ ଦୁର୍ନୀତି ଚରମସୀମାରେ ପହଞ୍ଚତ୍ଛି। ଏକ ଉଚ୍ଚସ୍ତରୀୟ କମିଟି ଦ୍ୱାରା ତଦନ୍ତ କରାଗଲେ ଦୁର୍ନୀତିଗ୍ରସ୍ତ ଅଧିକାରୀଙ୍କ ମୁଖା ଖୋଲିବ ବୋଲି ଚାଷୀମାନେ ଦାବି କରିଛନ୍ତି।
