ତିର୍ତ୍ତୋଲ,୨୪ା୫ (ଡି.ଏନ୍.ଏ.):ଭାଇ ବାହାଘର ସମୟରେ ଜଣେ ମହିଳା ତହସିଲଦାର କୋଭିଡ୍ ନିୟମ ଉଲ୍ଲଂଘନ କରି ନାଚୁଥିବା ଭିଡିଓ ଭାଇରାଲ ହୋଇଛି। ସେ ଯାଜପୁର ଜିଲାର ଜଣେ ତହସିଲଦାର ହୋଇଥିବାବେଳେ ଶୁକ୍ରବାର ରାତିରେ ଭାଇଙ୍କ ବାହାଘର ବରଯାତ୍ରୀ ଦଳ ସହ ଜଗତ୍ସିଂହପୁର ଜିଲା ତିର୍ତ୍ତୋଲ ଥାନା ଅଧୀନ ଜଗନ୍ନାଥପୁର ଗ୍ରାମକୁ ଆସିଥିଲେ। ମାତ୍ର ଏହି ସମୟରେ କୋଭିଡ୍ ନିୟମ ମାନିବାକୁ ସମ୍ପୂର୍ଣ୍ଣ ଭୁଲିଯାଇଥିଲେ। ଲକ୍ଡାଉନ୍ ସମୟରେ ବିବାହ ଉତ୍ସବରେ କେବଳ ୨୫ଜଣ ଯୋଗଦେବା ପାଇଁ ନିୟମ ଥିବା ବେଳେ ଏହାକୁ ଉଲ୍ଲଂଘନ କରାଯାଇ ବରଯାତ୍ରୀ ଦଳରେ ଶତାଧିକ ଲୋକ ସାମିଲ ହୋଇଥିଲେ। କାହା ମୁହଁରେ ମାସ୍କ ନ ଥିବା ବେଳେ କେହି ସାମାଜିକ ଦୂରତ୍ୱ ମାନି ନ ଥିବା ଉକ୍ତ ଭିଡିଓରେ ଦେଖିବାକୁ ମିଳିଛି। ଏପରି କି ସମ୍ପୃକ୍ତ ତହସିଲଦାର ମଧ୍ୟ କୌଣସି ନିୟମ ନ ମାନି ନାଚଗୀତରେ ମସ୍ଗୁଲ୍ ଥିବା ଜଣାପଡ଼ିଛି। ତାଙ୍କ ବ୍ୟତୀତ ଉକ୍ତ ବରଯାତ୍ରୀ ଦଳରେ ବହୁ ହାଇପ୍ରୋଫାଇଲ ଲୋକ ଓ ପ୍ରଶାସନିକ ଅଧିକାରୀ ମଧ୍ୟ ସାମିଲ ହୋଇଥିଲେ। ଜଗନ୍ନାଥପୁର ବଜାରଠାରୁ ବରଯାତ୍ରୀ ଦଳ ପାଖାପାଖି ଗୋଟିଏ କିଲୋମିଟର ପର୍ଯ୍ୟନ୍ତ ବାଣ ଫୁଟାଇ, ଡିଜେ ବଜାଇ ଶୋଭାଯାତ୍ରା କରିଥିଲେ। ଖବରପାଇ ତିର୍ତ୍ତୋଲ ପୋଲିସର ଏକ ଟିମ୍ ଘଟଣାସ୍ଥଳରେ ପହଞ୍ଚତ୍ ଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନ ନେଇ ଫେରିଆସିଥିବା ଚର୍ଚ୍ଚା ହୋଇଛି। ସାଧାରଣ ଲୋକ ନିୟମ ଭାଙ୍ଗିଲେ ପୋଲିସ ମାଡ଼ମାରି ଜରିମାନା ଆଦାୟ କରୁଥିବା ବେଳେ ଏଠାରେ ଚୁପ କାହିଁକି ରହିଲା ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏସମ୍ପର୍କରେ ତିର୍ତ୍ତୋଲ ଏସ୍ଡିପିଓ ଦୀପକ କୁମାର ଜେନା କହିଛନ୍ତି, ରବିବାର ସମ୍ପୃକ୍ତ ଗ୍ରାମକୁ ଏକ ପୋଲିସ ଟିମ୍ ଯାଇ ଘଟଣାର ତଦନ୍ତ କରିଛିି। ଉକ୍ତ ବିବାହ ଉତ୍ସବରେ କୋଭିଡ ନିୟମ ଉଲ୍ଲଂଘନ ହୋଇଥିବା ଜଣାପଡ଼ିଛି। ଏନେଇ ମାମଲା ରୁଜୁ ହେବ ବୋଲି ସେ କହିଛନ୍ତି।
