କେନ୍ଦ୍ରାପଡ଼ା ଅଫିସ,୧୬।୧୧: କୋଭିଡ୍-୧୯ ପରିଚାଳନା ପାଇଁ କେନ୍ଦ୍ରାପଡ଼ା ଜିଲାପାଳଙ୍କ କାର୍ଯ୍ୟାଳୟରୁ ଏପ୍ରିଲ ୯ରୁ ଅକ୍ଟୋବର ୨୨ ପର୍ଯ୍ୟନ୍ତ ଜିଲା ସ୍ବାସ୍ଥ୍ୟ ଅଧିକାରୀଙ୍କ ନିକଟକୁ ୧,୫୦,୬୪,୧୧୧ଟଙ୍କା ପଠାଯାଇଛି। ଏଥିରୁ କୋଭିଡ୍ ଯୋଦ୍ଧାଙ୍କ ଖାଇବା ପାଇଁ ୯୮,୫୨,୫୩୦ ଟଙ୍କା ଅର୍ଥାତ ୬୫ ପ୍ରତିଶତ ଖର୍ଚ୍ଚ ହୋଇଛି। ମାର୍ଶାଘାଇ ବ୍ଲକ ଗୋଖାପଡ଼ା ଗଁାର ସୂଚନା ଅଧିକାର କର୍ମୀ ପ୍ରକାଶ ଚନ୍ଦ୍ର ଦାସ କୋଭିଡ୍-୧୯ ବାବଦ ଖର୍ଚ୍ଚ ସମ୍ପର୍କରେ ସୂଚନା ଅଧିକାର ଆଇନ ଅନୁଯାୟୀ ଜିଲା ପ୍ରଶାସନକୁ ତଥ୍ୟ ମାଗିଥିଲେ। ଗତ ୭ ତାରିଖରେ ଜିଲା ପ୍ରଶାସନ ପକ୍ଷରୁ ତାଙ୍କୁ ଉପରୋକ୍ତ ତଥ୍ୟ (ଚିଠି ନଂ. ୧୨୧୧୬) ପ୍ରଦାନ କରାଯାଇଛି। ଦେଶରେ କରୋନା ସଂକ୍ରମଣ ମାର୍ଚ୍ଚରୁ ଆରମ୍ଭ ହୋଇଥିଲେ ମଧ୍ୟ କେନ୍ଦ୍ରାପଡ଼ା ଜିଲାରେ ଏପ୍ରିଲ ୭ରେ ପ୍ରଥମ ସଂକ୍ରମିତ ଆଳି ଅଞ୍ଚଳରୁ ଚିହ୍ନଟ ହୋଇଥିଲେ। ସଂକ୍ରମଣ ସଂଖ୍ୟା ଅଧିକ ହେବା ଆଶଙ୍କା ଥିବାରୁ ସେ ସମୟରେ ପଞ୍ଚାୟତ ଓ ସହରାଞ୍ଚଳରେ ସଙ୍ଗରୋଧ କେନ୍ଦ୍ର ଖୋଲାଯାଇଥିଲା। ବ୍ଲକସ୍ତରରେ କୋଭିଡ୍ କେୟାର ସେଣ୍ଟର ଓ ଛତାଠାରେ କୋଭିଡ୍ ହସ୍ପିଟାଲ ଆରମ୍ଭ ହୋଇଥିଲା। ଏହାର ପରିଚାଳନା ଦାୟିତ୍ୱ ଜିଲା ସ୍ବାସ୍ଥ୍ୟ ବିଭାଗ ନେଇଥିଲା। ପ୍ରଦତ୍ତ ସୂଚନା ଅନୁଯାୟୀ, ଉପରୋକ୍ତ ସମୟ ମଧ୍ୟରେ କୋଭିଡ୍ ହସ୍ପିଟାଲ, ସଙ୍ଗରୋଧ କେନ୍ଦ୍ରରେ ନିଯୁକ୍ତ ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କ ଖାଇବା ଖର୍ଚ୍ଚ ହେଉଛି ୭୭,୫୧, ୩୮୦ ଟଙ୍କା। ସେହିପରି ଜିଲାରେ କରୋନା ସଂକ୍ରମିତଙ୍କ ସେବା ପାଇଁ ନିଯୁକ୍ତ ଭୁବନେଶ୍ୱରର ଏକ ଘରୋଇ ହସ୍ପିଟାଲ କର୍ମଚାରୀଙ୍କ ରହିବା, ଖାଇବା ପାଇଁ ୧୫,୨୧,୧୪୦ ଟଙ୍କା ଏବଂ କଲ ସେଣ୍ଟରରେ କାର୍ଯ୍ୟରତ କର୍ମଚାରୀଙ୍କ ଖାଇବା ନେଇ ୫,୮୦,୦୧୦ ଟଙ୍କା ଖର୍ଚ୍ଚ ହୋଇଛି। ଏଭଳି ମୋଟ ୯୮,୫୨,୫୩୦ ଟଙ୍କା ଖାଇବା ବାବଦକୁ ଖର୍ଚ୍ଚ କରାଯାଇଛି।
ସେହିପରି ଫିଜିସିଆନ୍ସ ଅଫିସ୍ ଲାବରେଟୋରିରେ ୧୬,୩୩,୯୧୮ଟଙ୍କା ଖର୍ଚ୍ଚ ହୋଇଛି। ମାସ୍କ, ପିପିଇ କିଟ୍, ସାନିଟାଇଜର, ବେଡଶିଟ୍ ବାବଦରେ ୧୧,୧୯,୯୪୩ ଟଙ୍କା, ସିକ୍ୟୁରିଟି, ସ୍ବାସ୍ଥ୍ୟକେନ୍ଦ୍ର ଓ ହେଲ୍ପ ଡେସ୍କ କର୍ମଚାରୀଙ୍କ ଦରମା ପାଇଁ ୧୭,୧୧,୩୨୦ ଟଙ୍କା, କଲ୍ ସେଣ୍ଟର କର୍ମଚାରୀଙ୍କ ଦୈନିକ ମଜୁରି ବାବଦରେ ୪,୨୬,୨୦୦ ଟଙ୍କା ଏବଂ ସ୍ବାସ୍ଥ୍ୟକର୍ମୀଙ୍କ ପ୍ରୋତ୍ସାହନ ନିମନ୍ତେ ୩,୨୦,୮୦୦ ଟଙ୍କା ଖର୍ଚ୍ଚ ହୋଇଥିବା ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି। ସଙ୍ଗରୋଧ କେନ୍ଦ୍ର ଓ ଛତାସ୍ଥିତ କୋଭିଡ୍ ହସ୍ପିଟାଲରେ ହୋଇଥିବା ଖର୍ଚ୍ଚର ସବିଶେଷ ତଥ୍ୟ ପ୍ରଦାନ କରାଯାଇ ନ ଥିବା ସୂଚନା ଅଧିକାର କର୍ମୀ ଦାସ କହିଛନ୍ତି। ସୂଚନାଯୋଗ୍ୟ, ଜିଲାରେ ଅକ୍ଟୋବର ୨୨ ସୁଦ୍ଧା ୭,୦୩୧ ଜଣ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ୬,୩୬୬ ସୁସ୍ଥ ହୋଇଥିଲେ। ଏହି ସମୟ ଅବଧିରେ ବହୁ କରୋନା ଆକ୍ରାନ୍ତ ହସ୍ପିଟାଲ ଓ କୋଭିଡ୍ କେୟାର ସେଣ୍ଟର ବ୍ୟତୀତ ସଙ୍ଗରୋଧ ନିୟମ ମାନି ନିଜସ୍ବ ଗୃହରେ ଚିକିତ୍ସିତ ହେଉଥିଲେ।
