ସମ୍ବଲପୁର,୧୩।୨(ବ୍ୟୁରୋ): ସମ୍ବଲପୁର ଜିଲା ଭିମସାର ମେଡିକାଲର ସହକାରୀ ପ୍ରଫେସର ଡାକ୍ତର ଶଙ୍କର ରାମଚନ୍ଦାନି ଶୁକ୍ରବାରଠାରୁ ୧ ଟଙ୍କା ଫି ନେଇ ଚିକିତ୍ସା ସେବା ଆରମ୍ଭ କରିଛନ୍ତି। ତାଙ୍କ ସ୍ତ୍ରୀ ଡାକ୍ତର ଶିଖା ମଧ୍ୟ ଚିକିତ୍ସା କରିବେ ବୋଲି ଡାକ୍ତର ଚନ୍ଦାନି କହିଛନ୍ତି। ସେ ଆହୁରି କହିଛନ୍ତି, ଡାକ୍ତରଖାନାରେ କାର୍ଯ୍ୟ ସାରିବା ପରେ ଘରେ ମାଗଣାରେ ଗରିବ ନିରୀହ ଲୋକଙ୍କୁ ଚିକିତ୍ସା ଦେବା ପାଇଁ ବହୁଦିନରୁ ଅଭିଳାଷ ରହିଥିଲା। ମୋର ମାଆ ଲାଜବତି ମଧ୍ୟ ଏଭଳି ମାଗଣା ସେବା ଦେବାକୁ କହିଥିଲେ। ତେଣୁ ଭଡ଼ାଘରେ ଶୁକ୍ରବାରଠାରୁ ଏହା ଆରମ୍ଭ କରିଛି। ସବୁ କାମର ପାରିଶ୍ରମିକ ରହିବା ଦରକାର। ମାଗଣା ହେଲେ ମୂଲ୍ୟ ବୁଝାପଡେ ନାହିଁ। ତେଣୁ ୧ ଟଙ୍କା ଫି ରଖାଯାଇଛି। ଅତି ଗରିବ ରୋଗୀଙ୍କ ରକ୍ତ, ମଳ, ମୂତ୍ର ଭଳି ପରୀକ୍ଷା ମଧ୍ୟ ମାଗଣାରେ କରିବା ପାଇଁ ଚେଷ୍ଟା କରିବି। ପ୍ରଥମ ଦିନରେ ୩୩ ଜଣ ରୋଗୀ ଆସିଥିଲେ। ସେମାନଙ୍କ ମଧ୍ୟରୁ ୪ ଜଣଙ୍କ ମାଗଣାରେ ପରୀକ୍ଷା କରାଯାଇଥିଲା। ପରବର୍ତ୍ତୀ ସମୟରେ ଚିକିତ୍ସା ସମୟସୀମା ବୃଦ୍ଧି କରାଯିବ। ସକାଳ ୭ଟା ୩୦ ମିନିଟରୁ ୮ଟା ୩୦ ମିନିଟ ପର୍ଯ୍ୟନ୍ତ ସମୟ ରହିବ। ସ୍ତ୍ରୀ ଶିଖା ମଧ୍ୟ ସହଯୋଗ କରିବେ। ସେ ଓରାଲ ସର୍ଜରୀ ଉପରେ ଚିକିତ୍ସା କରିବେ।
