ଜଳନ୍ଧର,୨୯ା୧୦: ଡିଫେଣ୍ଡିଂ ଚାମ୍ପିୟନ ଭାରତୀୟ ହକି ଦଳ ଚଳିତ ଏସିଆନ ଚାମ୍ପିୟନ୍ସ ଟ୍ରଫି ହକି ଟୁର୍ନାମେଣ୍ଟରେ ବିଜୟ ଧାରା ଜାରି ରଖିଛି। ଗୁରୁବାର ଅନୁଷ୍ଠିତ ମ୍ୟାଚ୍ରେ ଅଧିନାୟକ ହରମନପ୍ରୀତ ସିଂ (୨୭ ଓ ୩୧ତମ) ଓ ସୁଖଜିତ ସିଂ(୧୨ ଓ ୩୪ତମ)ଙ୍କ ଡବଲ ଗୋଲ ବଳରେ ଭାରତ ୫-୨ ଗୋଲରେ ଚାଇନାକୁ ପରାସ୍ତ କରିଛି।
ଲଗାତର ଦୁଇ ମ୍ୟାଚ୍ରେ ଦ୍ୱିତୀୟ ବିଜୟ ସହ ୬ ଦଳ ବିଶିଷ୍ଟ ଏହି ପ୍ରତିଯୋଗିତାରେ ଶୀର୍ଷ ସ୍ଥାନ ଅଧିକାର କରିଛି। ମାଲେସିଆ ଓ ଜାପାନ ପାଖରେ ସମାନ ୬ ପଏଣ୍ଟ ରହିଛି। ହେଲେ ସେମାନେ ଗୋଲ ବ୍ୟବଧାନରେ ଭାରତଠାରୁ ପଛରେ ରହିଥିବାରୁ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନରେ ରହିଛନ୍ତି।
ଆଶା ଅନୁଯାୟୀ ମ୍ୟାଚ୍ ଆରମ୍ଭରୁ ହିଁ ଭାରତ ଆଟାକିଂ ଖେଳ ପ୍ରଦର୍ଶନ କରିଥିଲା। ଚାଇନାର ଡିଫେନ୍ସ ବିଭାଗର ଉନ୍ନତ ପ୍ରଦର୍ଶନ ସତ୍ତ୍ୱେ ୧୨ତମ ମିନିଟ୍ରେ ସୁଖଜିତ ସିଂଙ୍କ ଗୋଲ ବଳରେ ଭାରତ ଖାତା ଖୋଲିଥିଲା। ଦ୍ୱିତୀୟ କ୍ୱାର୍ଟରର ୨୬ତମ ମିନିଟ୍ରେ ଚାଇନାକୁ ମିଳିଥିବା ପେନାଲ୍ଟି କର୍ନର (ପିସି)କୁ ଗୋଲରେ କନଭର୍ଟ କରି ୟାଙ୍ଗ ପେଙ୍ଗ ସ୍କୋର ଲାଇନକୁ ବରାବର କରିଥିଲେ।
ପରବର୍ତ୍ତୀ ମିନିଟ୍ରେ ଭାରତକୁ ମିଳିଥିଲା ଏକ ପିସି, ଯାହାକୁ ଅଧିନାୟକ ହରମନପ୍ରୀତ ସିଂ(୨୭ତମ) ଗୋଲରେ ପରିଣତ କରି ଭାରତକୁ ୨-୧ ଗୋଲରେ ଆଗୁଆ କରାଇଥିଲେ। ତୃତୀୟ କ୍ୱାର୍ଟରର ୩୧ତମ ମିନିଟ୍ରେ ଭାରତକୁ ଆଉ ଏକ ପିସି ମିଳିଥିଲା, ଯାହାକୁ ହରମନପ୍ରୀତ ଗୋଲରେ ପରିଣତ କରିଥିଲେ। ଏହାପରେ ସଞ୍ଜୟଠାରୁ ପାଇଥିବା ପାସ୍ରୁ ସୁଖଜିତ (୩୪ତମ) ଏକ ଦର୍ଶନୀୟ ଫିଲ୍ଡ ଗୋଲ ସ୍କୋର କରିଥିଲେ।
ଏହା ତାଙ୍କର ବ୍ୟକ୍ତିଗତ ଦ୍ୱିତୀୟ ଗୋଲ ଥିଲା। ୩୬ତମ ମିନିଟ୍ରେ ଚାଇନାକୁ ମିଳିଥିବା ପିସିକୁ ଚେନ ଚଙ୍ଗକଙ୍ଗ ଗୋଲରେ କନଭର୍ଟ କରି ଭାରତର ଅଗ୍ରଣୀ ବ୍ୟବଧାନକୁ ହ୍ରାସ କରିଥିଲେ। ଚତୁର୍ଥ ତଥା ଅନ୍ତିମ କ୍ୱାର୍ଟରର ୪୭ତମ ମିନିଟ୍ରେ ଭାରତକୁ ଆଉ ଏକ ପିସି ମିଳିଥିଲା, ଯେଉଁଥିରୁ ଜୁଗରାଜ ସିଂ ଭାରତ ପାଇଁ ପଞ୍ଚମ ଗୋଲ ସ୍କୋର କରିଥିଲେ।
