ଭଞ୍ଜନଗର,୨ା୭(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡସ୍ତରୀୟ ବନ ମହୋତ୍ସବ ସପ୍ତାହ ଗାଲେରୀ ରେଞ୍ଜ ସାମରଡ଼ା ବନ ସୁରକ୍ଷା ସମିତି ଅଞ୍ଚଳରେ ପାଳିତ ହୋଇଯାଇଛି। ଏଥିରେ ଭଞ୍ଜନଗର ସହକାରୀ ଉପଜିଲାପାଳ ପ୍ରଧାନ ଟୁଲିଆମ୍ମା ମୁଖ୍ୟ ଅତିଥି ଭାବେ ଯୋଗଦେଇ ମେଗା ଚାରାରୋପଣ କାର୍ଯ୍ୟକ୍ରମରେ ଶୁଭାରମ୍ଭ କରିଥିଲେ। ଏହି ଅବସରରେ ସେଠାରେ ଆୟୋଜିତ ସଭାରେ ଯୋଗଦେଇ କହିଥିଲେ, ଆମକୁ ପ୍ରକୃତିର ସୁରକ୍ଷା କରିବାକୁ ପଡ଼ିବ। ପ୍ରାକୃତିକ ସମ୍ପଦର କ୍ଷୟ ଯୋଗୁ ଋତୁ ଅନୁସାରେ ଆଉ ବର୍ଷା, ଶୀତ, ଖରା ହେଉନାହିଁ। ଜଳବାୟୁ ପରିବର୍ତ୍ତନ ଯୋଗୁ ଏହି ସମସ୍ୟା ଦେଖାଦେଇଛି। ଗଛ ଲଗାଇବା ସହ ତା’ର ରକ୍ଷଣାବେକ୍ଷଣ କରିବାକୁ ପଡ଼ିବ। ତାପମାତ୍ରା ବୃତ୍ତି ଯୋଗୁ ଜଳବାୟୁ ପରିବର୍ତ୍ତନ ହେଉଛି। ଏହାଦ୍ୱାରା ବାରମ୍ବାର ପ୍ରାକୃତିକ ଦୁର୍ବିପାକ ପଡୁଛି। ଏହିଭଳି ପରିସ୍ଥିତିରେ ଆମକୁ ପରିବେଶର ସୁରକ୍ଷା କରିବାକୁ ପଡ଼ିବ। ତେଣୁ ଆମେ ଜନ୍ମଦିନରେ ଗୋଟିଏ ଗୋଟିଏ ଚାରା ଲଗାଇବାକୁ ପଡ଼ିବ ବୋଲି ସହକାରୀ ଉପଜିଲପାଳ ଆହ୍ବାନ କରିଥିଲେ।
ଡିଏଫ୍ଓ ହିଂମାଶୁ ଶେଖର ମହାନ୍ତି ଅତିଥି ଭାବେ ଯୋଗଦେଇ ପୃଥିବୀରେ ଭୂତଳ ଜଳସ୍ତର ହ୍ରାସ ପାଉଥିବା ନେଇ ଚିନ୍ତା ପ୍ରକଟ କରିଥିଲେ। ଭୂତଳ ଜଳସ୍ତର ସଂରକ୍ଷଣ ନ ହେଲେ ମାନବ ସମାଜ ପାଇଁ ଅନେକ ବିପଦ ମାଡ଼ି ଆସିବ। ତେଣୁ ଭୂତଳ ଜଳସ୍ତର ବୃଦ୍ଧି ପାଇଁ ଭାଗ ପକ୍ଷରୁ ଅନେକ ପଦକ୍ଷେପ ନିଆଯାଇଛି ବୋଲି ଡିଏଫ୍ଓ ମହାନ୍ତି କହିଥିଲେ। ତହସିଲଦାର ଅଭିପ୍ସା ପଟ୍ଟନାୟକ କହିଥିଲେ ସହର ପ୍ରଦୂଷିତ ହେଉଛି। ଗଛ ଯେଉଁଠି ଅଛି, ସେଠି ଶାନ୍ତି ଅଛି ବୋଲି କହିଥିଲେ।
ଅନ୍ୟମାନଙ୍କ ମଧ୍ୟରେ ଏସିଏଫ୍ ବିବେକ ଦାସ, ତୁରୁମୁ ସରପଞ୍ଚ ଉଷାରାଣୀ ପ୍ରଧାନ, ତିଲିଶୀଙ୍ଗି ସରପଞ୍ଚ ସୁରୁଚି ନାୟକ, ସମିତିସଭ୍ୟ ସୁବାସ ଚନ୍ଦ୍ର ପ୍ରଧାନ, ମୁଜାଗଡ଼ ରେଞ୍ଜର ବିମ୍ବାଧର ସାହୁ, ଜଗନ୍ନାଥ ପ୍ରସାଦ ରେଞ୍ଜର ସୁଜାତା ରାଣୀ ପଣ୍ଡା,ତାରସିଂ ରେଞ୍ଜର ପ୍ରଶାନ୍ତ ବେହେରା, ରେଞ୍ଜର ପୃଥିବୀ ରାଜ ପ୍ରଧାନ, ସୁଶାନ୍ତ ସାହୁ ପ୍ରମୁଖ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ। ଏସିଏଫ୍ ବିମଳ କୁମାର ପ୍ରଧାନ ସଭାକୁ ସଂଯୋଜନା କରିଥିବା ବେଳେ ବନପାଳ ଶୁଭସ୍ମିତା ପାତ୍ର ଧନ୍ୟବାଦ ପ୍ରଦାନ କରିଥିଲେ। ମେଗା ଚାରାରୋପଣ କାର୍ଯ୍ୟକ୍ରମରେ ବନ ସୁରକ୍ଷା ସମିତି କର୍ମକର୍ତ୍ତା, ଗାଲେରି ଦଣ୍ଡପାଣି ମହାରଥା କଲେଜ ଜାତୀୟ ସେବା ଯୋଜନା ସ୍ବେଚ୍ଛାସେବୀ, ବନ ବିଭାଗ କର୍ମଚାରୀ ପ୍ରମୁଖ ସାମିଲ ହୋଇଥିଲେ। ଏହି ଅବସରରେ ଗାଲେରୀ କଲେଜ ଜାତୀୟ ସେବା ଯୋଜନା ଅଧିକାରୀ ଗଙ୍ଗାଧର ଦାସ, କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ଜାତୀୟ ସେବା ଯୋଜନା ଅଧିକାରୀ ବାବୁଲା ପ୍ରଧାନ, ଶିକ୍ଷକ ଶ୍ୟାମାପ୍ରସାଦ ମିଶ୍ର, ଶିକ୍ଷକ ଦ୍ୟୁତିକୃଷ୍ଣ ଲେଙ୍କା ପ୍ରମୁଖ ଉପସ୍ଥିତ ଥିଲେ। କାର୍ଯ୍ୟକ୍ରମକୁ ପରିଚାଳନା କରିବାରେ ବନପାଳ ଅମର ନାୟକ, ଶୁକ୍ଷେତ୍ରା ପ୍ରଧାନ, ପ୍ରକାଶ ସେନାପତି, ଧନୁର୍ଦ୍ଧର ବେହେରା, ଧରିତ୍ରୀ ସାହୁ, ଗଗନ ତ୍ରିପାଠୀ, ସରସ୍ବତୀ ମଳିକ, ବର୍ଷାରାଣୀ ସାହୁ, କୃଷ୍ଣକାନ୍ତ ରାଉତ, ସମୀର ରଞ୍ଜନ ବେହେରା ପ୍ରମୁଖ ସହଯୋଗ କରିଥିଲେ।
