ନ୍ୟୁୟର୍କ,୩୧।୩: ଆଡଲ୍ଟ ଫିଲ୍ମ ଷ୍ଟାର ଷ୍ଟର୍ମି ଡାନିଏଲ୍ସ ମାମଲାରେ ଟ୍ରମ୍ପଙ୍କ ଅଡୁଆ ଆହୁରି ବୃଦ୍ଧି ପାଇଛି। ଏହି ମାମଲାରେ ଏବେ ତାଙ୍କ ନାଁରେ ମୋକଦ୍ଦମା ଚାଲିବ। ଡୋନାଲ୍ଡ ଟ୍ରମ୍ପ ଆମେରିକାର ପ୍ରଥମ ପୂର୍ବତନ ରାଷ୍ଟ୍ରପତି, ଯିଏ ଅପରାଧିକ ମାମଲାର ସମ୍ମୁଖୀନ ହୋଇଛନ୍ତି।
ପର୍ଣ୍ଣ ତାରକା ଷ୍ଟର୍ମି ଅଭିଯୋଗ କରିଛନ୍ତି, ନେଭାଡାରେ ଏକ ସେଲିବ୍ରିଟି ଗଲ୍ଫ ଟୁର୍ନାମେଣ୍ଟ ସମୟରେ ଟ୍ରମ୍ପ ତାଙ୍କୁ ତାଙ୍କ ହୋଟେଲ ରୁମକୁ ଡାକିଥିଲେ। ଷ୍ଟର୍ମିଙ୍କୁ ଏକ ଟିଭି ତାରକା କରିବାକୁ ଟ୍ରମ୍ପ ପ୍ରତିଶ୍ରୁତି ଦେଇ ଯୌନ ଶୋଷଣ କରିବାକୁ ଚେଷ୍ଟା କରିଥିଲେ। ଷ୍ଟର୍ମିଙ୍କ ଅନୁଯାୟୀ ଟ୍ରମ୍ପ ଏବଂ ତାଙ୍କର ଯୌନ ସମ୍ପର୍କ ଥିଲା। କିନ୍ତୁ ଟ୍ରମ୍ପ ଷ୍ଟର୍ମିଙ୍କ ସହ ତାଙ୍କର ଶାରୀରିକ ସମ୍ପର୍କ ଥିବା ଅସ୍ବୀକାର କରିଛନ୍ତି। ଜୁଲାଇ ୨୦୦୭ରେ ଷ୍ଟର୍ମୀ-ଟ୍ରମ୍ପ ଭେଟାଭେଟି ହୋଇଥିଲେ। ସେତେବେଳେ ଷ୍ଟର୍ମିଙ୍କୁ ୨୭ ବର୍ଷ ଏବଂ ଟ୍ରମ୍ପଙ୍କୁ ୬୦ ବର୍ଷ ହୋଇଥିଲା। ୨୦୧୬ ନିର୍ବାଚନ ସମୟରେ ଷ୍ଟର୍ମିଙ୍କୁ ଚୁପ୍ ପାଇଁ ଟ୍ରମ୍ପ ତାଙ୍କ ଓକିଲ ଜରିଆରେ ଟଙ୍କା ଯାଚିଥିବା ଅଭିଯୋଗ ହୋଇଥିଲା। ଏହି ମାମଲାରେ କୋର୍ଟ ଟ୍ରମ୍ପଙ୍କୁ ଦୋଷୀ ସାବ୍ୟସ୍ତ କରିଛନ୍ତି।
ନିକଟ ଅତୀତରେ ଟ୍ରମ୍ପ ତାଙ୍କ ଉପରେ ଚାଲିଥିବା ଅନୁସନ୍ଧାନକୁ ନେଇ ଆକ୍ରମଣାତ୍ମକ ମନ୍ତବ୍ୟ ମଧ୍ୟ ଦେଇଥିଲେ। ଗତ ସପ୍ତାହରେ ସେ ମ୍ୟାନହଟନରେ ଗିରଫ ହେବାର ପୂର୍ବାନୁମାନ କରିଥିଲେ ଏବଂ ତାଙ୍କ ସମର୍ଥକଙ୍କୁ ବିରୋଧ କରିବାକୁ କହିଥିଲେ। ତାଙ୍କୁ ରୋକିବା ପାଇଁ ତାଙ୍କ ପ୍ରତିଦ୍ୱନ୍ଦ୍ୱୀମାନେ ନକଲି ମାମଲା ରୁଜୁ କରୁଛନ୍ତି ବୋଲି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି।
