ଛେଣ୍ଡିପଦା,୧୭।୨(ସ୍ବ.ପ୍ର.): ଅନୁଗୋଳ ଜିଲା ଛେଣ୍ଡିପଦା ବ୍ଲକର ୩୪ ପଞ୍ଚାୟତ ଓ ୪ଟି ଜିଲା ପରିଷଦ (ନଂ. ୧୪, ୧୫, ୧୬, ୧୭) ଜୋନ୍ରେ ଆସନ୍ତା ୧୮ ତାରିଖରେ ଭୋଟ ଗ୍ରହଣ ହେବ। ଏଥିପାଇଁ ବୁଧବାର ପ୍ରଚାର କାର୍ଯ୍ୟ ଶେଷ ହୋଇଛି। ମତଦାନକୁ ଆଉ ମାତ୍ର କେଇ ଘଣ୍ଟା ବାକି ଥିବାରୁ ଜିଲା ପରିଷଦ ପ୍ରାର୍ଥୀମାନେ ମତଦାତାଙ୍କୁ ମନାଇବାକୁ ଅନ୍ତିମ ପ୍ରୟାସ କରୁଛନ୍ତି। ବ୍ଲକର ୪ଟି ଯାକ ଜୋନ୍ରେ ଗତ ୨୦୧୭ ନିର୍ବାଚନରେ ବିଜେଡି ପ୍ରାର୍ଥୀ ବିଜୟୀ ହୋଇଥିବାରୁ ଏଥର ଧାରା ବଦଳାଇବାକୁ ଭାଜପା ଲକ୍ଷ୍ୟ ରଖିଛି। ସେହିପରି ବିଜେଡି ମଧ୍ୟ ନିଜ ଗଡ଼ରେ ପୁନଃ ବିଜୟ ଆଶା ବାନ୍ଧିଛି।
ଛେଣ୍ଡିପଦା ବ୍ଲକର ୧୬ ନମ୍ବର ଜିଲା ପରିଷଦ ଜୋନ୍ ଅଧୀନରେ ୧୦ ପଞ୍ଚାୟତ ତେଣ୍ଡୁଲୋଇ କୋଡ଼ାସାହି, କୁକୁରପେଟା, କୋଶଳା, ବରପଦା, କୁଶକିଳା, ରାଇଝରଣ, କଙ୍କରେଇ, ନିଶା, ପରଙ୍ଗ, ନତଡ଼ା ରହିଛି। ୧୨୧ଟି ୱାର୍ଡ ଥିବା ଏହି ଜୋନ୍ରେ ଭୋଟରଙ୍କ ସଂଖ୍ୟା ୩୩ ହଜାର ୫୩୦। ୨୦୧୭ ନିର୍ବାଚନରେ ଏହି ଜୋନ୍ରେ ଶାସକ ବିଜେଡି ପ୍ରାର୍ଥୀ ଭାସ୍କର ସାହୁ ବିଜୟୀ ହୋଇଥିଲେ। ଭାସ୍କର ୧୨ ହଜାର ୭୩୬, ଭାଜପା ପ୍ରାର୍ଥୀ ଚିତ୍ତରଞ୍ଜନ ସାହୁ ୧୦ ହଜାର ୧୨୦ ଓ କଂଗ୍ରେସ ପ୍ରାର୍ଥୀ ମଧୁମଙ୍ଗଳ ପ୍ରଧାନ ୪ ହଜାର ୧୮୮ ଭୋଟ ପାଇଥିଲେ। ତେବେ ଚଳିତ ନିର୍ବାଚନରେ ଭାଜପା ପକ୍ଷରୁ ବିଜୟ ମାଝି, କଂଗ୍ରେସର ଡିଲେଶ୍ୱର ପ୍ରଧାନ, ବିଜେଡିର ପ୍ରଦୀପ ସାହୁ ଓ ଏସ୍ୟୁସିଆଇର ସତ୍ୟରଞ୍ଜନ ସାହୁ ପ୍ରାର୍ଥୀ ହୋଇଛନ୍ତି। ମତଦାନ ଆଉ ଦିନଟିଏ ବାକି ଥିବାବେଳେ ବିଜେଡି ପ୍ରାର୍ଥୀଙ୍କୁ ବିଜୟୀ କରିବାକୁ ବିଧାୟକ ସୁଶାନ୍ତ କୁମାର ବେହେରା ଲାଗିପଡ଼ିଛନ୍ତି। ସେହିପରି ଏହି ଜୋନ୍ ହାତେଇବାକୁ ଭାଜପା ନେତା ଅଗସ୍ତି ବେହେରା ଦଳୀୟ ପ୍ରାର୍ଥୀଙ୍କ ପାଇଁ ଜୋରଦାର ପ୍ରଚାର କରୁଛନ୍ତି। କଂଗ୍ରେସ ମଧ୍ୟ ନିଜ ପ୍ରାର୍ଥୀଙ୍କ ବିଜୟ ପାଇଁ ଆଶା ବାନ୍ଧିଛି।
ସେହିପରି ୧୭ ନମ୍ବର ଜିଲା ପରିଷଦ ଜୋନ୍ ଜରପଡ଼ା ଅଞ୍ଚଳର ୯ ପଞ୍ଚାୟତକୁ ନେଇ ଗଠିତ। ଏଠାକାର ଭୋଟରଙ୍କ ସଂଖ୍ୟା ୩୦ ହଜାର ୯୫୦। ୨୦୧୭ ପଞ୍ଚାୟତ ନିର୍ବାଚନରେ ବିଜେଡି ପ୍ରାର୍ଥୀ ଶ୍ରୀଧର ଗଡ଼ନାୟକ କଂଗ୍ରେସ ପ୍ରାର୍ଥୀ ରମଣୀ ରଞ୍ଜନ ଦାଶଙ୍କୁ ୫୫୦୦ ଭୋଟରେ ପରାଜିତ କରିଥିଲେ। ଭାଜପା ପ୍ରାର୍ଥୀ ତୃତୀୟ ସ୍ଥାନରେ ଥିଲେ। ଏଥର ଏହି ଜୋନ୍ ମହିଳାଙ୍କ ପାଇଁ ସଂରକ୍ଷିତ ରହିଥିବାରୁ ୩ ପ୍ରମୁଖ ଦଳ ସେମାନଙ୍କ ରଣନୀତି ବଦଳାଇଛନ୍ତି। ବିଜେଡିରୁ ଜରପଡ଼ା ସରପଞ୍ଚ ଭାନୁପ୍ରିୟା ପ୍ରଧାନ, ଭାଜପାରୁ ସଂଯୁକ୍ତା ପ୍ରଧାନ, କଂଗ୍ରେସରୁ ଲୋପିତାରାଣୀ ସାହୁ ଓ ସ୍ବାଧୀନ ପ୍ରାର୍ଥୀ ଭାବେ ପ୍ରତିମା ବେହେରା ପ୍ରତିଦ୍ବନ୍ଦ୍ୱିତା କରୁଛନ୍ତି। ତେବେ ଏଠାରେ ୪ ପ୍ରାର୍ଥୀ ଥିଲେ ମଧ୍ୟ ବିଜେଡି ଓ ଭାଜପା ମଧ୍ୟରେ କଡ଼ା ଟକ୍କର ଦେଖିତ୍ବାକୁ ମିଳିବ।
