ଖୁଣ୍ଟୁଣୀ, ୭ା୩(ଡି.ଏନ୍.ଏ.): ବାର୍ହା ଶିକାର ଉଦ୍ଦେଶ୍ୟରେ ବୋମା(ବାର୍ହା ଗୁଳା) ଖଞ୍ଜାଯାଇଥିଲା। ହେଲେ ଉକ୍ତ ବୋମାକୁ ଗାଈ ଚୋବାଇ ଦେବାରୁ ତାହା ଫୁଟିଗଲା। ଏଥିରେ ଗାଈର ଥୋମଣି ଓ ତଳ ଅଂଶ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ରବିବାର ଏଭଳି ଏକ ଅଭାବନୀୟ ଘଟଣା ଘଟିଛି ଖୁଣ୍ଟୁଣୀ ବନାଞ୍ଚଳ ଅନ୍ତର୍ଗତ ବାଳୀ ଶାସନ ଗ୍ରାମରେ।
ମିଳିଥିବା ସୂଚନା ଅନୁଯାୟୀ, ବାଳୀ ଗ୍ରାମ ଶାସନ ସାହିର ରତ୍ନାକର ଦାଶଙ୍କ ଏକ ଗାଈ ନିକଟସ୍ଥ ଗହୀରକୁ ଚରିବାକୁ ଯାଇଥିଲା। ସେଠାରେ ପୂର୍ବରୁ କେହି ଦୁର୍ବୃତ୍ତ ବାର୍ହା ଶିକାର ଉଦ୍ଦେଶ୍ୟରେ ବୋମା ଖଞ୍ଜିଥିଲେ। ଫଳରେ ଗାଈଟି ଏକ ବୋମା ଚୋବାଇ ଦେଇଥିଲା। ଉକ୍ତ ବୋମା ଫୁଟିଯିବାରୁ ଗାଈ ପାଟିରୁ ମାଂସ ବାହାରି ଆସିଥିଲା। ଫଳରେ ଗାଈଟି ଛଟପଟ ହେବାକୁ ଲାଗିଲା। ସାହିର ଜଣେ ଯୁବକ ଏହାଦେଖି ଅନ୍ୟମାନଙ୍କୁ ଡାକିଥିଲେ। ରତ୍ନାକର ଓ ସାହିଲୋକ ଘଟଣାସ୍ଥଳରେ ପହଞ୍ଚି ଗୁରୁଡିଝାଟିଆ ବନ୍ୟପ୍ରାଣୀ ଚିକିତ୍ସକ ମନୋରଞ୍ଜନ ଲେଙ୍କାଙ୍କୁ ଖବର ଦେଇଥିଲେ। ଏ ସମ୍ପର୍କରେ ଲେଙ୍କା କହିଛନ୍ତି, ଗାଈଟି ବୋମା ଖାଇଥିବାରୁ ପାଟିର ଥୋମଣି ନଷ୍ଟ ହୋଇଯାଇଛି। ହେଲେ ଗାଈର ଅବସ୍ଥା ସଙ୍କଟାପନ୍ନ ଥିବାରୁ ବଞ୍ଚିବା ଅସମ୍ଭବ ବୋଲି ସେ କହିଥିଲେ।
ଗତମାସରେ ମଧ୍ୟ ଏଭଳି ଅନୁରୂପ ଘଟଣା ବାଙ୍କୀ ଅଞ୍ଚଳରେ ଘଟିଥିଲା। ଶିକାର ପାଇଁ ଖଞ୍ଜା ଯାଇଥିବା ବାର୍ହା ଗୁଳା ଖାଇ ଏକ ଗାଈ ଗୁରୁତର ହୋଇଥିଲା। ତାଙ୍କୁ ଭୁବନେଶ୍ୱର ଶହୀଦନଗରସ୍ଥିତ ସରକାରୀ ପ୍ରାଣୀ ଚିକିତ୍ସାଳୟରେ ଚିକିତ୍ସା କରାଯାଇଥିଲା। ବାଳୀ ଓ ଏହାର ଆଖପାଖ ଅଞ୍ଚଳରେ ଶିକାରୀମାନେ ବୋମା ରଖି ବନ୍ୟଜନ୍ତୁ ଶିକାର କରୁଥିବା ଲୋକମାନେ ଅଭିଯୋଗ କରିଛନ୍ତି। ବିଶେଷକରି ଆଠଗଡ଼ ଓ ଖୁଣ୍ଟୁଣୀ ବନାଞ୍ଚଳରେ ଏହି ଶିକାରୀମାନେ ବେଶ୍ ସକ୍ରିୟ ଅଛନ୍ତି। ସେମାନେ ବନ୍ୟଜନ୍ତୁ ଶିକାର କରି ମାଂସକୁ ବିକ୍ରି କରୁଛନ୍ତି। ଏ ସମ୍ପର୍କରେ ଅଭିଯୋଗ ହେବା ପରେ ବନ ବିଭାଗ ଲୋକଦେଖାଣିଆ ଭାବେ କେତେଜଣକୁ ଗିରଫ କରୁଛି। ହେଲେ ଏହି ବେଆଇନ କାର୍ଯ୍ୟକୁ ସମ୍ପୂର୍ଣ୍ଣ ରୋକିବା ସହ ଶିକାରୀମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ବିଫଳ ହୋଇଛି। ଏ ନେଇ ଓରନ୍ଦା ଫରେଷ୍ଟର ରାକେଶ ଦଳେଇଙ୍କୁ ପଚାରିବାରୁ ଘଟଣା ସମ୍ପର୍କରେ ଜଣାପଡିବା ପରେ ପଦକ୍ଷେପ ନେଉଛୁ ବୋଲି ସେ କହିଛନ୍ତି।
