ଡେରାବିଶ,୨୨ା୭(ଡି.ଏନ୍.ଏ.): କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ ଭାଗବତପୁର ପଞ୍ଚାୟତ ଶ୍ୟାମସୁନ୍ଦରପୁର (ମେଳକସାହି) ଗ୍ରାମର ଜଣେ ବ୍ୟକ୍ତି ଭ୍ରମରବର ରାଉତ (୪୦)ଙ୍କ ମୃତଦେହକୁ ଗୁରୁବାର ସକାଳେ ସ୍ଥାନୀୟ ଚଣ୍ଡିବଜାରସ୍ଥିତ ରାସ୍ତାକଡ଼ର ଏକ ବିଲରୁ ଜବତ କରାଯାଇଛି । ତେବେ ଭ୍ରମରଙ୍କୁ ହତ୍ୟା କରାଯାଇଥିବା ନେଇ ତାଙ୍କ ସ୍ତ୍ରୀ ମମତା ଆଜି ସଦରଥାନାରେ ଅଭିଯୋଗ କରିଛନ୍ତି। ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗରେ ଦର୍ଶାଯାଇଥିବା ବେଳେ ଭ୍ରମରଙ୍କ ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା।
ଆଜି ପୂର୍ବାହ୍ନରେ କଟକ-ଚାନ୍ଦବାଲି ରାସ୍ତାର ଚଣ୍ଡିବଜାର ନିକଟରେ ଶତାଧିକ ବ୍ୟକ୍ତି ଭ୍ରମରଙ୍କ ପରିବାରକୁ ନ୍ୟାୟ ଦେବା ସହ ୨୦ ଲକ୍ଷ ଟଙ୍କା କ୍ଷତିପୂରଣ ପାଇଁ ଦାବି କରି ଦୀର୍ଘସମୟ ଧରି ରାସ୍ତା ଅବରୋଧ କରିଥିଲେ। ସ୍ଥାନୀୟ ଲୋକଙ୍କ ଦାବି ଅନୁଯାୟୀ ବାଲିଆ ଠାରେ ଖୋଲାଯାଇଥିବା ସରକାରୀ ମଦ ଦୋକାନ ଉଚ୍ଛେଦ ପାଇଁ ଭ୍ରମରଙ୍କ ସମେତ ସ୍ଥାନୀୟ ଅଞ୍ଚଳର କିଛି ବ୍ୟକ୍ତି ଦାବି କରି ଆସୁଥିଲେ । ଏଥିପାଇଁ କେହି ଭ୍ରମରଙ୍କ ଉପରେ ଆକ୍ରୋଶ ରଖିଥିବା ନେଇ ତାଙ୍କ ସ୍ତ୍ରୀ ମମତା ଓ ସ୍ଥାନୀୟ ଲୋକ ସୂଚନା ଦେଇଥିଲେ। ତେବେ ବୁଧବାର ରାତି ୧୧ଟାରେ ମଦ ଦୋକାନ ମ୍ୟାନେଜର ମହେଶ କୁମାର ନାୟକ ଓ ମାଲିକ ପ୍ରକାଶ କୁମାର କର ଭ୍ରମରଙ୍କୁ ଘରୁ ଡାକି ନେଇଯାଇଥିଲେ। ମଦ ଦୋକାନକୁ ଯାଇଥିବା ଏକ ବିଦ୍ୟୁତ୍ ତାରରେ କରେଣ୍ଟ ଲଗାଇ ଭ୍ରମରଙ୍କୁ ମାରି ଦିଆଯାଇଥିବା ନେଇ ମମତା ତାଙ୍କ ଅଭିଯୋଗରେ ଉଲ୍ଲେଖ କରିଛନ୍ତି। ତେବେ ଦୀର୍ଘ ସମୟ ଧରି ରାସ୍ତାରେ ଶହଶହ ସଂଖ୍ୟାରେ ଯାନବାହନ ଅଟକି ରହିବା ପରେ କେନ୍ଦ୍ରାପଡ଼ା ଏସ୍ଡିପିଓ ରାଜୀବ ଲୋଚନ ପଣ୍ଡା ଓ ପ୍ରଶାସନିକ ଅଧିକାରୀମାନେ ଘଟଣାସ୍ଥଳକୁ ଆସି ଲୋକଙ୍କୁ ବୁଝାଶୁଝା କରିବା ପରେ ରାସ୍ତାରୋକୋ ପ୍ରତ୍ୟାହୃତ ହୋଇଥିଲା। ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ପହଞ୍ଚି ମୃତ୍ୟୁର କାରଣ ସମ୍ପର୍କରେ ଅନୁଧ୍ୟାନ କରୁଛନ୍ତି। ଅଭିଯୋଗକୁ ଭିତ୍ତି କରି ଥାନାରେ ୪୧୦/୨୧ରେ ଏକ ମାମଲା ରୁଜୁ ହୋଇଥିବା ତଦନ୍ତକାରୀ ଅଧିକାରୀ ଏଏସ୍ଆଇ ଭାଗବତ ମାହାଳି ସୂଚନା ଦେଇଛନ୍ତି।
