ଗଞ୍ଜାମ,୨୧ା୫(ଡି.ଏନ୍.ଏ.): ଗଞ୍ଜାମ ବ୍ଲକ ଅନ୍ତର୍ଗତ ପାଳିବନ୍ଧ ପଞ୍ଚାୟତର ବଟେଶ୍ୱର ଶୈବପୀଠ ନିକଟସ୍ଥ ସମୁଦ୍ର ବେଳାଭୂମିରେ ଦୁଇଦିନ ତଳେ ଗୋଟିଏ ଅଲିଭ୍ ରିଡ୍ଲେ କଇଁଛର ମୃତଦେହ ପଡ଼ିଥିବା ବେଳେ ଗୁରୁବାର ଆଉ ଦୁଇଟି କଇଁଛଙ୍କ ମୃତଦେହ ବେଳାଭୂମିରେ ପଡ଼ିଥିବା ଦେଖିବାକୁ ମିଳିଛି। ଏହାକୁ ନେଇ ପରିବେଶବିତ୍ଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଛି। ଅନ୍ୟପଟେ ଅଣ୍ଡାଦାନ ପାଇଁ ଆସି ତତଲା ବାଲିରେ ଫସି କଇଁଛଙ୍କ ମୃତ୍ୟୁ ହେଉଥିବା ଅନୁମାନ କରାଯାଉଛି।
ସୂଚନାଯୋଗ୍ୟ, ଚଳିତବର୍ଷ ଋଷିକୂଲ୍ୟା ମୁହାଣ ସମୁଦ୍ର ବେଳାଭୂମିରେ ଅଲିଭ୍ ରିଡ୍ଲେଙ୍କ ଗଣ ଅଣ୍ଡାଦାନ ହୋଇ ନ ଥିଲା। ହେଲେ ଗଣ ଅଣ୍ଡାଦାନର ସମୟ ଅବଧି ସରି ଯାଇଥିବା ଫଳରେ ବନ ବିଭାଗ ପକ୍ଷରୁ ପାଟ୍ରୋଲିଂ ବନ୍ଦ କରିଦିଆଯାଇଛି। ପୂର୍ବରୁ ସମୁଦ୍ର ମଧ୍ୟରେ ବନ ବିଭାଗ ପକ୍ଷରୁ କଟକଣା ଜାରି କରାଯାଇଥିଲା। ଏଥିସହିତ ବନ ବିଭାଗ ପକ୍ଷରୁ ସମୁଦ୍ର ମଧ୍ୟରେ ପାଟ୍ରୋଲିଂ ବ୍ୟବସ୍ଥା କରାଯାଉଥିଲା। ବର୍ତ୍ତମାନ ସେ ସବୁ ବନ୍ଦ ହୋଇଯାଇଥିବାରୁ ମାଛ ମାରିବା ପାଇଁ ଆନ୍ଧ୍ରପ୍ରଦେଶର ଟ୍ରଲର ଅନାୟସରେ ଓଡ଼ିଶା ସୀମାରେ ପଶି ମାଛ ମାରୁଛନ୍ତି। ସେମାନଙ୍କୁ ରୋକ୍ ଲଗାଇବା ପାଇଁ ମେରାଇନ ବିଭାଗ ପକ୍ଷରୁ କୌଣସି ପଦକ୍ଷପ ନିଆଯାଉ ନାହିଁ। ଫଳରେ ଏପରି ପରିସ୍ଥିତି ସୃଷ୍ଟି ହେଉଥିବା ସ୍ଥାନୀୟ ଅଞ୍ଚଳବାସୀ ପ୍ରକାଶ କରିଛନ୍ତି।
