ରାଇଘର, ୩୦ା୧(ଡି.ଏନ୍.ଏ.) ନବରଙ୍ଗପୁର ଜିଲା ରାଇଘର ବ୍ଲକରେ ଏବେ ନିର୍ବାଚନୀ ପ୍ରଚାର ଜୋର୍ଦାର ଚାଲିଛି। ଗ୍ରାମାଞ୍ଚଳରେ ନେତା ଡେରା ପକାଇ ଲୋକଙ୍କୁ ଏକାଠି କରି ଜୋର୍ଦାର ପ୍ରଚାର କରୁଛନ୍ତି। ଉମରକୋଟ ନିର୍ବାଚନମଣ୍ଡଳୀ ମଧ୍ୟରୁ ରାଇଘର ବ୍ଲକର ଚାରି ନମ୍ବର ଜିଲା ପରିଷଦ ଆସନ ଅଧିକ ଗୁରୁତ୍ୱପୂର୍ଣ୍ଣ ରହିଥିବା ବେଳେ ଏଠାରେ ତିନି ଦଳର ପ୍ରଚାର ମଧ୍ୟ ଜୋର୍ଦାର ହୋଇଛି। ଏକଦା ବିଜେଡି ଗଡ଼ଭାବେ ପରିଚିତ ଥିବା ଚାରି ନମ୍ବର ଜିଲା ପରିଷଦ ଆସନକୁ ଗତ ପଞ୍ଚାୟତ ନିର୍ବାଚନରେ ଭାଜପା ଦଖଲ କରିଛି।
ରାଇଘର ବ୍ଲକର ଚାରି ନମ୍ବର ଜିଲା ପରିଷଦ ଆସନ ମଧ୍ୟରେ ଗୋନା,କୁମୁଲି, କୁରାବେଡ଼ା,ଟିମନପୁର,ମୁଣ୍ଡିବେଡ଼ା, ହଳଦୀ ଓ ପାରୁଆ ପଞ୍ଚାୟତ ରହିଛି। ଜିଲା ପରିଷଦ ଆସନ ଚଳିତ ଥର ଅନୁସୂଚିତ ଜାତି ନିମନ୍ତେ ସଂରକ୍ଷଣ କରାଯାଇଛି। ଏହି ଆସନ ନିମନ୍ତେ ମୋଟ ୫ଜଣ ପ୍ରାର୍ଥୀ ପ୍ରତିଦ୍ବନ୍ଦ୍ୱିତା କରୁଛନ୍ତି। ବିଜେଡିରୁ ଖଗେଶ୍ୱର ହରିଜନ, ଭାଜପାରୁ ନେପାଲ ଘୋରାମି, କଂଗ୍ରେସରୁ ନରସିଂ ହରିଜନ,ବିଏସ୍ପି ପକ୍ଷରୁ ପୁଷ୍ପାଞ୍ଜଳି ନାୟକ ଓ ସ୍ବାଧୀନ ପ୍ରାର୍ଥୀଭାବେ ନରସିଂ ବିଭାର ରହିଛନ୍ତି। ପୂର୍ବତନ ବିଧାୟକ ଜଗବନ୍ଧୁ ମାଝି, ପୂର୍ବତନ ଜିଲା ପରିଷଦ ସଭ୍ୟ ପ୍ରଣବ ଭୂୟାଁ ଏଠାରେ ବିଜେଡି ଗଡ ମଜଭୁତ କରିଥିଲେ। କିନ୍ତୁ ଗତ ପଞ୍ଚାୟତ ନିର୍ବାଚନରେ ଭାଜପା ପ୍ରାର୍ଥୀ ପ୍ରୀତିସ୍ନିଗ୍ଧା ମହାପାତ୍ର ବିଜୟୀ ହୋଇଥିଲେ। ବର୍ତ୍ତମାନ ଭାଜପା ପକ୍ଷରୁ ଏଠାରେ ନେପାଲ ଘୋରାମି ପ୍ରାର୍ଥୀ ହୋଇଥିବା ବେଳେ ଗ୍ରାମାଞ୍ଚଳରେ ଯାଇ ଜୋର୍ଦାର ପ୍ରଚାର ଆରମ୍ଭ କରିଛନ୍ତି। ଏହି ଜିଲା ପରିଷଦ ଆସନ ମଧ୍ୟରେ ଆଦିବାସୀ ଅଧ୍ୟୁଷିତ ତଥା ଅନେକ ଦୁର୍ଗମ ଅଞ୍ଚଳ ରହିଛି। ନେଟ୍ଓ୍ବର୍କ ନ ଥିବାରୁ ପ୍ରାର୍ଥୀ ସିଧାସଳଖ ଭୋଟରଙ୍କ ନିକଟତର ହେଉଛନ୍ତି। ଭାଜପା ପ୍ରାର୍ଥୀ ଜଙ୍ଗଲ ମଧ୍ୟରେ ଲୋକଙ୍କୁ ନେଇ ପ୍ରଚାର କରୁଛନ୍ତି। ବିଜେଡି ନିଜ ଗଡ଼କୁ ଫେରିପାଇବାକୁ ସ୍ବତନ୍ତ୍ର ରଣନୀତି ପ୍ରସ୍ତୁତ କରୁଛି ବୋଲି ରାଜନୀତି ମହଲରେ ଚର୍ଚ୍ଚା ହେଉଛି।
