ମୁମ୍ବାଇ,୧୯।୫: ଆଇପିଏଲର ୬୬ତମ ଲିଗ ମ୍ୟାଚରେ ଲକ୍ଷ୍ନୌ ସୁପର ଜିଆଣ୍ଟସ ଓପନର୍ କ୍ୱିଣ୍ଟନ ଡି’କକ ଏବଂ କେ.ଏଲ ରାହୁଲ କୋଲକାତା ନାଇଟ ରାଇଡର୍ସ ବିପକ୍ଷରେ ୨୧୦ ରନ ଓପନିଂ ଭାଗିଦାରୀ ବାଣ୍ଟିଛନ୍ତି। ଆଇପିଏଲ ଇତିହାସରେ ପ୍ରଥମ ଉଇକେଟ ପାଇଁ ଏହା ହେଉଛି ସର୍ବୋଚ୍ଚ ଭାଗିଦାରୀ। କୌଣସି ଦଳ ଉଇକେଟ ନ ହରାଇ ଓପନରମାନେ ପୁରା ୨୦ ଓଭର ବ୍ୟାଟିଂ କରିବା ଟି -୨୦ ଲିଗରେ ପ୍ରଥମ ଥର ପାଇଁ ଦେଖିବାକୁ ମିଳିଛି।
ମୁମ୍ବାଇର ଡିଓ୍ବାଇ ପାଟିଲ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚରେ କ୍ୱିଣ୍ଟନ ଡି’କକ ୭୦ ବଲରୁ ଅପରାଜିତ ୧୪୦ ସ୍କୋର କରିଥିଲେ। ଡି’କକଙ୍କ ଟି-୨୦ କ୍ୟାରିୟରରେ ଏହା ହେଉଛି ସର୍ବୋତ୍ତମ ଇନିଂସ। ଅଧିନାୟକ କେ.ଏଲ ରାହୁଲ ଅନ୍ୟ ପଟରୁ ଡି’କକଙ୍କୁ ପୂର୍ଣ୍ଣ ସମର୍ଥନ ଦେଇଥିଲେ। ରାହୁଲ ଅପରାଜିତ ୬୮ ସ୍କୋର କରିଥିଲେ। ସାମଗ୍ରିକ ଭାବେ ଆଇପିଏଲରେ ଯେକୌଣସି ଉଇକେଟ ପାଇଁ ଏହା ହେଉଛି ଦ୍ୱିତୀୟ ସର୍ବୋଚ୍ଚ ଭାଗିଦାରୀ।
ଏହାପୂର୍ବରୁ, ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ବିପକ୍ଷରେ ୨୦୧୯ରେ ସନରାଇଜର୍ସ ହାଇଦ୍ରାବାଦ ପାଇଁ ଖେଳିଥିବା ଜନି ବେୟାରଷ୍ଟୋ ଏବଂ ଡେଭିଡ ୱାର୍ଣ୍ଣରଙ୍କ ଓପନିଂ ଯୋଡି ଦ୍ୱାରା ସର୍ବାଧିକ ଓପନିଂ ଭାଗିଦାରୀ ପାଇଁ ରେକର୍ଡ ରହିଥିଲା। ଉଭୟ ପ୍ରଥମ ଉଇକେଟ ପାଇଁ ୧୮୫ ରନ ଯୋଡିଥିଲେ। ୨୦୧୭ରେ, କୋଲକାତା ନାଇଟ ରାଇଡର୍ସ ପାଇଁ ଖେଳୁଥିବା ବେଳେ ଗୁଜରାଟ ଲାୟନ୍ସ ବିପକ୍ଷରେ ପ୍ରଥମ ଉଇକେଟ ପାଇଁ ଗୌତମ ଗମ୍ଭୀର ଏବଂ କ୍ରିସ ଲିନଙ୍କ ଯୋଡି ୧୮୩ ରନ ଯୋଡିଥିଲେ।
ଆଇପିଏଲ ଖୋଲିବାରେ କେଏଲ ରାହୁଲ ଚତୁର୍ଥ ପ୍ରମୁଖ ଭାଗିଦାରୀରେ ସାମିଲ ଅଛନ୍ତି। ପଞ୍ଜାବ କିଙ୍ଗ୍ସ ପାଇଁ ଖେଳିବା ସମୟରେ ରାହୁଲ ଏବଂ ମୟଙ୍କ ଅଗ୍ରୱାଲଙ୍କ ଓପନିଂ ଯୋଡି ୨୦୨୦ ରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ବିପକ୍ଷରେ ୧୮୩ ରନର ସହଭାଗୀତା କରିିଥିଲେ। ଆଇପିଏଲରେ ସବୁଠୁ ବଡ଼ ଇନିଂସ ଖେଳିଥିବା ବ୍ୟାଟ୍ସମ୍ୟାନଙ୍କ ମଧ୍ୟରେ ଡି’କକ ତୃତୀୟ ସ୍ଥାନରେ ପହଞ୍ଚିଛନ୍ତି। ଏହି ତାଲିକାରେ କ୍ରିସ ଗେଲ ଏବଂ ବ୍ରେଣ୍ଡନ ମ୍ୟାକକୁଲମ ଯଥାକ୍ରମେ ଏକ ନମ୍ବର ଏବଂ ଦ୍ୱିତୀୟ ସ୍ଥାନରେ ଅଛନ୍ତି।
ଲଗାତର ୫ ଆଇପିଏଲ ସିଜନରେ ୫୦୦ କିମ୍ବା ଅଧିକ ରନ ସ୍କୋର କରିବାରେ କେ.ଏଲ ରାହୁଲ ତୃତୀୟ ଭାରତୀୟ ହୋଇପାରିଛନ୍ତି। ଏହାପୂର୍ବରୁ ବିରାଟ କୋହଲି ଏବଂ ଶିଖର ଧାୱନ ଏହି ସଫଳତା ହାସଲ କରିଛନ୍ତି। ରାହୁଲ ଲଗାତାର ୫ ସିଜିନରେ ୫୦୦ କିମ୍ବା ଅଧିକ ରନ ସଂଗ୍ରହ କରିଥିବାବେଳେ ବିରାଟ ଏବଂ ଧାୱନ ବିଭିନ୍ନ ସିଜିନରେ ଏହି ସଫଳତା ହାସଲ କରିଛନ୍ତି।
