ନୂଆଦିଲ୍ଲୀ, ୧୧ା୯ (ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଯୋଗୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ଦୁର୍ନୀତି ନିବାରଣ ୟୁନିଟ୍ (ଏସିୟୁ) ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ପହଞ୍ଚତ୍ଛି। ଟି୨୦ ଟୁର୍ନାମେଣ୍ଟର ମ୍ୟାଚ୍ଗୁଡ଼ିକ ବିନା ଦର୍ଶକରେ ରୁଦ୍ଧଦ୍ୱାରରେ ଖେଳାଯିବ। ଏଣୁ ସୋସିଆଲ ମିଡିଆ ଜରିଆରେ ଯେକୌଣସି କୌଣସି ପ୍ରକାର ଦୁର୍ନୀତିର ନିରାକରଣ ଦିଗରେ ଏସିୟୁ କାର୍ଯ୍ୟ କରିବ। ଏହାଛଡ଼ା ଫିଜିକାଲ ସେସନ ପରିବର୍ତ୍ତେ ଭିଡ଼ିଓ କନସେଲିଂ ଜରିଆରେ ଖେଳାଳିମାନଙ୍କୁ ଦୁର୍ନୀତିରୁ ଦୂରେଇ ରହିବା ଲାଗି ପରାମର୍ଶ ଦିଆଯିବ। ଅଜିତ ସିଂଙ୍କ ନେତୃତ୍ୱରେ ବିସିସିଆଇର ୮ଜଣିଆ ଦଳ ମଙ୍ଗଳବାର ଦୁବାଇରେ ପହଞ୍ଚତ୍ଛି। ଏହି ଦଳ ବର୍ତ୍ତମାନ ୬ ଦିନିଆ କ୍ୱାରାଣ୍ଟାଇନ୍ରେ ଅଛି। ସେପ୍ଟେମ୍ବର ୧୯ରୁ ଆରମ୍ଭ ହେଉଥିବା ଆଇପିଏଲ୍ କଡ଼ାକଡି ଭାବେ ବାୟୋ-ବବଲ ପରିବେଶ ମଧ୍ୟରେ ଅନୁଷ୍ଠିତ ହେବାକୁଯାଉଥିବାରୁ ପୂର୍ବ ସଂସ୍କରଣ ତୁଳନାରେ ଅଧିକ ସୁରକ୍ଷିତ ବୋଲି ସିଂ କହିଛନ୍ତି। ଷ୍ଟାଡିୟମରେ ଏଥର ଦର୍ଶକଙ୍କ ଭିଡ଼ ଦେଖିବାକୁ ମିଳିବନି। ଖେଳପ୍ରେମୀମାନଙ୍କୁ ଟିମ୍ ହୋଟେଲ ଯିବାରେ ବାରଣ ରହିଛି। ତେଣୁ ଖେଳାଳିଙ୍କୁ ଦୁର୍ନୀତିରେ ଫସାଇବା ଆଶଙ୍କା କମ୍। ଏସିୟୁ ୮ଟି ଦଳର ପୃଥକ୍ ପୃଥକ ଭାବେ ସେସନର ଆୟୋଜନ କରିବ। ବିଶେଷ କରି ଆଇପିଏଲ୍ ଓ ଅନ୍ତର୍ଜାତୀୟ କ୍ରିକେଟରେ ବିଶେଷ ଅଭିଜ୍ଞତା ନ ଥିବା ଯୁବ ଖେଳାଳିମାନଙ୍କ ଲାଗି ଏହି ସେସନ ବିଶେଷ ଫଳପ୍ରଦ ହେବ। ପ୍ରତିଷ୍ଠିତ ଖେଳାଳିମାନେ ପୂର୍ବରୁ ଏସିୟୁ ପ୍ରୋଟୋକଲ ସହିତ ପରିଚିତ। ଏହାସତ୍ତ୍ୱେ ସ୍ପୋଟର୍ସ ଇଣ୍ଟିଗ୍ରିଟି ଏଜେନ୍ସିର ସହାୟତା ନିଆଯାଇଛି। ଏହା ବେଟିଂ କାର୍ଯ୍ୟକଳାପ ଏବଂ ସନ୍ଦିଗ୍ଧ କ୍ଲାଏଣ୍ଟ ଉପରେ ନଜର ରଖିବ ବୋଲିଂ ସିଂ କହିଛନ୍ତି। ସୋସିଆଲ ମିଡିଆ କିମ୍ବା ଫୋନ୍ (ହ୍ବାଟ୍ସଅପ୍) ଜରିଆରେ ଖେଳାଳିମାନଙ୍କୁ ଦୁର୍ନୀତିରେ ଲିପ୍ତ କରାଇବାକୁ ଉଦ୍ୟମ ହୋଇ ପାରେ। ପ୍ରତିଟି ଟିମ୍ ସହ ଦୁଇଜଣ ସିକ୍ୟୁରିଟି ଲିଆସନ ଅଫିସର ରହିବେ, ଯେଉଁମାନେକି ବାୟୋ-ବବଲ ପରିବେଶରେ ନଜର ରଖିପାରିବେ। ବିସିସିଆଇ ଏସିୟୁ ଟିମ୍ର କ୍ୱାରାଣ୍ଟାଇନ ପରିୟଡ଼ ଶେଷ ହେବ ପରେ ଖେଳାଳିମାନଙ୍କ ଲାଗି ଭିଡ଼ିଓ କନସେଲିଂ ସେସନ ଆରମ୍ଭ ହେବ।
