ବେଗୁନିଆ,୨।୨(ଡି.ଏନ୍.ଏ.): ସରକାରୀ ଯୋଜନାକୁ ଲୋକାଭିମୁଖୀ କରିବା ସହ ସାଧାରଣ ଲୋକଙ୍କ ବିକାଶଧାରାକୁ ତ୍ୱରାନ୍ବିତ କରିବା ପାଇଁ ରାଜ୍ୟ ସରକାରଙ୍କ ମହତ୍ ଉଦ୍ଦେଶ୍ୟଟି ସାଧିତ ହୋଇପାରୁ ନାହିଁ। ଲୋକଙ୍କ ମୌଳିକ ଆବଶ୍ୟକତାକୁ ଏଠି ଅଣଦେଖା କରାଯାଉଛି। ଖୋର୍ଦ୍ଧା ଜିଲା ବେଗୁନିଆବାସୀଙ୍କ ପକ୍ଷରୁ ବିଗତ ୩୦ବର୍ଷର ଦାବିକୁ କ୍ରମାଗତ ଭାବେ ଅବହେଳା କରାଯାଉଥିବା ଅଭିଯୋଗ ହେଉଛି। ୧୯୮୩ ମସିହାରୁ ବେଗୁନିଆ ସଦରବାସୀଙ୍କ ପକ୍ଷରୁ ବିଜ୍ଞାପିତ ଅଞ୍ଚଳ(ଏନ୍ଏସି) ଘୋଷଣା, ଜେଏମ୍ଏଫ୍ସି କୋର୍ଟ, ନୂତନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ଚାଷୀଙ୍କ ପାଇଁ ଶୀତଳଭଣ୍ଡାର ଆଦି ଆବଶ୍ୟକତା ରହିଛି ବୋଲି ଦାବି ହୋଇଆସୁଛି। ସେହିପରି ବେଗୁନିଆକୁ ମୋ ବସ୍ ଚଳାଚଳର ଯଥେଷ୍ଟ ଆବଶ୍ୟକତା ରହିଛି। ତେବେ ସମସ୍ତ ଆବଶ୍ୟକତାକୁ ହୃଦୟଙ୍ଗମ କରି ଏହି ବିଧାନସଭା ମଣ୍ଡଳୀରୁ ନିର୍ବାଚିତ ହୋଇଥିବା ବିଧାୟକ ଜାନକୀବଲ୍ଲଭ ପଟ୍ଟନାୟକ, ପ୍ରଶାନ୍ତ ନନ୍ଦ, ପ୍ରଶାନ୍ତ ଜଗଦେବଙ୍କ ସହିତ ବର୍ତ୍ତମାନର ବିଧାୟକ ରାଜେନ୍ଦ୍ର କୁମାର ସାହୁ ବିଧାନସଭାରେ ଦାବି ଉପସ୍ଥାପନ କରିଥିଲେ। ଏହା ଶୀଘ୍ର ପୂରଣ ହେବ ବୋଲି ବିଭାଗୀୟ ମନ୍ତ୍ରୀଙ୍କଠାରୁ ପ୍ରତିଶ୍ରୁତି ମଧ୍ୟ ମିଳିଥିଲା। କିନ୍ତୁ ତାହା ପୂରଣ ହେବା ପରିବର୍ତ୍ତେ ବେଗୁନିଆ ସଦର ମହକୁମାଠାରୁ ୪୦ କି.ମି. ଦୂର ବିଧାନସୌଧ ବିଭାଗୀୟ ମନ୍ତ୍ରୀଙ୍କ ଫାଇଲ ଭିତରେ ଅଟକି ରହିଛି, ଯାହାକୁ ନେଇ ସାଧାରଣରେ ଜନଅସନ୍ତୋଷ ଦେଖାଦେଇଛି। କେଉଁ କାରଣରୁ ଏତେଦିନ ଧରି ବେଗୁନିଆବାସୀଙ୍କୁ ସ୍ବପ୍ନ ଦେଖାଇ ପ୍ରତାରଣା କରାଯାଉଛି ବୋଲି ସାଧାରଣରେ ପ୍ରଶ୍ନ ଉଠୁଛି। ଯାହାକି ଆଗକୁ ଆସୁଥିବା ବିଧାନସଭା ନିର୍ବାଚନ ଉପରେ ପ୍ରଭାବ ପକାଇବ ବୋଲି ବେଗୁନିଆର ବୁଦ୍ଧିଜୀବୀ, ଆଇନଜୀବୀ, ବିକାଶ ମଞ୍ଚ, ଜନ କଲ୍ୟାଣ ପ୍ରତିଷ୍ଠାନ, ଛାତ୍ର ସଂଗଠନ ଆନ୍ଦୋଳନ ପାଇଁ ସଜବାଜ ହେଉଛନ୍ତି। ସୂଚନାଯୋଗ୍ୟ, ବେଗୁନିଆ ସଦର ମହକୁମାରେ ବ୍ଲକ, ତହସିଲ, ଥାନା, ସବ୍ରେଜିଷ୍ଟ୍ରି, ଦମକଳ କେନ୍ଦ୍ର, ରେଲୱେ ଷ୍ଟେଶନ ସହ ବହୁ ସରକାରୀ କାର୍ଯ୍ୟାଳୟ ରହିଛି। ଦୈନିକ ବେଗୁନିଆ ବ୍ଲକର ୨୧ ଏବଂ ବୋଲଗଡ଼ ବ୍ଲକର ୭ ପଞ୍ଚାୟତର ଲୋକମାନେ ନିର୍ଭର କରୁଛନ୍ତି। ଏଣୁ ତୁରନ୍ତ ଲୋକଙ୍କ ମୌଳିକ ଦାବିଗୁଡ଼ିକୁ ପୂରଣ କରାଯାଉ ବୋଲି ଦାବି ହେଉଛି।
