ଦେବଗଡ଼, ୮।୧୨(ଡି.ଏନ.ଏ.)- ରବିବାର ସନ୍ଧ୍ୟାରେ ବାମଣ୍ଡା କ୍ରିକେଟ କ୍ଲବର ଏକ ବୈଠକ କ୍ଲବର ସଭାପତି ତଥା ବିଧାୟକ ସୁବାଷ ଚନ୍ଦ୍ର ପାଣିଗ୍ରାହୀଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିଲା।୧୯୯୦ ମସିହାରୁ ଅନୁଷ୍ଠିତ ହୋଇ ଆସୁଥିବା ବାମଣ୍ଡା କପ କ୍ରିକେଟ ଟୁର୍ନାମେଣ୍ଟ ଚଳିତବର୍ଷ ତଥା ୩୧ ତମ ବାମଣ୍ଡା କପ କ୍ରିକେଟ ଟୁର୍ନାମେଣ୍ଟ ସମ୍ପର୍କରେ ବିସ୍ତୃତ ଆଲୋଚନା ହୋଇଥିଲା। ଉକ୍ତ ବୈଠକରେ ସର୍ବସମ୍ମତି କ୍ରମେ ୨୦୨୦ ବର୍ଷର ବାମଣ୍ଡା କପ କ୍ରିକେଟ ଟୁର୍ନାମେଣ୍ଟକୁ କରୋନା ସଂକ୍ରମଣ ପାଇଁ ସ୍ଥଗିତ ରଖାଗଲା। ଆଗାମୀ ଦିନରେ କରୋନା ସଂକ୍ରମଣ ତଥା ସରକାରଙ୍କ ନିର୍ଦେଶନାମା ଅନୁଯାୟୀ ପରବର୍ତ୍ତୀ ପଦକ୍ଷେପ ଗ୍ରହଣ କରିବାକୁ ନିଷ୍ପତ୍ତି ନିଆଯାଇଛି। ଏଥିସହ ପ୍ରତିବର୍ଷ ଡିସେମ୍ବର ୩୦ରେ ହେଉଥିବା ବାମଣ୍ଡା କପ ଫାଇନାଲ ଦିନକୁ ସ୍ମରଣ କରିବା ପାଇଁ ଡିସେମ୍ବର ୩୦ତାରିଖରେ ଏକ ରକ୍ତଦାନ ଶିବିର ଆୟୋଜନ କରିବାକୁ ସ୍ଥିରିକୃତ କରାଯାଇଛି। ଉକ୍ତ ରକ୍ତଦାନ ଶିବିରରେ କ୍ଲବର ସମସ୍ତ ସଦସ୍ୟ, ଖେଳାଳି ତଥା ଶୁଭେଚ୍ଛୁମାନେ ଯୋଗଦେବାକୁ ଅନୁରୋଧ କରାଯାଇଛି। ବୈଠକରେ କ୍ଲବର ସମ୍ପାଦକ ସୁଜିତ ପ୍ରଧାନ, ନବୀନ ପାଣି, ଉପ ସଭାପତି ଅଶୋକ ନନ୍ଦ ଏବଂ ସତ୍ୟନାରାୟଣ ପାଣି, କୋଷାଧ୍ୟକ୍ଷ ମୋତିଲାଲ ଶର୍ମା,ବସନ୍ତ ବେହେରା,ସୁଶୀଲ ନାୟକ, ଜୟନ୍ତ ସାହୁ, ପ୍ରଶାନ୍ତ ଦେବତା, ସନ୍ତୋଷ ଦେବତା, ଦୁର୍ଯ୍ୟୋଧନ ବିଶ୍ୱାଳ, ହରେକୃଷ୍ଣ ସାହୁ, ପ୍ରଫୁଲ୍ଲ ନାୟକ ତଥା ଅନ୍ୟାନ୍ୟ କର୍ମକର୍ତ୍ତା ଉପସ୍ଥିତ ଥିଲେ।
