ପାଣିକୋଇଲି,୧୮ା୪(ଡି.ଏନ.ଏ.): କୋରେଇ ବ୍ଲକ ଅନ୍ତର୍ଗତ ମୂଳାପାଳ ପଞ୍ଚାୟତ ସମ୍ପୂର୍ଣ୍ଣ ବୈତରଣୀ ନଦୀବନ୍ଧ କଡ଼ରେ ଅବସ୍ଥିତ। ତେବେ ବାଲିଗାଡ଼ି ଚଳାଚଳ ଫଳରେ ବନ୍ୟା ସମୟରେ ନଦୀବନ୍ଧ ଭାଙ୍ଗିବାର ସୁଯୋଗ ସୃଷ୍ଟି ହେଉଛି। ଧନତ୍ରୀ ବାଲିଘାଟ ପାଇଁ ନଦୀବନ୍ଧରେ ବାଲି ପରିବହନକୁ ଅନୁମତି ମିଳିଛି। କିନ୍ତୁ ଭାରିଯାନ ପରିବହନ ଯୋଗୁ ନଦୀ ବନ୍ଧର ଅବସ୍ଥା ବେହାଲ ହୋଇଛି। ମରଣଯନ୍ତା ସାଜିଥିବା ଏହି ନଦୀ ବନ୍ଧରେ ପିଚୁ ଉଠି ବଡ଼ବଡ଼ଖାଲ ଖମାରେ ଭର୍ତ୍ତି ହୋଇଛି। ତେଣୁ ଏହାକୁ ଲୁଚାଇବାକୁ ଯାଇ ବାଲିଘାଟ ଲିଜଧାରୀଙ୍କ ପକ୍ଷରୁ ଖାଲରେ ଲୁହା ସ୍ଲାଗ ପକାଯାଇଛି, ଯାହା ଏବେ ପୂର୍ବାପେକ୍ଷା ବିପଦ ସୃଷ୍ଟି କରିଛି। ଫଳରେ ସାଧାରଣରେ ଯାତାୟାତରେ ବାଧା ସୃଷ୍ଟି ହୋଇଛି। ନଦୀ ବନ୍ଧ ଉପରେ ବିଦ୍ୟାଳୟ ଓ ମହାବିଦ୍ୟାଳୟକୁ ସାଇକେଲରେ ଆସୁଥିବା ଛାତ୍ରୀଛାତ୍ରଙ୍କ ପାଇଁ ବାଧା ଉପୁଜିଛି। ଏଭଳି ନଦୀ ବନ୍ଧ ଉପରେ ଭାରିଯାନ ଚଳାଚଳ କଲେ ବନ୍ଧ ଭାଙ୍ଗି ଛାରଖାର ହେବ, ଯାହା ଗମନାଗମନ ଉପଯୋଗୀ ହୋଇପାରିବ ନାହିଁ। ଏପରି କି ନଦୀ ବନ୍ଧ ବର୍ଷାଦିନେ ଭାଙ୍ଗିଯିବାର ସମ୍ଭାବନା ସୃଷ୍ଟି ହେବା ଲକ୍ଷଣ ଦେଖାଦେଲାଣି। ନଦୀ ବନ୍ଧ ଭାଙ୍ଗିଲେ ମୂଳାପାଳ ପଞ୍ଚାୟତଟି ସମ୍ପୂର୍ଣ୍ଣ ଭାସିଯିବା ସହ କରଦା, ପାଣିକୋଇଲି ଓ ମାଳଆନନ୍ଦପୁର ପଞ୍ଚାୟତ ପ୍ରତି ବିପଦ ସୃଷ୍ଟି କରିବ। ନଦୀ ବନ୍ଧ ଉପରେ ଭାରିଯାନ ଚଳାଚଳ ଉପରେ ରାଜସ୍ବ ଓ ଜଳସେଜନ ବିଭାଗ ଦୃଷ୍ଟି ଦେବାର ଆବଶ୍ୟକତା ରହିଛି। ଯଦି ଜଳସେଚନ ଓ ରାଜସ୍ବ ବିଭାଗ ମିଳିତ ଭାବେ ସ୍ଥିତି ଅନୁଧ୍ୟାନ କରି ଉଚିତ୍ ପଦକ୍ଷେପ ଗ୍ରହଣ ନ କଲେ ବାଲିଘାଟ ପାଇଁ ମୂଳାପାଳ ପଞ୍ଚାୟତ କ୍ଷତିଗ୍ରସ୍ତ ହେବ। ଏଥିପାଇଁ ଉଭୟ ବିଭାଗ ଦାୟୀ ରହିବେ ବୋଲି ପଞ୍ଚାୟତବାସୀ କହିଛନ୍ତି।
